I Petus 2:11-12
Nqe cim:
“Nej yuav tsum ua nej lub neej kom zoo, txawm yog cov neeg tsis ntseeg Vajtswv uas nrog nej koom zej koom zos nyob ua ke…” (I Petus 2:12a)
Lus nug xav:
– Timthawj Petus muab Vajtswv cov menyuam piv zoo li leejtwg?
– Nws ntuas Vajtswv haivneeg kom ua lub neej zoo hauv ntiajteb li cas?
– Yuav ua li cas peb thiaj tuav tau lub neej zoo hauv ntiajteb txawm qee zaus peb yuav raug luag totaub yuam kev?
Timthawj Petus pib los ntawm lo lus ceebtoom txog lub tebchaws tseeb uas Vajtswv haivneeg yuav mus nyob. Nws muab peb piv zoo yam li “cov neeg uas taug kev tuaj ua qhua” hauv ntiajteb no (nqe 11a). Tseeb tiag, peb zoo ib yam li tus neeg taug kev uas tsuas hla dhau lub ntiajteb no xwb. Peb lub tebchaws tiag yog Ntuj Ceebtsheej, uas Yexus Khetos tabtom nyob hauv (Filipis 3:20). Thaum peb paub hais tias peb lub tebchaws tseeg tiag yog Ntuj Ceebtsheej, peb yuav muaj ib txojkev xav thiab tus cwjpwm txawv thaum ua neej hauv ntiajteb no.
Lub neej zoo thiab ncaj ncees pib ntawm qhov uas tsis kam ua raws tej kev ntshaw sab nqaij tawv, xws li kev qia dub, kev ntshaw nyiaj txiag thiab kev ua vuab tsuab uas neeg ntiajteb tabtom txhawb nqa (nqe 11b). Ib tus neeg taug kev yuav tsis cia nws tus kheej yoog raws tej kev coj phem ntawm lub tebchaws uas nws tabtom hla dhau mus, tiamsis nws ceev tus kheej dawbhuv, thiaj yuav qhia tshwm tau kev coj ncaj ncees ntawm Tebchaws Ceebtsheej.
Timthawj Petus nqua hu peb: “Nej yuav tsum ua nej lub neej kom zoo, txawm yog cov neeg tsis ntseeg Vajtswv uas nrog nej koom zej koom zos nyob ua ke” (nqe 12a). Qhov uas ua lub neej zoo ntawm no tsis yog tsuas coj txoj kevcai xwb, tiamsis tseem yog ua lub neej ncaj ncees thiab muaj kev hlub. Ntawd yog lub neej qhia tshwm kev mob siab haujlwm, tsis dag tsis ntxias, txaus siab pab cov neeg nyob ib ncig, thiab tsis yws thaum raug luag ua tsis ncaj ncees. Ntawd yog tej uas peb ua qhia tshwm Tswv Yexus tus yam ntxwv rau cov neeg uas tseem tsis paub Nws. Txojkev hlub tsis yog tsuas hais ntawm ncauj xwb, tiamsis tseem yog tej “haujlwm zoo” uas lwm haivneeg qhov muag tau pom, pobntseg tau hnov. Txawm neeg ntiajteb tsis muaj kev ncaj ncees, los peb tseem xaiv ua neej ncaj ncees. Txawm neeg ntiajteb ua phem thiab sib ntxub, los peb tseem xaiv ua neej muaj kev hlub thiab zam txim. Los ntawm lub neej uas muaj kev hloov sab hauv qhia tshwm rau sab nraud, yuav dhau los ua ib zaj timkhawv ciaj sia qhia txog Tswv Yexus Txojmoo Zoo cawmdim.
Tiamsis, muaj ib qhov tseeb uas peb tsis xav tau, ntawd yog txawm peb ua lub neej zoo raws li Vajtswv Txojlus qhia, los qee zaug peb tseem raug luag hais phem lossis totaub yuam kev (nqe 12). Txawm li ntawd los, yog peb pheej ua siab ntev qhia tshwm lub neej ncaj ncees thiab muaj kev hlub, ces qhov ntawd yuav xeeb ua ib lub zog los hloov tau lwm tus lub siab, kom lawv ntsia pom thiab hloov lub neej. Lub homphiaj kawg ntawm lub neej uas ua zoo tsis yog kom peb tau koob meej rau peb tus kheej, tiamsis yog kom lwm tus qhuas Vajtswv. Thaum peb siv kev hlub pauj kev ntxub, siv kev ncaj pauj kev phem, ces yog peb tabtom qhib ib txojkev rau Tswv Yexus Khetos Txojmoo Zoo cawmdim mus cuag tau lwm tus lub siab. Peb lub neej zoo hauv ntiajteb no yog ib zaj lus qhuab qhia uas muaj hwjchim tshajplaws uas neeg ntiajteb tabtom hnov txhua hnub.
Thov Vajtswv,
Tus Tswv, thov pab nyuam yaus nco ntsoov tias nyuam yaus tsuas yog ib tug qhua hla kev xwb, kom nyuam yaus tsis qaug mus rau tej kev ntshaw hauv lub ntiajteb no. Thov Koj pub dag zog rau nyuam yaus ua neej ncaj ncees thiab muaj kev hlub; kom dhau ntawm nyuam yaus lub neej, Koj lub npe tau koob meej. Nyuam yaus tuav Tswv Yexus Khetos lub npe thov, Amees.
Peb tabtom qhia tshwm tus Tswv lub npe rau neeg ntiajteb li cas?
Nyeem Vajluskub hauv peb lub xyoos Yauj 33
Kênh Youtube BHKTHN:
