II Timôthê 2:1-2
“Ih athei iŏk dôm nơ̆r ih mơ̆ng inh bơtho ih ‘bơ̆t anăp đe tơpôl sơ̆, na ih bơtho dơ̆ng kơ lu bơngai mă lui kơjăp, na lu sư gô bơtho dơ̆ng kơ lu đe nai.” (II Timôthê 2:2)
Nơ̆r jet tơchĕng pơwao:
– ‘Bok Pôl krao pơtơm ‘Bok bơtho Timôthê oei tơdăm tơdrong kiơ?
– Sư bơtho tơdrong bơtho, jing bơngai pơhrăm thoi yơ?
– Rim ‘nu Bơngai lui đei pŭ iŏk tơgŭm tơdrong bơtho lu bơngai, mă bơ̆n pŭ iŏk gah lu sư thoi yơ?
Đơ̆ng rŏng kơplah đei tơdrong pơtrŭt jơhngơ̆m pơ̆n nuih pơm kơdranh gah Kră Yang (II Timôthê 1:8). ‘Bok Pôl oei krao pơtơm ‘Bok bơtho oei tơdăm Timôthê gơnang kơ “Sư bơih gô ăn kơ ih jing pran” (trong 1). Jơ̆ bơngai oei tơdăm, oei kơ’bah hlôi mơn đei păng oei kơ’bah tơdrong hlôh jrŭ pơting hăm ‘bă lăm đon lui sư, mă-lei ‘Bok Pôl bơtho pơlung Timôthê athei pran kơtang wei kơjăp đon lui păng pơm keh tơdrong jang Kră Yang pơjao ăn tơ Êphêsô.
Trong 2 ăn kơ lu bơ̆n dôm tơdrong bơtho tơ’bôh rơđah nhen gah tơdrong bơtho lu bơngai pơhrăm kơjăp ăn kơ Kră Yang. Mă mônh, tơdrong bơtho Nơ̆r Kră Yang păng jing bơngai pơhrăm jơ̆ tơdrong jang kăl kơ oei pơkeh ling lang tơ rim jơhnơr. Đei puăn jơhnơr đei chih roi tơ âu: jơhnơr “inh” ‘noh ‘bok Pôl, jơhnơr “kon” ‘noh jơ̆ ‘bok Timôthê, jơhnơr mă ‘bok Timôthê đei “pơjao ăn”, păng jơhnơr “bơngai dơ̆ng”. Tơdrong âu đei tơ’bôh tơdrong jang “bơtho kơ đĭ-đăng bơngai” kiơ̆ kơ nơ̆r đei pơjao đơ̆ng Kră Yang Yêsu lăm Mathiơ 28:19 ưh kơ dơ̆ng ‘bơ̆t anih lu bơngai kră sơ̆ đĕch ôh, đei mơn hlôi hăm Kră Yang, na oei bơ̆jang ling-lang kơ rim ‘nu bơngai lui “tơnăp”.
Mă ‘bar, tơdrong ‘Bok Pôl bơtho tơlĕch đei pơm keh tôm tơdrong: “pơjao ăn”, dah wă khan bơtho dơ̆ng kơ bơngai nai “dôm tơdrong ih mơ̆ng inh bơtho” (trong 2). Hŏk pơhrăm păng hlôh tơdrong kiơ noh, athei bơtho dơ̆ng kơ đe tơdrong noh. Mă tơpă, bơngai đei hŏk pơhrăm lơ hloh na bơtho dơ̆ng dôm tơdrong kiơ mă bơ̆n đei hlôh. Lu bơ̆n ‘nĕ kơ bơtho tơdrong kiơ mă lu bơ̆n ưh tam mă pơhrăm, tam mă hlôh, mă-lei kư̆m ‘nĕ kơ pơhiơ̆ dĭng truh tơ layơ bơ̆n “băt tôm” na gơh bơtho, yua kơ rai hŏk pơhrăm, lu bơ̆n rai ‘bôh bơ̆n kơdih lăp iĕ ioch đĕch. Tơdrong hŏk pơhrăm jơ̆ tơdrong yak năm đĭ chăl arih. Yua thoi noh, lu bơ̆n athei lê̆ kơ pơdơh kơ hŏk pơhrăm đơ̆ng lu bơngai năm hơdrol, kư̆m athei ‘maih wă bơtho ăn dơ̆ng kơ bơngai nai tơdrong mă lu bơ̆n đei hŏk pơhrăm bơih.
Mă pêng, tơdrong kăl rơih chă bơngai bơtho noh “tơpăt” dah “tơnăp”. Đơ̆ng âu bơ̆n pơma gah đei jơhngơ̆m đon tơnăp păng kư̆m pơma kơ tơdrong gơh hơgei đơ̆ng Kră Yang ăn “đei tơdrong hơgei bơtho kơ đe nai dơ̆ng” wă khan noh “wă kơ lu sư đei tơdrong gơh hơgei bơtho đe nai dơ̆ng” (trong 2). ’Bok bơtho oei tơdăm Timôthê kăl kơ chă lu bơngai tơnăp wă kơ bơtho jing bơngai bơtho ăn kơ đe nai dơ̆ng.
Tơdrong ‘Nao ‘Lơ̆ng gơh oei đei lăm tơdrong bơtho đơ̆ng jơhnơr âu truh tơ jơhnơr nai, yua thoi noh, Khul Bơngai Lui ling-lang kăl kơ đei bơngai tơnăp đei tơdrong gơh hơgei gơh bơtho ăn kơ Hnam Trưng Năr Tơpơh, rim tơdrong jang. Mĕ ‘bă kư̆m kăl kơ hơmet wă kơ bơtho kon hơ’lơ̆p bơ̆n lăm trong Kră Yang. Rim ‘nu Bơngai Lui kăl kơ pŭ iŏk bơtho lu bơngai mă bơ̆n đei pŭ iŏk ăn kơ lu sư wă kơ Khul Bơngai Lui ling-lang rai wơ̆ pran kơjăp.
Ơ Kră Yang, inh bơnê kơ Ih yua kơ inh đei hlôi bơih păng oei gơh đei ‘me rong yua đơ̆ng lu bơngai bơtho tơnăp. Apinh tơgŭm inh kư̆m tơnăp đei pơjao dôm tơdrong mă đei mơ̆ng, đei pơhrăm ăn kơ bơngai nai dơ̆ng. Yua anăn Kră Yang Yêsu Krist, Amen.
Đe bu noh bơngai “tơnăp” wă kơ lu bơ̆n “pơjao ăn” dôm tơdrong kiơ mă đêl pơhrăm bơih ăn kơ lu sư?
Đŏk Sơ̆p Hla ar ‘Bok Kei-Dei lăm pêng sơnăm: Jop 27
Kênh Youtube BHKTHN:
