I Kôrintô 9:15-27
“Inh adrin druh rim đon kon bơngai thoi noh, yua kơ wă bơtho tơdrong ‘nao ‘lơ̆ng Yêsu Krist kơ lu sư na bơ̆n gơh oei hơdai hăm ‘Bok Kei-Dei ling lang ning-mônh.” (I Kôrintô 9:23)
Nơ̆r jet tơchĕng pơwao:
– ‘Bok Pôl jơ̆ jơ̆ng ‘bang gơh “jing pơm trong kơ lơ bơngai” hăm trong tơdrong kiơ?
– Kơnhăm kiơ̆ kơ sư kơplah băt yua tơdrong rơngei kơdih akâu sư thoi yơ?
– Lu bơ̆n pơhrăm hŏk iŏk kiơ̆ kơmĭl ‘bok Pôl thoi yơ?
Lăm sơ̆p hla bơar nơ̆r ‘Bok Kei-Dei chăl ‘nâu, ‘bok Pôl pơih să dôm tơdrong rai jrŭ hloh gah kơnhăm bơwei tơdrong rơngei kơdih akâu. Kơplah arih hăm lu bơngai Isơrael, sư chu hŭt đĭ tơdrong rơngei wă kơ arih thoi minh ‘nu bơngai Ysơrael, wă khan ưh kơ pơm glăi tơdrong juăt kon pơlei pơla, tơdrong juăt lu bơngai Isơrael minh tơdrong ưh kơ gan kăl, wă kơ lu bơngai Isơrael pơđêng đoñ mơ̆ng nơ̆r sư păng đơ̆ng tơdrong ‘noh sư ‘bônh kơ bơtho tơdrong ‘nao ‘lơ̆ng kơ lu bơngai Isơrael. Tơplơ̆ dơ̆ng, kơplah arih hơdai hăm lu bơngai tơmoi nai, wă khan “Lu ưh kơ đei tơdrong juăt”, sư ưh kơ pơgŏ lu bơngai noh kiơ̆ tơdrong juăt lu bơngai Isơrael, ưh kơ athei pơgŏ lu sư athei kăt tơdra akar, ưh kơ sa ‘nhem nhŭng, dah dôm lu năr phĕt bơngai Isơrael ….Sư bơtho tơbăt tơdrong ‘nao ‘lơ̆ng hăm nơ̆r păng tơdrong mă sư hlôh, kơnhăm wă kơ huay kơ đei dur pơgăn tơdrong mă ưh kơ gan kăl kơplah lu sư năm hăm tơdrong ‘nao.
Mă đơ̆ng arih thoi ei, mălei ‘bok Pôl ưh kơ “wă jing dôm trong” glăi lơ bơngai wă tơkan sơng păng pôk tơ iung. Yua kơ dôm tơdrong kiơ mă sư chu iŏk đon ala ‘nâu yua kơ tơdrong rơngei Kră Yang ăn, thoi sa tơmam soi mă sư đei tơblang rơđah bơih ‘noh (I Kôrintô 8:9; 9:1; 15-18). Thoi ei, lăm tơdrong rơngei ăn noh, kơdih wei tơdrong rơngei pă minh ‘măng dơ̆ng noh; yua kơ wă pơyua ăn kơ lơ bơngai păng yua kơ tơdrong ‘nao ‘lơ̆ng. Thoi ei, “jing tôm tơdrong trong ăn kơ lơ bơngai” ưh kơsĭ tơdrong arih pơm kiơ̆ mơ̆ng kơ wă, bu liơ inh kư̆m thoi ei mơ̆n, dah pơm tơdrong glăi mă Kră Yang khă pơm kơ jơhngơ̆m lơ bơnai yoch, mălei hăm tơdrong ‘mêm mơnat kơ dôm tơdrong arih bơhngol oei hiong răm kiơ̆ kơ tơdrong gơh hơgei.
Hăm nơ̆r đei mơjĭt wơ̆t nơ̆r “Wă kơ” lăm tơsĭn trong sơ̆p hla bơar, ‘bok Pôl ăn kơ lu bơ̆n băt rơđah kơnhăm sư kơplah wă jang dôm tơdrong phŏ lăm kơdih akâu ưh kơ rơnŭk, athei chu ĕnh, athei akâu chu jơ̆: “wă kơ tơiung” râu tơ iung lơ bơngai, đơ̆ng bơngai Ysơrael truh tơ bơngai tơmoi, “wă kơ dŏng minh ‘bar ‘nu”, wă kơ klah asong ăn tơdrong pŭn yua kơ tơdrong ‘nao ‘lơ̆ng”, wă kơ môk pơtao huay kơ hiong” (trong 22, 23, 25). Sư pơkă hơđăl tơdrong kơnhăm ưh kơsĭ kơdâu pơhơi dah pơma ngôi, mă tơpă yua kơ tơdrong ‘nao ‘lơ̆ng păng yua wă kơ lơ bơngai băt kơ tơdrong ‘nao ‘lơ̆ng, nơ̆r tơbăt gĭt ‘nâu păng hiôk hian tơpă lăm chăl arih lu sư.
Kiơ̆ kơ kơmĭl ‘bok Pôl, rim ‘nu lu bơ̆n athei wei tơdrong rơngei kơdih wă kơ tơdrong ‘nao ‘lơ̆ng ba ăn kơ lơ bơngai, ba ăn tơdrong dŏng pơklaih Yêsu Krist ăn kơ bơngai nai. ‘Nĕ kơ lăng gĭt kăl gah tơdrong ‘nao ‘lơ̆ng mălei hăm tơdrong chu tơ jur kơdih akâu “wă kơ đei dŏng pơklaih lơ bơngai ưh kơ đei trong nai dơ̆ng” (trong 22).
Ơ Kră Yang, inh bơnê kơ Ih yua kơ Ih ăn kơ inh đei tơdrong rơngei wă ră roi Tơdrong ‘Nao ‘Lơ̆ng Kră Yang ba truh tơ inh. Apinh Ih tơgŭm inh pơyơ̆r akâu jăn ‘măn tơdrong rơngei inh yua kơ Tơdrong ‘Nao ‘Lơ̆ng Ih. Krao khan yua Anăn Kră Yang Yêsu Krist, Amen.
Lu bơ̆n kăl kơ ĕnh gơ̆t, dôm tơdrong kiơ yua kơ Tơdrong ‘Nao ‘Lơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Jop 18
Kênh Youtube BHKTHN:
