Mathiơ 26:30-35
“Thoi noh boih na bơngai bu ngêh kơ tơ’ngla sư lui kơjăp, bơngai ‘noh athei kơchăng hli kơ sư jing rơdu pơm yoch.” (I Kôrintô 10:12)
Nơ̆r jet tơchĕng pơwao:
– Kră Yang Yêsu đei roi pơđah tơdrong gĭt kăl ayơ hăm lu bơngai pơhrăm păng Sư?
– ‘Bok pêtrôs hăm lu bơngai pơhrăm nai đei tơ’bôh tơdrong lui ngeh hloh hnang thoi yơ?
– Đơ̆ng tơdrong Pêtrôs sơngah ăn kơ lu bơ̆n pơhrăm iŏk ayơ kơdih akâu?
Đơ̆ng rŏng kơ lu sư hơri minh tơdrong ‘Bok Kei-Dei pơtôch jơ akŭm lăm Phĕt Năm Brih, đơ̆ng noh Kră Yang Yêsu păng lu bơngai pơhrăm păng Sư lĕch hloi năm tơ kông Ôliwơ. Lăm trong năm, Kră Yang roi tơbăt minh tơdrong gĭt: “Yêsu roi kơ lu bơngai pơhrăm păng Sư: Đĭ đăng kơ iĕm măng kơnh kơdâu achăng lê̆ Inh, yua kơ đei nơ̆r chih roi lê̆ hơdrol boih thoi âu: ‘Bok Kei-Dei gô pơlôch tơ’ngla wei triu, triu kơdâu tơklah đơ̆ng tơ’ngla Sư.” (trong 31). Nơ̆r “pơm glăi” wă khan lu bơngai pơhrăm păng Sư gô tơ’bơ̆p tơdrong pơlong gah đon lui tih dêh păng đĭ đăng lu sư tă kơ pơm glăi hăm đon lui yua kơ Kră Yang. ‘Nâu bơih nơ̆r tơbăt lê̆ gĭt dêh mălei Pêtrôs oei ưh tam mă băt kơ tơdrong wă truh, thoi noh na sư pơma jăng dêh păng đei pơang khan sư đei đon lui kơjăp hloh kơ bơngai nai: “Na Pêtrôs khan kơ Sư: Mă lu đe âu achăng lê̆ Ih, gah Inh kuă kơ achăng Ih ôh.”(trong 33). Na Kră Yang roi tơbăt rơđah kơ sư: “Yêsu khan kơ Pêtrôs: Inh khan kơ ih tơpă, măng kơnh boih hơdrol kơ iĕr ŏ, ih gô sơngah kơ Inh pêng ‘măng khan ih ưh kơ băt kơ Inh.” (trong 34). Mălei sư oei khan mă đe wă pơlôch inh hơdai păng Ih, inh kư̆m kuă sơngah ôh, đĭ đăng bôl kư̆m khan lei lăi thoi noh mơ̆n (trong 35).
Kră Yang Yêsu băt lê̆ adrol tơdrong pơmat gô truh tơ lu bơngai pơhrăm păng Sư kơplah đe rôp păng pơlôch Kră Yang, Kră Yang băt noh tơdrong lu sư tam lah tơ’bơ̆p kơplah kiơ̆ Kră Yang. Tơplih kơ tơdrong băt kơnăl đon lui rơdu wă apinh Kră Yang tơ’bôh wă kơ kĕjei, lei na ‘bok Pêtrôs păng lu bơngai pơhrăm nai oei lui ngeh kơjăp đĕch. Na lăm măng noh hloi, lu sư rŭng răng tơpă! Lu sư kơdâu ôn kơdih kơdih, na Pêtrôs sơngah kơ Kră Yang hloi.
Đơ̆ng tơdrong lui ngeh hnang ba truh tơdrong răm ‘bok Pêtrôs, na lu bơ̆n ‘bôh kơdih lăm rup noh. Mă khan lu bơ̆n băt hơđăl nơ̆r Kră Yang tơbăt lê̆ kơ lu bơ̆n bơih, đơ̆ng lăm sơ̆p hla bơar mă bơ̆n đei đŏk, đei mơ̆ng dah mă Kră Yang đei ăn truh lăm chăl arih…wă kơ lu bơ̆n lăng ‘bôh đon lui mă tơpă, mălei lu bơ̆n juăt lăng pơhơi đêl tơdrong noh dah mă bơ̆n yua iŏk đơ̆ng ki sơ̆, pơm kơ lu bơ̆n lui ngeh hloh hnang păng ưh pă lăng tơdrong Kră Yang tơ’blŏk kơ lu bơ̆n. Băt mă Kră Yang oei ăn kơ lu bơ̆n lăm tơdrong jang ayơ noh thoi noh na ưh pă gơnang kơ Kră Yang, đơ̆ng noh na lu bơ̆n ‘bônh kơ pơm glăi lăm đon lui păng pơm yoch. Kră Yang Yêsu đei roi tơbăt lê̆ bơih kơ Pêtrôs: “Ơ Pêtrôs, ih mơ̆ng Inh ‘biơ̆ bĕ. Yang Satan apinh ‘Bok Kei-Dei wă pơlong lăng tơdrong lui lu iĕm thoi lĕ đe wă um ‘ba.” (Luka 22:31).Noh kư̆m dai nơ̆r tơbăt lê̆ kơ rim ‘nu lu bơ̆n wă kơ lu bơ̆n oei lăm Kră Yang lăm chăl arih gah bơhngol. “Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.”(Êphêsô 6:12). Apinh Kră Yang ăn kơ lu bơ̆n kơchăng thoi noh bơih bơngai ngeh kơ tơ’ngla sư lui kơjăp, bơngai noh athei kơchăng hli kơ sư jing rơdu pơm yoch!
Ơ Kră Yang Yêsu, apinh Ih tơgŭm inh wă kơ inh gơh hlôh hăm tơdrong Ih tơ’blŏk, apinh Ih ăn kơ inh iŏk đon ala chu mơ̆ng, tơplih wă kơ huay pơm glăi păng ling lang pơm kiơ̆ kơ Ih lăp đon. Krao khan yua Anăn Kră Yang Yêsu Krist, Amen.
Kră Yang oei tơƀăt lê̆ tơdrong kiơ gah bơngol lu bơ̆n?
Đŏk Sơ̆p hla bơar ‘Bok Kei-Dei lăm pêng sơnăm: Jop 14
Kênh Youtube BHKTHN:
