Blŭng a 14:17-24
“Lăp Abram kơtơ̆ng khan mon sư linh ayăt rôp boih, na sư pơtơm akŭm pêng-hrĕng mơjĭt-tơhngam ‘nu bơngai mă pơhrăm lê̆ tơdrong tơblah boih, lu bơngai đĭch đam tơpŭ lăm hnam sư, na druh ‘moi lu pơtao noh truh tơ teh đak Đan.” (Blŭng a 14:14)
Nơ̆r jet tơchĕng pơwao:
– Kơplah tơblah jei bơih na wih brŏk, ‘bok Abram tơ’bơ̆p bu?
– ‘Bôh lu sư tơ’bơ̆p ‘bok Abram thoi yơ?
– Jơhngơ̆m ‘bok Abram hăm rim ‘nu pơtao wă pơma tơdrong kiơ?
– Lu bơ̆n pơhrăm iŏk tơdrong kiơ đơ̆ng kơmĭl ‘bok Abram?
Đơ̆ng rŏng kơ blah lu pơtao jei bơih, lu khul linh Abram đei đih sơng iŏk lu sư tơ thŭng pơtao (trong 17). ‘Bok Abram tơ’bơ̆p pơtao Sôđôm păng pơtao Salem noh Mêlkisadek. Sơ̆p hla bơar ‘Bok Kei-Dei ưh kơ đei pơma roi lơ gah pơtao Sôđôm mălei pơma lơ gah pơtao Salem. “Kơplah noh pơtao âu jơ̆ ‘bok soi kơ Kră Yang ‘Bok Kei-Dei mă tih hloh”. (trong 18). Kư̆m jơ̆ ‘Bok Kei-Dei mă ‘bok Abram kơkuh (trong 22). Pơtao Mêlkisadek bơih rup ‘Bok Krist, jơ̆ pơtao păng ‘bok soi ling lang (Hêbrơ 7).
Bre ‘bar ‘nu pơtao sơng ‘bok Abram phara băl. Na “Mêlkisadek pơtao Salem, athei ba ‘bĕng păng tơdrô” (trong18). Lei na pơtao Sôđôm năm hoh ưh kơ đei chĕp ba kiơ. Hơdrol kơ noh, lăm tơdrong tơblah lu pơtao Mêsôpôtami, pơtao Sôđôm thuơ, kơdâu klĕnh. Mŭk tơmam, phe ‘ba, păng rôp lu kon pơlei. Dang ei ‘bok Abram tơblah lu ayăt jei sư păng dŏng pơklaih kon pơlei wih brŏk mălei pơtao Sôđôm ưh kơ đei pơm thoi yơ wă tơ’bôh jơhngơ̆m băt bơnê. Rŏ lăng noh kư̆m tơdrong kăl yua lăm minh pôm pơlei tih mă Sơ̆p hla bơar ‘Bok Kei-Dei đei chih roi adrol noh (Blŭng a 13:13). Lăm noh pơtao Salem năm wă hơkat pŭn hiôk kơ Abram păng pơyơ̆r ưang kơ ‘Bok Kei-Dei (trong 19-20a), lei na pơtao Sôđôm năm truh wă apinh ‘bok Abram pơjao kon pơlei kơ sư dơ̆ng (trong 21). Rŏ lăng sư hli kơ ‘bok Abram gô tơgar iŏk anih jang sư!
Jơhngơ̆m ‘bok Abram ham ‘bar ‘nu pơtao ‘nâu phara băl tơpă. Hăm pơtao Mêlkisadek, ‘bok Abram sơng iŏk nơ̆r hơkat pŭn hiôk đơ̆ng sư păng kư̆m pơyơ̆r minh lăm mơjĭt pơtao jơ̆ ‘bok soi ‘Bok Kei-Dei, tơ’bôh khan ‘bok Abram băt bơnê kơ Kră Yang păng pơyơ̆r dôm tơdrong ‘lơ̆ng rŏ kơ Kră Yang gah tơdrong kĕ jei sư. Na lăm noh pơtao Sôđôm ‘bok Abram khan tơpăt kơ sư, Abram sư ưh kơ iŏk tơmam kiơ ‘bơm kơ pơtao mă khan tơmam iĕ hloh wă kơ huay kơ đei đe ang khan yua kơ đơ̆ng pơtao Sôđôm na jing mơdrŏng (trong 23). Đei lơ bơngai kĕ jei lăm dôm tơdrong jang pơmat lăm tơdrong arih mălei jing thuơ răm na đơ̆ng noh dơ̆ng ‘bơ̆t anăp đei lơ bơngai ôr jreo, ‘bơ̆t tơdrong pơhlŭ gah anăn wă kơ đe ưang păng mŭk tơmam. Đei pơma khan tơdrong tơblah đơ̆ng dôm tơdrong pơhlŭ đơ̆ng rŏng kĕ jei tih hloh kơ tơdrong tơblah hăm ayăt dah tơdrong anat. Hŏk pơhrăm kiơ̆ kơmĭl ‘bok Abram, apinh Kră Yang tơgŭm bơ̆n đơ̆ng rŏng kơ dôm kĕ jei băt pơyơ̆r tơdrong ‘lơ̆ng rŏ ưang kơ Kră Yang ‘Bok Kei-Dei păng sơngah kơ dôm tơdrong krao wơ̆n đơ̆ng lăm teh đak yoch.
Ơ Kră Yang, bơnê kơ Ih yua kơ Ih bơih Tơ’ngla ăn kĕ jei kơ lu đe bu gơnang kơ Ih. Apinh Ih tơgŭm inh arih băt iŏk đon ala, băt pơyơ̆r kơ Kră Yang dôm tơdrong ưang. Apinh Ih ăn kơ inh hŭt lê̆ đĭ dôm tơdrong pơhlŭ wă kơ đei yua kơdih lăm chăl ‘nâu, păng lăng gah tơmam apah ling lang đơ̆ng Kră Yang tơ pơlei ‘lơ̆ng. Krao khan yua anăn Kră Yang Yêsu Krist, Amen.
Bơ̆n gô pơm kiơ đơ̆ng rŏng kơ jei mă Kră Yang ăn?
Đŏk Sơ̆p Hla bơar ‘Bok Kei-Dei lăm pêng sơnăm: Jop 11
Kênh Youtube BHKTHN:
