Mathais 23:23
Nqe cim zaj kawm:
“…Nej muab tej txujlom, tsis hais pumhub, zaub txhwb thiab xyab txhob, ib feem kaum rau Vajtswv, tiamsis nej tsis ua raws li tej lus tseemceeb uas Vajtswv txoj Kevcai qhia kom neeg ua ncaj ncees, muaj kev hlub thiab ua lub siab ncaj…” (Mathais 23:23)
Lus nug xav:
– Vim li cas Tswv Yexus thiaj cem cov xibhwb qhia Vajtswv txoj Kevcai thiab cov Falixais hais tias yog neeg ntsejmuag ncaj siab nkhaus?
– Lawv tau tso tej yam tseemceeb twg tseg?
– Tej lus qhia no tseem muaj nqis rau Pawg Ntseeg niaj hnub nimno li cas?
Tswv Yexus tau cem cov xibhwb qhia Vajtswv txoj Kevcai thiab cov Falixais hnyav heev, hu lawv ua cov neeg “ntsejmuag ncaj siab nkhaus” vim lawv tsuas mob siab ua tej yam qhia tshwm sab nraud xwb (nqe 23a). Lawv muaj meej hais tias yog cov uas xyuamxim coj txoj Kevcai heev, txog qib uas muab ib feem kaum ntawm tej zaub me me xws li pumhub, zaub txhwb thiab xyab txhob los pub rau Vajtswv. Saib sab nraud, lawv zoo li yog cov neeg ncaj ncees heev. Tiamsis Tswv Yexus qhia tshwm qhov teebmeem tseemceeb hauv lawv lub neej: lawv mob siab rau tej yam me me ntxaws heev, tiamsis ho tso tseg, “tsis ua raws li tej lus tseemceeb uas Vajtswv txoj Kevcai qhia kom neeg ua”. Nws hais txog peb yam tseemceeb, uas yog: “ua ncaj ncees, muaj kev hlub thiab ua lub siab ncaj” (nqe 23b). Ua ncaj ncees yog ua ncaj thiab ua zoo sib npaug rau txhua tus. Muaj kev hlub tshua yog paub khuvleej, zam txim thiab pab cov uas tabtom muaj kev cheemtsum. Kev ua lub siab ncaj yog ua neej tseeb, muab tus kheej fij rau Vajtswv txhua lub tsamthawj. Tej no yog tej yam uas qhia tshwm Vajtswv lub siab nyiam, tiamsis cov thawj coj ntawm sab kev ntseeg ho tsis quav ntsej thiab saib tsis taus.
Tej lus ceeb toom no tseem muaj nqis heev rau Pawg Ntseeg niaj hnub nimno. Peb muaj cuabkav mus pehawm hauv Tuamtsev tsis tu ncua, rau siab ntso ua tus Tswv tes haujlwm, thiab fij nyiaj txhij txhua, tiamsis tseem tsis tau muaj txojkev ncaj ncees thiab txojkev hlub tiag. Ib Pawg Ntseeg tej zaum yuav kub siab heev sab nraud, tiamsis yog tsis muaj peb yam tseemceeb no, ces yuav yooj yim poob mus rau kev sib faib, sib txiav txim rau lwm tus thiab tsuas ua neej sab nraud xwb, vim yog tau ua neej yuamkev paug hauv lub siab xav thiab lub homphiaj lawm. Tej zaum hais lus zoo li muaj kev ntseeg heev, tiamsis ntawm tej kev sib raug zoo ho tsis muaj kev hlub. Tej zaum qhuab qhia txog qhov tseeb, tiamsis ho tsis ua qhia txojkev hlub. Tswv Yexus tsis yog tsis lees yuav tej haujlwm sab nraud. Nws hais tias: “Tsimnyog nej ua raws li tej lus qhia no, thiab tsis txhob tso lwm nqe tseg” (nqe 23c). Qhov no txhais hais tias lub neej ntseeg yuav tsum muaj ob yam huv tibsi: kev mloog lus hauv tes haujlwm thiab lub siab uas tau hloov dua tshiab. Tej haujlwm uas zoo yuav tsum tawm hauv lub siab uas hlub tus Tswv thiab hlub tibneeg los.
Vajtswv Txojlus hnub no nqua hu peb txhua tus rov los tshuaj xyuas peb lub neej. Ntau zaus peb tsuas ceev tej yam sab nraud xwb, tiamsis tsis muaj qhov tseeb nyob hauv lub siab. Peb puas tsuas mob siab rau tej kevcai, tiamsis ho hnov qab kev khuvleej hauv txojkev hlub? Ib Pawg Ntseeg uas loj hlob tiav yog qhov chaw uas muab qhov tseeb thiab txojkev hlub los koom ua ke. Qhov chaw ntawd nrhiav txojkev ncaj ncees, tiamsis kuj puv npo txojkev hlub tshua. Qhov chaw ntawd ua ncaj ncees tsis yog hauv txojkev ntseeg xwb, tiamsis tseem nyob hauv txojkev sib raug zoo nrog lwm tus txhua hnub. Qhov chaw ntawd tsis yog ua raws kab ke ntseeg sab nraud xwb, tiamsis yog lub neej uas tau hloov dua tshiab; tsis yog saib ntawm haujllwm sab nraud, tiamsis yog txojkev hlub uas qhia tshwm dhau ntawm tej haujlwm. Thaum kev ncaj ncees, kev hlub tshua thiab kev ua lub siab ncaj tau muab los xyaum hauv lub neej, ces Pawg Ntseeg yuav dhau los ua qhov chaw uas coj kev nplig siab, kev loj hlob thiab kev ua timkhawv ciaj sia rau neeg ntiajteb.
Thov Vajtswv,
Tus Tswv, thov Koj pab kom nyuam yaus tsis txhob tso tej yam tseemceeb tseg, tiamsis mob siab ua neej qhia tshwm tej yam ntawd txhua hnub, kom nyuam yaus txojkev ntseeg tsis yog tsuas ua rau luag pom xwb, tiamsis tseem qhia tshwm Koj lub siab nyiam. Nyuam yaus tuav Tswv Yexus Khetos lub npe thov, Amees.
Peb tabtom hnov nco qab tej yam tseemceeb twg hauv peb txojkev ua neej txhua hnub?
Nyeem Vajluskub hauv peb lub xyoos: Yauj 7
Kênh Youtube BHKTHN:
