Mathiơ 25:41-46
“Đơ̆ng noh ‘Bok Kei-Dei phak lu sư tơ dơnâu ŭnh ling lang ưh kơ layơ păt. Gah lu bơngai lui kơ ‘Bok Kei-Dei ‘lơ̆ng tơpăt, lu sư tŏk oei hơdai hăm ‘Bok Kei-Dei ling lang kư̆m ưh kơ layơ tôch.” (Mathiơ 25:46)
Nơ̆r jet tơchĕng pơwao:
– Lu bơngai oei gah ‘ngieo, Kră Yang jô̆ lu sư yoch thoi yơ?
– Yua kơ kiơ Kră Yang jô̆ lu sư yoch trăp thoi noh?
– Kră Yang wă kơ kon pơlei Sư arih hơdai thoi yơ?
Đơ̆ng rŏng kơ pơma khan kơ lu bơngai oei gah ‘ma wă khan triu Kră Yang tơpă noh, Kră Yang Yêsu hue tơ lu bơngai mă oei gah ‘ngieo, hrŭk akar triu kư̆m pơma khan kơ lu sư. Lu sư kư̆m khan “Kơkuh kơ Ih Kră Yang, kơkuh kơ Ih Kră Yang,” mălei Kră Yang tă tơ jô̆ lu sư yoch trăp dêh, Kră Yang khan: “Klaih kơ noh Inh pơma kơ lu bơngai mă oei gah ‘ngiĕo kơ Inh dơ̆ng thoi âu: ‘Dang ei ‘Bok Kei-Dei wă phak iĕm boih, iĕm jah weh đơ̆ng âu kơdâu năm tơ dơnâu ŭnh to bĕ. Ŭnh noh ưh kơ layơ păt, ŭnh noh ‘Bok Kei-Dei hơmet ăn kơ yang Satan păng đĭ-đăng kơ lu linh jang kơ sư năm oei tơ lăm dơnâu ŭnh noh.” (trong 41). Kră Yang Yêsu roi tơbăt tơdrong Sư jô̆ lu bơngai ei yoch noh, yua kơ lu sư hlôi oei sa hăm Kră Yang kơnê̆ dêh, ưh kơ jang, ưh kơ pơm minh tơdrong kiơ ăn kơ Kră Yang hloi. Lu sư jet Kră Yang khan lu sư ưh kơ ‘bôh Kră Yang anat kiơ kăl kơ lu sư dŏng; tơdah lu sư ‘bôh Kră Yang anat kiơ lei lu sư dŏng hloi bơih, pơm hloi bơih. Mă-lei Kră Yang khan: “Na Inh gô khan kơ lu sư: Inh khan kơ iĕm tơpă, yua kơ sơ̆ iĕm ưh kơ tơgŭm mơnat kơ lu ‘nhŏng oh Inh âu, lu sư bơngai iĕ hloh kơ iĕm, noh dang iĕm ưh kơ tơgŭm Inh mơ̆n.” (trong 45). Kră Yang Yêsu hlôi chrih raih đaih kơ lu bơngai mă oei gah ‘ngieo băt yua kơ kiơ Sư tă tơ hiap lu đe ei, yua kơ lu sư ưh kơ arih ‘mêm mơnat, ưh kơ tơchĕng ‘blŏk hiơ̆k kơ bơngai bu ‘nguaih kơ lu sư kơdih, arih ưh kơ asong ăn kơ đe tơmam, ưh kơ pre jơhngơ̆m chu iŏk pơmat wă dŏng đe nai. Lu sư arih kret tơsen tôm tơdrong tơpă. ‘Noh lu sư arih ‘bôh đe pơmat, lu sư ‘mơng đĕch pơm thoi ưh kơ ‘bôh, lu sư ưh kơ ‘brơ̆k mơnat ‘biơ̆ kơ lu ‘nhŏng mai oh, bôl buăl. Tơdah lu sư ‘blŏk ‘blăi kơ bu, tơgŭm ‘biơ̆ bơngai bu, ‘noh lu sư kư̆m chă pơpơm gah ‘nguaih đĕch tăm, ưh kơ đơ̆ng lăm jơhngơ̆m mơnat hloi‘mơ̆i. Lu sư tơgŭm đe wă yua iŏk đơ̆ng đe, wă kơ lơi yua ăn lu sư kơdih, chă wă kơ đe pơ-ư kơ lu sư. Kră Yang lăng ‘bôh tôm tơdrong mă lu sư chă pơpơm lăm jơhngơ̆m lu sư noh, na Kră Yang ưh kơ chhôk, ưh kơ lăp đon kơ lu sư arih thoi noh. Lĕch đơ̆ng tơdrong arih lu bơngai mă oei gah ‘ngieo noh, lu sư gô “Đơ̆ng noh ‘Bok Kei-Dei phak lu sư tơ dơnâu ŭnh ling lang ưh kơ layơ păt. Gah lu bơngai lui kơ ‘Bok Kei-Dei ‘lơ̆ng tơpăt, lu sư tŏk oei hơdai hăm ‘Bok Kei-Dei ling lang kư̆m ưh kơ layơ tôch.” (trong 46). ‘Noh minh tơdrong phak ưh kơ đei la yơ tôch, kư̆m ưh kơ đei jơ trŏ lăp wă hơmet ming tơdrong arih dơ̆ng.
Kră Yang Yêsu ling lang wă kơ kon pơlei Sư arih tơpăt, tơ’bôh đon lui, tơ’bôh hăm tơdrong bơ̆n jang pơm lăm tơdrong ‘mêm mơnat tơpă hloi. Minh ‘nu bơngai ayơ , mă khan sư năm akŭm tơ hnam akŭm hơnơ̆ng, pơyơ̆r jên tơmam hơmrah, phŏ sư kư̆m chĕp tơdrong jang lăm hnam akŭm .v.v.. Mă-lei tơdah ưh kơ đei đon lui kơ Kră Yang tơpă, păng đon lui sư noh ưh kơ đei pơm kiơ̆ lei sư noh oei thoi bơbe hrŭk akar triu đĕch, oei arih tơdrong arih so hăm jơhngơ̆m tơdrong arih tam mă tơplih ‘nao, pôm băt arih pơyua kơ kơdih akâu đĕch, chơchă wă kơ lơi yua ăn kơdih akâu đĕch. Ưh kơ đei kiơ gơh ôn hlơp ôh ‘bơ̆t năp Tơ’ngla Mă ‘Bôh Băt Tôm Tơdrong. Dôm tơdrong bơ̆n pơm gah ‘nguaih, Kră Yang chih răk ngăl bơih, na lu bơ̆n gô dơ̆ng ‘bơ̆t anăp Sư lăm năr Sư sek tơlang ning mônh. Awih awăn kơ Kră Yang trŏ noh wă khan băt tơchĕng ‘blŏk hiơ̆k kơ lu ‘nhŏng, mai oh bơ̆n tŏk-bŏk tơ’bơ̆p tơdrong gleh pơmat anat anot thoi nơ̆r ‘Bok Pôl Jơ̆ng ‘bang Kră Yang đei tơ’blŏk: “Mă-lei bơ̆n athei chu kơ Sư khŏm khŏm wă kơ bơ̆n gơh pơm đon ‘lơ̆ng. Thoi noh dah bơ̆n huay kơ achăng lê̆ Sư na mưh trŏ kơ năr ‘Bok Kei-Dei pơkă ning-mônh Sư gô ăn kơ bơ̆n tơdrong apah na bơ̆n oei hơdai hăm Sư ling lang. Kư̆m thoi bơ̆n pơtăm găr, dah bơ̆n ưh kơ hŭt lê̆ tơdrong jang bơ̆n, lei trŏ bơyan plei, bơ̆n đei phĕ iŏk tơpă. Na dang ei bơ̆n oei arih tơ ala teh, bơ̆n athei pơm ‘lơ̆ng kơ đe ling lang. Mă loi athei pơm ‘lơ̆ng kơ lu bơngai lui bơ̆n.” (Galati 6:9-10)
Kơkuh kơ Ih Kră Yang, inh băt ưh kơ đei tơdrong kiơ gơh ôn hlơp ‘bơ̆t anăp Ih, apinh Ih tơgŭm inh lui kơ Ih tơpă, wă kơ mơn đei tơdrong arih tơplih ‘nao, păng wă kơ inh huay kơ arih kret tơsen, mă-lei wă kơ inh băt tơchĕng hiơ̆k ‘blŏk dih băl trŏ thoi jơhngơ̆m tơdrong arih ‘nao mă Ih ăn kơ inh bơih noh. Inh krao khan yua anăn Kră Yang Yêsu Krist, Amen.
Lăm năr hơtuch ei kơnh, bơ̆n hăm băt Kră Yang ăn kơ bơ̆n dơ̆ng gah ‘ma dah gah ‘ngieo?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 129-131
Kênh Youtube BHKTHN:
