II Timôthê 1:6-12
“Ih ‘nĕ mơlâu kơ bơtho đe tơdrong Kră Yang Yêsu păng ih ‘nĕ mơlâu kơ đe phak inh lăm hnam phak. Đe phak inh yua kơ inh lui kơ Kră Yang Yêsu. ‘Bok Kei-Dei tơgŭm ih tơpă, na mă ih đei tơdrong gleh pơmat-tat, ih kư̆ adrin bơtho tơdrong ‘nao ‘lơ̆ng Sư, thoi lĕ kơ inh đei tơdrong pơmat-tat dang ei, inh kư̆m oei adrin mơ̆n.” (II Timôthê 1:8)
Nơ̆r jet tơchĕng pơwao:
– ‘Bok Pôl tơ’blŏk kơ Timôthê bơngai pơm ‘bok bơtho oei ‘lơ̆p athei pơm tơdrong kiơ păng ‘nĕ kơ pơm tơdrong kiơ?
– Đơ̆ng tơdrong kiơ na ‘bok Pôl athei sư lăm tơdrong noh?
– Tơdrong kiơ pơm kơ lu bơ̆n đei tơdrong mơlâu ưh kơ pơm kơdranh tơdrong Kră Yang ăn kơ bơngai nai?
Đơ̆ng rŏng kơ đei pơih nơ̆r pơma wă kơ đei tơdrong tơguăt lăm tơdrong juăt hăm bơngai mă đêl sư krao khan sơng iŏk lăm tơdrong lui, ‘bok Pôl đei nơ̆r tơ’blŏk, tơdrong noh jơ̆ tơm kơ lăm chăl 1 hăm ‘bar nơ̆r “athei” păng bar ‘nơ̆r “’nĕ”: “Athei lăng tơdrong đơ̆ng ‘Bok Kei-Dei song ăn” păng “athei gơnang kơ tơdrong mơsêh đơ̆ng ‘Bok Kei-Dei na chu pơmat yua kơ Tơdrong ‘Nao Lơ̆ng”; “’nĕ kơ mơlâu lăm tơdrong pơm kơdranh” păng “’nĕ kơ yua kơ inh oei lăm hnam bơnă na pơm kơ ih mơlâu” (trong 6-8).
Đơ̆ng lăm dôm nơ̆r âu, hăm lăm Sơ̆p hla bơar I Timôthê hơdrol ‘noh, lu bơ̆n đei ‘bôh mă khan bơngai mă đei jang bơih lăm tơdrong jang ră, mă lei Timôthê đei tơdrong mơlâu kơplah đei pơm kơdranh Tơdrong ‘Nao ‘Lơ̆ng păng đei tơdrong pơmat. Tơdrong sư mơlâu yua kơ sư ưh kơ đei tơdrong pơ̆n nuih, dah mă yua kơ sư oei ‘lơ̆p dah mă yua kơ ‘bok Pôl oei lăm hnam bơnă. Yua kơ lu bơngai mă ưh kơ lui đei tơdrong tơchĕng yua kơ lơ liơ Kră Yang đei tơdrong mơsêh mơyang mălei lê̆ kơ đĭch đam sư oei lăm hnam bơnă… lu bơ̆n ưh kơ băt. Mă lei bơ̆n băt kơ tơdrong ưh kơ pơ̆n nuih, đei tơdrong mơlâu, hli kơ plah bơ̆n ră roi anăn Kră Yang, Yang Bơhngol ‘Lơ̆ng ăn kơ bơ̆n đei jơ-hngơ̆m nuih pran, đei tơdrong ‘mêm păng hơđơ̆ng (trong 7). Păng hơnă ăn kơ tơdrong pran noh jơ̆ đơ̆ng Kră Yang ĐEI pơm ăn kơ bơ̆n bơih. Kră Yang dŏng pơklaih bơ̆n, đei krao bơ̆n hăm tơdrong ‘mêm Sư, ưh kơ sĭ yua đơ̆ng bơ̆n jang pơm ăn kơ Sư tơdrong kiơ (trong 9); păng jơ-hngơ̆m bơ̆n đei đon lui băt tơpă kơ Kră Yang bơ̆n noh thoi yơ (trong 12). Tơdrong gơnang kơ Kră Yang păng dôm tơdrong jang mă Kră Yang đei pơm, ưh kơ trŏ gơnang kơ kơdih kâu dah gơnang kơ bơngai nai, mă lu sư bơngai thoi yơ, tơgŭm kơ Pôl “huei kơ mơlâu”, mă khan sư oei lăm hnam bơnă pơmat tat ră (trong 12).
Dang ei lơ bơngai mơlâu kơ tơdrong ră roi Tơdrong ‘Nao ‘Lơ̆ng yua kơ kơdih akâu sư đei tơdrong tơ’bơ̆p hơnat hơnot, dah mă đei đe pơm kơ nê̆ kơ bơngai lui nai. Lu bơ̆n ưh kơ ră roi Tơdrong ‘Nao ‘Lơ̆ng gah kơdih akâu bơ̆n, dah tơdrong lui bơ̆n dah mă bơ̆n đei tơchĕng kơ bơ̆n ưh kơ thoi bơngai nai. Wă kơ pơm kơdranh pran, lu bơ̆n kăl kơ băt bơ̆n jơ̆ bơngai roi lăi đêl dôm tơdrong ‘Bok Kei-Dei đei pơm lă chăl arih bơ̆n. Mă khan bơ̆n thoi yơ, mă khan bơngai mă mơ̆ng bơ̆n ră roi thoi yơ, Kră Yang gơh dŏng bơngai bu mă đei lui gơnang kơ Sư. Athei ngơk lăng tơ Kră Yang păng dôm tơdrong Kră Yang đei pơm lăm chă arih bơ̆n wă kơ bơ̆n huei kơ mơlâu kơplah bơ̆n pơm kơdranh kơ Kră Yang.
Ơ Kră Yang ‘Bă ‘Lơ̆ng Rơgoh, tơdah inh lăng tơ kơdih akâu dah lăng bơngai nai lei pơm ăn kơ inh đei tơdrong khan rŏ kơ lăng huei mơ̆n dah mă mơlâu, mă lei lăng tơ Kră Yang păng dôm tơdrong mă đêl Ih đei pơm ăn lăm chăl arih inh, tơgŭm inh dơ̆ng kơjăp wă pơm kơdranh kơ Tơdrong ‘Nao ‘Lơ̆ng. Đơ̆ng jơ âu, inh gô pơ̆n nuih ră roi anăn Ih kơ lơ bơngai. Yua anăn Kră Yang Yêsu Krist, Amen.
Lăm hnam trưng pơhrăm, lăm anih bơ̆n jang, lăm rông ‘bôt bơ̆n arih sa đe nai hăm băt kơ bơ̆n jơ̆ minh ‘nu bơngai lui kơ Kră Yang ưh? Yua kơ kiơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Sachari 14
Kênh Youtube BHKTHN:
