Klei Aê Diê Blŭ: Êphêsô 4:32
Êlan kliăng: “Brei diih ngă jăk hdơ̆ng diih pô, bŏ hŏng klei thâo pap, bi pap brei hdơ̆ng diih, msĕ si Aê Diê pap brei leh kơ diih hlăm Krist.” (Êphêsô 4:32)
Klei êmuh ksiêm mĭn: Si mblang klei ngă jăk, thâo pap leh anăn bi pap brei? Ya ngă phung đăo kơ Krist brei dôk hdĭp kpă ênô leh anăn thâo khăp hlăm gŏ sang? Si drei ngă čiăng bi mlih klei dôk dơ̆ng ƀơ̆ng huă hlăm gŏ sang drei?
Klei hdĭp gŏ sang jing anôk lông dlăng leh anăn bi êdah klei đăo drei sĭt klă hĭn. Êphêsô 4:32 brei sa klei mtă amâo dleh ôh, ƀiădah êlam čiăng bi mjing knhuah hdĭp phung đăo kơ Krist: ngă jăk, thâo pap leh anăn bi pap brei. Anei yơh jing klei bi knăl kơ sa klei hdĭp mâo klei kpă ênô mbĭt hŏng klei khăp hlăm gŏ sang.
Tal sa, hdĭp kpă ênô bi êdah hŏng klei ngă jăk leh anăn thâo pap. Hdĭp kpă ênô amâo knŏng ñĕ đuĕ kơ klei soh ƀiădah wăt khăp čiăng ngă klei djŏ ti anăp Aê Diê. Pô ksiêm hriăm klei đăo Jones Spence mblang klă dŭm boh blŭ: “Ngă jăk” jing klei jăk yâo, khăp hơiêng hlăm knuih hdĭp, mkhư̆ jih klei ngă khăng, bi mđĭ jih jang klei êdu êun leh anăn klei jăk siam; klei ngă khuăt jăk leh anăn dôk dơ̆ng ƀơ̆ng huă bŏ hŏng klei pap. Bi klei “thâo pap” bi êdah sa klei bi thâo săng brei mdê hjăn, amâo ngă khăng đei hŏng klei soh mnuih mkăn ôh, kyuadah drei pô ăt mâo klei soh msĕ mơh. Hlăm gŏ sang, klei kpă ênô bi êdah hlăm jih jang mta bruă klei hdĭp yang đar: knuih drei wĭt ngă tơdah tuôm hŏng klei dleh, knhuah blŭ tơdah mâo klei amâo bi djŏ, thâo mđing uêñ kơ klei kƀah čiăng, kơ ai tiê phung mnuih hlăm gŏ sang; jih mta klei ngă anei sĭt nik jing klei lui hĕ jih klei dôk dơ̆ng ƀơ̆ng huă jhat, ktư̆ juă ti krah ung mô̆, hŏng phung anak.
Tal dua, hdĭp thâo khăp bi êdah hŏng klei thâo bi pap brei hlăm gŏ sang. Klei bi êdah klă hĭn hlăm klei bi pap brei. Phŭn boh blŭ “bi pap brei” tinei djŏ mbĭt hŏng boh blŭ “klei pap” Khua ƀĭng kna Y-Pôl yua čiăng mblang kơ mnơ̆ng brei klei bi mtlaih mơ̆ng Aê Diê hlăm Yang Krist (Êphêsô 2:5, 7-8). Hlăm klei bi mguôp jĕ giăm hlăm gŏ sang, klei bi êka ai tiê jing klei dleh tlaih, ƀiădah amâo dưi mâo klei ăl phĭ đuôm ai ôh. Bi pap brei jing phưi lui hĕ jih klei ăl ngêñ leh anăn ruah čiăng brei klei pap. Bi pap brei bi êdah klei pap brei drei mă tŭ leh mơ̆ng Yang Krist. Tơdah bi pap brei, drei bi rai hĕ klei dôk wĭr wĭr hlăm klei ăl ngêñ ƀiădah lŏ bi mrâo jih jang klei bi mguôp.
Phung đăo kơ Krist hdĭp kpă ênô leh anăn thâo khăp kyuadah mă tŭ leh klei pap leh anăn klei pap brei mơ̆ng Khua Yang Yêsu Krist, Pô săn asei mlei čiăng bi tui klei soh drei. Tơdah amâo pap brei leh anăn amâo ngă jăk hŏng mnuih mkăn leh anăn hlăm gŏ sang, drei dôk hdĭp soh leh hŏng klei khăp Khua Yang.
Klei kñăm kơ gŏ sang brei jing Yang Krist: “Msĕ si Aê Diê pap brei leh kơ diih hlăm Krist”. Tơdah brei Khua Yang jing phŭn, gŏ sang srăng jing anôk bŏ hŏng klei kpă ênô, klei khăp, klei êđăp ênang leh anăn jing klei hưn bi sĭt jăk kơ Khua Yang. Ksiêm mĭn bĕ kơ klei pap Yang Krist brei leh kơ drei, klei anăn bi mlih klei drei dôk dơ̆ng ƀơ̆ng huă hŏng gŏ sang drei.
Ya mta klei bi kgăn drei pap brei kơ mnuih hlăm gŏ sang drei?
Wah lač: Ơ Khua Yang, bi mni kơ Khua Yang kơ klei pap leh anăn klei pap brei Khua Yang brei kơ kâo. Akâo Khua Yang bi hriăm kâo hdĭp ngă jăk, thâo pap leh anăn bi pap brei hlăm gŏ sang, msĕ si Ih pap brei leh kơ kâo hlăm Yang Krist. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
