Yausuas 6:1-5
Nqe cim:
“Txawm yog kuv raug kev txomnyem los tseem muaj koj txojlus nplig kuv siab, rau qhov koj tej lus cog tseg ua rau kuv muaj sia nyob” (Ntawv Nkauj 119:50)
Lus nug xav:
– Lub nroog Yelikaus ruaj khov npaum li cas?
– Vajtswv qhia Yausuas thiab Nws haivneeg npaj li cas mus txeeb lub nroog Yelikaus?
– Peb yuav tsum ua li cas kom kovyeej pluav rog sab ntsujplig?
Cov neeg hauv lub nroog Yelikaus kaw tej roojvag ruaj khov thiab zov nruj heev, tsis pub leejtwg tawm lossis nkag mus, vim lawv ntshai haivneeg Yixalayees heev. Raws li cov neeg uas khawb tshawb nrhiav tej qubtxeeg qubteg pom tus ntsa yeej lub nroog Yelikaus ruaj khov heev thiab muaj ntau txheej. Hauv qab kawg yog ib txheej ntsa laj kab av nplaum, txheej txuas ntxiv yog ib txheej ntsa pob zeb siab li 4 txog 5 tshim. Saum tus ntsa pob zeb ntawd tseem muaj dua ib txheej ntsa av thwvcib tuab li 2 tshim, siab li 6 txog 8 tshim. Ob txheej ntsa yeej no koom ua ke siab kwv yees li 10 txog 12 tshim. Sab saum kawg mus rau sab hauv tseem muaj ib txheej tim 3 uas yog muab av thwvcib puab. Yog saib raws li tibneeg lub tswv yim, ces haivneeg Yixalayees yeej tsis muaj peevxwm hla tau dhau peb txheej phab ntsa uas ruaj khov no.
Yausuas thiab cov pejxeem sawvdaws mloog Vajtswv tej lus, npaj kom tsimnyog. Los ntawm siab xav, tsis pub lawv qaug zog thiab ntshai, tiamsis yuav tsum paub hais tias Vajtswv twb pub txoj kev kovyeej rau lawv lawm. Vajtswv hais tias Nws twb muab vajntxwv thiab cov tubrog uas muaj zog hauv lub nroog no cob rau hauv Yausuas txhais tes lawm. Los ntawm tes haujlwm, Vajtswv samhwm kom txhua tus tubrog yuavtsum taug kev puagncig lub nroog ib hnub ib zaug hauv rau hnub. Xya leej povthawj yuav mus ua ntej lub Phijxab, ke mus ke tshuab raj tshuab xyu nrov, cov raj no muab kub tsiaj ua tsis yog muab hlau ua. Cov raj no qhia hais tias Vajtswv nyob nrog Nws haiv neeg (Khiavdim 19:16) thiab kev pehawm Vajtswv (Levis Kevcai 25:9). Hnub tim xya, lawv taug kev ncig lub nroog xya zaus, ces xya tus povthawj txawm tshuab raj tshuab xyu ua ib suab nrov ntev loo, thaum cov Yixalyees hnov lub suab raj nrov lawv yuavtsum qw nrov nrov. Vajtswv coglus hais tias tus ntsa yeej yuav pob zuav pes zog, cov pejxeem yuav nce mus thiab nkag mus rau hauv lub nroog.
Yausuas thiab cov pejxeem txhua tus yeej tsis ntshai thiab tsis thim rov thaum ntsib teebmeem tiamsis lawv mloog Vajtswv tej lus txhawb lawv thiab ua raws. Cov ntseeg kuj yog Vajtswv cov tubrog thiab peb yuavtsum ua rog tawmtsam lub ntiajteb, sab nqaij tawv thiab dab Ntxwgnyoog (Efexus 2:1-3). Peb lub zog no koom ua ke tawmtsam peb, ib yam li peb txheej ntsa yeej ntawm lub nroog Yelikaus. Peb tsis txhob ntsia qhov siab thiab ruaj khov ntawm tus ntsa yeej ces txhawj ntshai thiab thim rov qab. Thaum muaj kev txhaum, tej cwjpwm phem, kev xyaum tsis zoo, kev ua xyem xyav, lossis lwm yam teebmeem hauv peb lub neej zoo li tej ntsa yeej uas khwv hla dhau, thawj yam peb yuavtsum ua yog mloog Vajtswv lub suab los ntawm Nws Txojlus thiab thov Vajtswv kom Nws coj peb kev. Vajtswv twb coglus tseg hais tias Nws yuav pub txoj kev kovyeej rau peb (2 Kevcai 20:4). Peb yuavtsum taug kev mus raws txoj kev ntseeg, tsis yog mus raws li qhovmuag pom. Yog li ntawd, peb yuavtsum nrhiav Vajtswv txhua hnub los ntawm kev nyeem thiab kawm Vajtswv Txojlus kom peb paub thiab hnov Nws tej lus cog tseg, kom tau txais kev txhawb zog, kev qhia, thiab kev kovyeej.
Thov Vajtswv,
Tus Tswv, thov pab kom nyuam yaus tsis txhob ntshai lossis qaug zog thaum nyuam yaus ntsib tej kev nyuaj, vim nyuam yaus ntseeg hais tias koj tabtom tawmtsam rau nyuam yaus. Thov qhib nyuam yaus lub qhovmuag thiab nyuam yaus lub pobntseg kom nyuam yaus paub tej lus uas koj tabtom hais rau nyuam yaus txog tej teebmeem uas nyuam yaus ntsib los ntawm Koj Txojlus qhia. Nyuam yaus tuav Tswv Yexus Khetos lub npe thov, Amees.
Peb nrhiav Vajtswv txhua hnub los ntawm txoj haukev twg?
Nyeem Vajluskub hauv peb lub xyoos: Xefaniyas 3
Kênh Youtube BHKTHN:
