Jôsuê 5:13-15
“Jôsuê drap tơ teh kŭp kơ̆l kơkuh: Jet Kră Yang athei đĭch đam Ih ‘nâu pơm kiơ?” (Jôsuê 5:14b)
Nơ̆r jet tơchĕng pơwao:
– Lu nơ̆r pơma tơl đơ̆ng ‘bok Jôsuê păng đơ̆ng lu linh Kră Yang đei tơbăt ăn Kơ Jôsuê băt tơdrong kiơ?
– Jơhngơ̆m ‘bok Jôsuê đei tơplih lơliơ?
– Lu bơ̆n kăl kơ pơm kiơ lăm tơdrong Kră Yang athei ră roi Tơdrong ‘Nao ‘Lơ̆ng Sư?
Kơplah oei dơ̆ng jê̆ pơlei Jêrikô wă chop lăng, rŏ lăng lăm jơhngơ̆m hiơ̆k tơtăm yua kơ wă pơgơ̆r kon pơlei Isơrael năm blah pơlei tih ‘nâu, ‘bok Jôsuê đei ‘bôh minh ‘nu linh chĕp tak đao dơ̆ng tơklă tơ anăp sư. Mơn kơ ‘bôh hli dơ̆ng ‘bơ̆t anăp bơngai hlĭch toh đao dơ̆ng wă năm tơblah, ‘bok Jôsuê năm jê̆ păng jet bơngai ‘noh hăm trŏ kơ khul hơdai hăm Isơrael lei mă bơngai ayăt. Bơngai ‘noh sư tơl ưh kơ trŏ kơ khul hơyơ ôh mălei dang ei sư wă pơm “yŏng linh Kră Yang ‘Bok Kei-Dei”. Tơpă, yua kơ sư ưh kơ trŏ kơ bơngai lăm teh đak na ưh kơ đei khul ayơ. Sư năm ưh kơ trŏ kơ wă năm tơblah kiơ̆ kơ ‘bok Jôsuê păng kiơ̆ kơ yŏng linh pơgơ̆r pơlei Jêrikô, mălei sư truh wă pơm pơkeh kiơ̆ thoi Kră Yang. Tơdrong noh tơbăt kơ ‘bok Jôsuê hlôh thoi âu tơdrong tơblah iŏk pơlei Jêrikô wă truh tơ anăp ưh kơ trŏ đơ̆ng bơngai yŏng pơgơ̆r sư mălei đĭ đăng tôm tơdrong đơ̆ng Kră Yang Tơ’ngla pơgơ̆r păng tơdrong kĕ jei noh đơ̆ng Kră Yang.
Adrol sơ̆, Kră Yang đei tơbăt kơ ‘bok Môis băt kon pơlei Isơrael gô yak năm hlôi kơ krong Jôrđăn wă năm tơblah lu pơlei tih păng pran hloh kơ sư. Kră Yang gô năm adrol kơ sư, pơrăm păng blah lu pơlei nâu jei sư. Lu sư gô blah iŏk dêh char ‘noh ưh kơ trŏ yua kơ tơdrong ‘lơ̆ng lu sư, mălei yua kơ tơdrong kơnê̆ lu kon pơlei ‘noh wă pơm ‘blep trŏ kơ nơ̆r khan lê̆ adrol hăm lu ‘bok yă lu sư (Bơtho Khôi Juăt 9:1-5). Jơ ‘nâu, adrol kơ wă năm blah pơlei Jêrikô, ‘bok Jôsuê đei nơ̆r pơma pơlung đơ̆ng Kră Yang ăn kơ kon pơlei Isơrael băt kiơ̆ kơ Kră Yang pơkă gô ăn kĕ jei. Sư kư̆m tơ’blŏk ăn Kră Yang bơih Tơ’ngla yŏng pơgơ̆r, sư ‘noh bơngai bơ̆jang kiơ̆ kơ Kră Yang wơh đĕch, sư bơngai linh Kră Yang. Kơplah sư băt kơ yŏng linh ‘nâu đơ̆ng Kră Yang ‘Bok Kei-Dei, ‘bok Jôsuê đơ̆ng minh ‘nu bơngai pơma apinh, ưh kơ gan ngeh, mălei jing minh ‘nu bơngai chu yom Kră Yang tôm tơdrong. Sư kơkuh drap tơ teh păng pơma khan: “Kră Yang athei đĭch đam ‘nâu pơm kiơ?”
Rim ‘nu lu bơ̆n Kră Yang kư̆m jao tơdrong jang kơ lu bơ̆n phara dih băl, mălei, đei minh tơdrong Kră Yang athei bơ̆n pơm lei lăi ‘noh ră roi Tơdrong ‘Nao ‘Lơ̆ng wă kơ blah iŏk minh anih teh, hnam dơnŏ dah mă kơdih adrô̆ tơdrong kiơ noh ăn kơ Kră Yang, hŭt lê̆ tơdrong kơkuh kơ rup yang đơ̆ng lu anih teh păng jơhngơ̆m kơnê̆ lu bơngai ‘noh. Apinh ‘nĕ kơ hli tơrơ kơ tơdrong jang tih kơjung hloh, mălei athei băt tơdrong tơblah ‘nâu gah Kră Yang. Tơdrong jang lu bơ̆n pŭ iŏk ‘noh ưh kơ trŏ kơ hli tơrơ dah mă hơmĕng kơ jơhngơ̆m bơ̆n kơdih mălei athei chu yom Kră Yang păng pơma khan kơ Kră Yang “Kră Yang athei đĭch đam Ih ‘nâu pơm kiơ?” đơ̆ng noh iung yak gô mơ̆ng kơ Kră Yang wơh jao.
Ơ Kră Yang, apinh Ih hŭt lê̆ đĭ tơdrong hiơ̆k bơngơ̆t, hli krê kơplah bơ̆n bơ̆jang tơdrong jang tih dêh ayơ. Apinh Kră Yang ăn kơ inh băt tơdrong tơblah ‘nâu gah Ih păng apinh Ih ăn kơ inh athei chu yom Ih lăm tôm tơdrong. Krao khan yua anăn Kră Yang Yêsu Krist, Amen.
Lu bơ̆n tam wă đei iŏk tơdrong jang tih anat ayơ đơ̆ng Kră Yang? Bơ̆n mơn kơ ‘bôh bơ̆n athei đei jơhngơ̆m thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Sôphôni 2
Kênh Youtube BHKTHN:
