Klei Aê Diê Blŭ: Y-Yôsuê 5:13-15
Êlan kliăng: “Y-Yôsuê kŭp ƀô̆ ti lăn kkuh mpŭ, leh anăn lač kơ gơ̆, “Ya klei khua kâo mtă kơ dĭng buăl ih?” (Y-Yôsuê 5:14b)
Klei Êmuh ksiêm mĭn: Ya klei Y-Yôsuê thâo mơ̆ng dŭm klei bi blŭ hrăm plah wah Y-Yôsuê leh anăn khua kơ phung kahan Yêhôwa? Si ngă knuih Y-Yôsuê bi mlih? Ya klei brei drei ngă ti anăp asăp mtrŭn hâo hưn Klei Mrâo Mrang Jăk Aê Diê?
Hlăk êjai dôk giăm ƀuôn Yêrikô čiăng ksiêm dlăng, năng ai hlăm ai tiê rŭng răng kyua dơ̆ng gĭt gai phung ƀuôn sang Israel plah mă ƀuôn prŏng anei, Y-Yôsuê ƀuh sa čô êkei dôk dơ̆ng ti anăp ñu djă đao gưm hliê. Ƀuh đing ti anăp sa čô mnuih amâo thâo kral ôh ksuê̆ đao gưm hlăm klei mprăp bi blah, Y-Yôsuê nao giăm leh anăn êmuh pô anăn sa tĭng hŏng Israel amâodah tĭng kơ phung roh. Pô wĭt lač jing amâo jing hlei tĭng ôh ƀiădah ară anei hriê ngă “khua kơ phung kahan Yêhôwa”. Klă sĭt, kyua amâo djŏ mnuih lăn ala anăn amâo jing hlei tĭng ôh. Gơ̆ hriê amâo djŏ čiăng bi blah hlue si asăp Y-Yôsuê amâodah khua kahan ƀuôn prŏng Yêrikô ôh, ƀiădah hriê čiăng ngă klei Aê Diê čiăng. Klei anăn brei kơ Y-Yôsuê thâo săng klei bi blah plah mă ƀuôn Yêrikô dơ̆ng truh amâo djŏ hlăm klei ñu gĭt gai ôh ƀiădah ti gŭ klei gĭt gai ti dlông hĭn mơ̆ng Aê Diê leh anăn klei dưi srăng jing dŏ Ñu.
Hlăk đưm, Aê Diê brei kơ Y-Môis thâo phung ƀuôn sang Israel srăng găn êa krông Yurdan čiăng plah mă dŭm djuê ana prŏng leh anăn ktang hĭn kơ diñu. Ñu srăng nao êlâo kơ digơ̆, bi mdjiê leh anăn mdlưh dŭm djuê ana anei ti anăp diñu. Diñu srăng mâo mă krĭng lăn dŭm djuê ana anăn amâo djŏ kyua klei kpă ênô diñu ôh, ƀiădah kyua klei măk ƀai phung ƀuôn sang anei bi sĭt leh klei Aê Diê ƀuăn hŏng phung aê diñu (Klei Mtô Mñă Klei Bhiăn 9:1-5). Ară anei, êlâo kơ nao plah mă ƀuôn Yêrikô, Y-Yôsuê čiăng mâo klei Aê Diê mđĭ ai jing phung ƀuôn sang Israel srăng mâo brei klei dưi hlue si klei Ñu ƀuăn. Ñu ăt čiăng mâo klei mñă Aê Diê jing pô gĭt gai, bi ñu jing sa čô dĭng buăl, sa čô kahan Aê Diê. Tơdah thâo khua kahan anei hriê mơ̆ng Aê Diê, Y-Yôsuê mơ̆ng sa čô mnuih mâo asăp ruăt êmuh, đing đăo, bi mlih jing đup gưt kluôm dhuôm. Ñu kŭp ƀô̆ ti lăn kkuh mpŭ, leh anăn lač kơ gơ̆, “Ya klei khua kâo mtă kơ dĭng buăl ih?”
Grăp čô drei ăt mâo Aê Diê jao kơ dŭm bruă mdê mdê, khădah snăn, mâo sa asăp mtrŭn mbĭt brei ngă jing hiu hưn Klei Mrâo Mrang Jăk čiăng dưi mâo mă sa krĭng lăn, gŏ sang amâodah hlei pô kơ Aê Diê, lăm lui klei kkuh kơ rup yang leh anăn klei măk ƀai kbiă mơ̆ng krĭng lăn leh anăn ai tiê phung mnuih anăn. Đăm huĭ hyưt ôh ti anăp bruă klam prŏng đei, ƀiădah brei hdơr klei bi blah jing dŏ Aê Diê. Bruă klam drei amâo djŏ jing huĭ hyưt amâodah knang kơ ai ktang pô ôh ƀiădah brei đup gưt ti jơ̆ng Aê Diê leh anăn lač hŏng Ñu snei “Ya klei khua kâo mtă kơ dĭng buăl ih?” leh anăn kgŭ dơ̆ng leh anăn êbat hlue si klei Ñu tiŏ nao.
Drei dôk ngă amâodah dơ̆ng mă ya bruă klam dleh dlan mơ̆ng Aê Diê? Drei ƀuh si knuih brei pô mâo?
Wah lač: Ơ Khua Yang, akâo kơ Ih mă hĕ jih klei kâo rŭng răng, huĭ hyưt tơdah ngă ya bruă klam prŏng prĭn. Akâo kơ Ih đru kâo thâo klei bi blah jing dŏ Ih leh anăn knŏng brei kâo thâo đup gưt leh anăn gưt asăp Ih kluôm dhuôm đuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sôphôni 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
