I Kôrintô 7:12-16
“Mă klo sư ưh kơ lui, ‘Bok Kei-Dei lăng bre klo kăn noh kư̆m ‘lơ̆ng yua kơ akăn sư lui. Kư̆m lei-lăi, klo sư lui mă akăn sư ưh, ‘Bok Kei-Dei lăng bre klo kăn noh kư̆m ‘lơ̆ng yua kơ klo sư lui boih.” (I Kôrintô 7:14a)
Nơ̆r jet tơchĕng pơwao:
– ‘Bok Pôl bơtho kơ bơngai đei akăn dah klo tam mă lui kơ Kră Yang thoi yơ?
– Sư tơlĕch ‘bar tơdrong tơ’bôh ayơ kơ tơdrong bre sư arih hơdai?
– Bơ̆n kăl kơ pơm kiơ wă kơ ŭnh om tơ’bôh tơdrong ‘mêm Kră Yang?
Khul Bơngai Lui Kôrintô sơ̆ kư̆m thoi dang ei ling lang đei lơ bơngai lui kơ Kră Yang đơ̆ng rŏng kơ pơjing hnam dơnŏ, kơplah mă klo dah akăn lu sư tam mă lui sơng iŏk Kră Yang. Thoi noh ‘bok Pôl tơlĕch tơdrong bơtho tơ’bôh kơ tơdrong ‘nâu, ưh kơ sĭ bơtho kơ lu bơngai mă lui kơ Kră Yang bơih wă pơjing tơdrong ŭnh om hăm bơngai tam mă lui.
‘Bok Pôl khan dah bơngai lui đei akăn dah klo tam mă lui kơ Kră Yang, lei na tơdrong arih hơdai khŏm khŏm hăm akăn dah klo noh dah ưh kơ mơ̆ng kơ đơ̆ng bơngai klo dah akăn tam mă lui. Dah bơngai noh drơ̆ng wă arih hơdai bơ̆n “’nĕ kơ achăng tŭk sư” (trong 12-13). Tơplơ̆ dơ̆ng, dah bơngai noh ‘maih wă achăng lei “lê̆ sư achăng kư̆m bưh”, bơngai mă lui kơ Kră Yang ưh kơ pơgŏ ôh (trong 15). Kơplah chih dôm tơdrong âu, ‘bok Pôl chih pơ’lơ̆ng pơtơm đơ̆ng nơ̆r “ưh kơ sĭ đơ̆ng Kră Yang, noh đơ̆ng inh kơdih bơtho tơ’bôh” tơ’bôh ‘nâu nơ̆r bơtho tơ’bôh yua iŏk hloi lăm tơdrong arih Khul Bơngai lui oei tơ’bơ̆p tơdrong ‘nâu. Đei lu bơngai ưh kơ lui kơ Kră Yang oei ưh kơ wă achăng mălei lu sư pơm kơ tơdrong arih bơngai akăn dah klo bơ̆n mă ‘nao lui pơm pơmat sư hăm teh tôn, nơ̆r pơma dah teh pơjĭ ưh kơ hmach kiơ hloi, na pơm pơyô kư̆ kă hloi tăm. Kră Yang areh kơ tơdrong ŭnh om achăng băl păng sư kư̆m areh kơ tơdrong ŭnh om tôn teh băl pơm thoi noh kư̆m nhen thoi achăng băl mơ̆n (Malachi 2:16).
‘Bar tơdrong mă ‘bok Pôl pơma kơ tơdrong arih hơdai khŏm khŏm. Mălei, ‘noh mă klo sư ưh kơ lui, ‘Bok Kei-Dei lăng bre klo kăn noh kư̆m ‘lơ̆ng yua kơ akăn sư lui, kư̆m lei lăi, klo sư lui mă akăn sư ưh, ‘Bok Kei-Dei lăng bre klo kăn kư̆m ‘lơ̆ng yua kơ klo sư lui bơih (trong 14a), wă khan klo kăn gô lui kơ Kră Yang đơ̆ng ‘bôh tơdrong arih gơh tơplih păng nơ̆r pơm kơdranh đơ̆ng klo dah akăn mă lui noh, păng tơdrong gĭt kăl noh lu kon hơ’lơ̆p sư gô băt kơ Kră Yang (trong 14b). Trong 16 kư̆m pơma pơthim lăm tơdrong ‘nâu, mălei đei pơma pơlơ̆k pơle nơ̆r “lơ liơ iĕm băt” ‘bar ‘măng tơ’bôh thoi âu ‘nâu ưh kơ sĭ minh nơ̆r pơkă. Mă khan lei ră, đei lơ bơngai klo dah akăn lui kơ Kră Yang bơih tơ’bôh tơdrong arih tơplih ‘nao lăm bơngai klo dah akăn mă ‘nao lui. Tơdrong mă ‘bar, tơdrong bơngai tam mă lui wă arih hơdai khŏm khŏm dah ưh kơ đei ‘bơm kơ tơdrong ‘Bok Kei-Dei râu krao ‘măn kơ bơngai lui kơ Kră Yang: “Mă-lei klo dah akăn mă ưh kơ lui wă achăng klo dah akăn sư mă lui, lê̆ sư achăng kư̆m bưh ưh kơ kơ̆m ôh. ‘Bok Kei-Dei krao bơ̆n lui kơ Sư, Sư wă kơ bơ̆n pơma pơlung băl mă ‘lơ̆ng, ưh kơ sĭ Sư wă kơ bơ̆n hang nuih ôh.” (trong 15). Hiôk hian hơđơ̆ng kơ bơ̆n, păng hơđơ̆ng, hiôk hơiă kơ bơngai klo dah akăn bơ̆n tam mă lui kơ Kră Yang hai mơ̆n.
Mă khan ŭnh om bơ̆n thoi yơ hĭ, tơdrong gĭt kăl noh athei đĭ jơhngơ̆m krao khan apinh Kră Yang chông anhăk, pơchrang wă kơ tơdrong arih bơ̆n ling lang pơm tơ’bôh tơdrong ‘mêm Kră Yang.
Ơ Kră Yang, inh bơnê kơ ih đei hiơ̆k kơ lu bơngai klo dah akăn tam mă lui păng đei dôm tơdrong bơtho tơ’bôh mă hơđăl. Apinh Kră Yang pơgơ̆r tơdrong ŭnh om inh wă kơ hnam dơnŏ inh ling lang yak năm lăm tơdrong Kră Yang tơ’bôh. Krao khan yua anăn Kră Yang Yêsu Krist, Amen.
Bơ̆n hăm dan nơ̆r Kră Yang pơm hơnă tơm kơplah wă pơm tơdrong kiơ lăm tơdrong ŭnh om bơ̆n ưh?
Đŏk Sơ̆p Hla bơar ‘Bok Kei-Dei lămg pêng sơnăm: Sôphôni 1
Kênh Youtube BHKTHN:
