Blư̆ng a 12:4-9
“Kơplah noh lu kon pơlei Kanaan oei oei tơ lăm dêh char noh.” (Blŭng a 12:6b)
Nơ̆r jet tơchĕng pơwao:
– ‘Bok Abram đei pơm kiơ̆ nơ̆r Kră Yang thoi yơ?
– Tơdrong kiơ truh kơplah sư truh tơ dêh Kanaan?
– KrăYang đei pơm kiơ kơ sư păng đơ̆ng tơdrong ‘noh ba ăn kơ sư thoi yơ?
– ‘Bai pơhrăm ‘nâu pơchŭt kơ lu bơ̆n thoi yơ kơplah tơ’bơ̆p hăm tơdrong pơlong mưh bơ̆n mơ̆ng nơ̆r Kră Yang?
KrăYang krao ‘bok Abram lĕch đơ̆ng dêh sư năm tơ anih ‘nao, mă khan nơ̆r krao noh wă khan athei lĕch đơ̆ng anih hơđơ̆ng păng tơ anăp gô tơ’bơ̆p tơdrong ưh kơ hơđơ̆ng mălei ‘bok Abram chu kiơ̆: “Đơ̆ng noh Abram năm, kiơ̆ thoi nơ̆r khan tơ’bôh, Lot kư̆m kiơ̆ hơdai sư. Kơplah Abram lĕch đơ̆ng Charan, sư đei tơpơh-jĭt pơđăm sơnăm boih.” (trong 4).
‘Bok Abram chông ba hnam dơnŏ sư năm tơ dêh Kanaan, lu sư “Yak găn dêh char âu” (trong 6), wă khan năm jơ̆p anih, ‘nâu bơih dêh char mă Kră Yang pơkă: “Inh gô tơ’bôh kơ ih”. ‘Nâu bơih anih mă Kră Yang pơkă “Inh gô ăn kơ ih jing minh adrĕch adrŭng tih”. Kơplah đei sơng iŏk nơ̆r Kră Yang pơkă, rŏ lăng ‘bok Abram tơchĕng khan dêh char ‘noh jơ̆ anih sư gô pơjing tơiung minh dêh char ‘nao. Mălei đơ̆ng rŏng kơ băt jơ̆p kơ dêh char ‘noh, ‘bok Abram đei tơ
‘bơ̆p tơdrong truh: “Kơplah ‘noh lu kon pơlei Kanaan oei oei tơ lăm dêh char ‘noh” (trong 6). Wă khan dêh Kanaan oei đei tơ’ngala noh tơdrong chang hơmĕng ‘bok Abram gô năm truh tơ dêh char mă sư wă pơjing, mălei dêh char ‘noh tă đe pơgơ̆r bơih, kơplah sư băt tơdrong ‘nâu băt sư pă đei hơmĕng bơih.
Lăm jơ ‘noh sơ̆, Kră Yang năm tơ sư păng wă pơsĭt ming nơ̆r sư pơkă ăn kơ ‘bok Abram: “Inh gô ăn adrĕch adrŭng ih teh đak âu” (trong 7). Kơplah hnam dơnŏ ‘bok Abram lĕch đơ̆ng charan năm truh tơ Kanaan bơih, lu bơ̆n ưh kơ ‘bôh Kră Yang oei hơdai sư dah ưh. Mălei kơplah tơ’bơ̆p tơdrong anat, dêh char pơkă ưh kơ thoi đơ̆ng nơ̆r pơkă, na jơ ‘noh sư băt kơnăl kơ Kră Yang oei hơdai păng sĭt tơpă noh đơ̆ng Kră Yang. Lĕch đơ̆ng Ahram kơkuhh kơ Kră Yang: “pơdah kơ Abram păng pơkă khan: Inh gô ăn adrĕch adrung ih teh đak âu! Đơ̆ng noh, Abram pơm minh pôm chơnang soi kơ, Kră Yang mă đei pơdah akâu sư kơ Abram.” (Trong 7).
Yak kiơ̆ nơ̆r Kră Yang krao ưh kơ trŏ khan lu bơ̆n gô ‘bôh dôm tơdrong kiơ̆ thoi bơ̆n tơchĕng, lăng ‘bôh nơ̆r Kră Yang pơkă đei truh jơ ‘noh hloi. Phŏ lu bơ̆n lơ tơ’bơ̆p tơdrong truh. Rŏ lăng kơplah chu kiơ̆ nơ̆r Kră Yang wă weh đơ̆ng tơdrong sa pơgơ̆m lăm tơdrong jang sa, lu bơ̆n ưh pă đei jên tơmơ̆t. Kơplah ưh pă sa pơgơ̆m kơplah bơ̆n pơthi, điêm pơthi rai kơ đeh. Kơplah bơ̆n arih kiơ̆ sơ̆p hla bơar nơ̆r Kră Yang đei lu bơngai cheng pơm kơnê̆ kơ bơ̆n, pơhrăm v.v. lăm jơ ‘noh, lu bơ̆n ‘bônh dêh kơ bơ̆l hăl. Mălei sĭt tơpă Kră Yang ưh kơ đei achăng lê̆ lu bơngai tơ năp ôh. Sư gô tơ’bôh oei hơdai na wă kơ lu bơ̆n kơkuh kơ Sư, ư-ang Anăn Kră Yang ling lang oei hơdai bơ̆n.
Ơ Kră Yang, inh bơnê kơ Ih yua kơ Ih oei hơdai inh mă khan inh ‘bôh mơn dah mă ưh. Apinh Ih tơgŭm inh lui gơnang păng chu kiơ̆ Ih krao. Kơplahh tơ’bơ̆p tơdrong truh, apinh Ih pơlung inh păng tơgŭm inh ling lang kơjăp. Apinh đĭ chăl arih inh ling lang kơkuh păng ư-ang Anăn Ih. Krao khan yua Yêsu Krist, Amen.
Lu bơ̆n hăm pơkă tơnăp hăm Kră Yang mă khan oei đei tơ’bơ̆p hăm dôm tơdrong ưh kơ thoi bơ̆n chang hơmĕng kơplah chu nơ̆r Kră Yang dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsơtê 8
Kênh Youtube BHKTHN:
