Chivkeeb 12:4-9
Nqe cim:
“Thaum lub sijhawm ntawd cov neeg Kana-as tseem nyob hauv lub tebchaws ntawd” (Chivkeeb 12:6b)
Lus nug xav:
– Anplas tau teb Vajtswv lub suab hu li cas?
– Muaj xwm dabtsi tshwm thaum Anplas mus txog tebchaws Kana-as?
– Vajtswv tau ua dabtsi rau Anplas, thiab qhov ntawd muaj qabhau li cas?
– Zaj kawm no txhawb peb li cas thaum ntsib txoj kev nyuaj vim mloog Vajtswv lus?
Vajtswv hu Anplas kom tawm hauv nws lub tebchaws, nws haivneeg, thiab nws tsev neeg mus rau ib lub tebchaws tshiab. Txawm hais tias qhov kev hu ntawd txhais hais tias nws yuav tsum tawm hauv qhov chaw uas nyob tso siab mus rau qhov chaw uas nws paub tsis meej, los Anplas yeej mloog Vajtswv lus: “nws txawm tsiv tawm hauv lub nroog Halas raws li tus TSWV tau hais rau nws lawm” (nqe 4).
Anplas coj nws tsev neeg mus txog tebchaws Kana-as. “Anplas taug kev hauv lub tebchaws ntawd” (nqe 6), txhais hais tias lawv mus xyuas txhua qhov chaw hauv lub tebchaws ntawd. Qhov no yog lub tebchaws uas Vajtswv tau coglus hais tias, “Kuv yuav pub koj muaj xeebntxwv coob, thiab lawv yuav ua ib haivneeg tseemceeb”. Thaum Anplas tau txais Vajtswv tej lus cogtseg, tej zaum nws xav hais tias qhov chaw ntawd yuav yog qhov chaw uas nws tsim tsa dua ib lub tebchaws tshiab. Tiamsis tom qab nws mus xyuas thoob plaws lub tebchaws lawm, nws pom ib qho tseeb uas nyuaj kawg: vim “thaum lub sijhawm ntawd cov neeg Kana-as tseem nyob hauv lub tebchaws ntawd” (nqe 6). Qhov no txhais hais tias lub tebchaws ntawd twb muaj tswv lawm. Anplas txoj kev cia siab yog yuav mus txog ib thaj av tshiab thiab tsim tsa dua ib lub tebchaws, tiamsis thaj av ntawd twb yog lwm tus li lawm. Thaum paub li ntawd, paub tseeb hais tias Anplas yuav poob siab heev.
Hauv lub tsamthawj ntawd, Vajtswv tau tshwm rau Anplas thiab lees paub tej uas Nws tau coglus tseg lawm hais tias: “Lub tebchaws no yog lub uas kuv yuav muab pub rau koj cov xeebntxwv nyob” (nqe 7). Thaum Anplas thiab nws tsev neeg taug kev tawm hauv Halas mus rau Kana-as, peb tsis pom Vajluskub hais txog qhov uas Vajtswv tshwm los hais rau Anplas lossis tsis hais. Tiamsis thaum Anplas ntsib kev sim siab thiab pom hais tias tebchaws cog lus tsis zoo li qhov nws xav, ces Vajtswv tau tshwm sim los txhawb nws zog thiab tabpov rau tej coglus tseg lawd. “Ces Anplas thiaj teeb tau ib lub thaj rau ntawm qhov chaw ntawd rau tus TSWV uas tau los tshwm rau nws pom” (nqe 7).
Mus raws Vajtswv txoj kev hu tsis tau txhais hais tias peb yuav pom tej uas raws li peb kev xav lossis pom Vajtswv tej lus cog tseg muaj tseeb tamsim ntawd. Muaj ntau zaus peb yuav ntsib tej xwmtxheej nyuaj thiab poob siab. Tej zaum thaum peb mloog Vajtswv lus, peb tsis kam hais lus dag hauv kev ua lag luam, ces peb yuav sau tsis tau nyiaj raws li kev ntshaw. Thaum peb ua tseeb rau txoj kev ntsuas kev kawm ntawv, ces peb yuav raug feeb qis (điểm thấp). Thaum peb ua neej raws li Vajtswv Txojlus, lwm tus yuav cais peb lossis tsis nyiam peb… Hauv tej xwmtxheej zoo li no, peb yeej yoojyim qaug zog thiab poob siab. Tiamsis paub tseeb hais tias Vajtswv yeej tsis tso cov neeg ua ncajncees rau Nws tseg li. Nws yuav qhia tshwm Nws txoj kev nrog peb nyob, thiab peb yuav pehawm, txhawb nqa Vajtswv tus uas ib ibtxwm nrog peb nyob lub npe.
Thov Vajtswv,
Tus Tswv, nyuam yaus ua Koj tsaug txawm nyuam yaus pom thiab tsis pom Koj los Koj yeej nrog nraim nyuam yaus nyob. Thov pab kom nyuam yaus ntseeg ruaj rau Koj thiab mloog Koj lus, mus raws li Koj txoj kev hu. Txawm nyuam yaus ntsib tej xwmtxheej nyuaj thiab poob siab los, thov Koj nplij nyuam yaus lub siab thiab pab kom nyuam yaus sawv ruaj khov rau ntawm Koj thiab tas nyuam yaus sim neej yuav pehawm thiab txhawb nqa Koj lub npe mus ib txhis. Nyuam yaus tuav Tswv Yexus Khetos lub npe thov, Amees.
Peb puas coglus hais tias txawm peb yuav ntsib kev nyuaj tsis zoo li siab xav los peb yuav ncajncees mloog Vajtswv lus?
Nyeem Vajluskub hauv peb lub xyoos: Exethaws 8
Kênh Youtube BHKTHN:
