Chivkeeb 12:1-3
Nqe cim:
“Kuv yuav foom koob hmoov rau tus uas ua zoo rau koj, Tiamsis kuv yuav foom tsis zoo rau tus uas ua phem rau koj. Thiab kuv yuav foom koob hmoov ntawm koj mus rau txhua haivneeg uas nyob thoob plaws ntiajteb.” (Chivkeeb 12:2)
Lus nug xav:
– Vajtswv hu Anplas ua dabtsi, thiab Nws coglus yuav pub dabtsi rau Anplas?
– Niaj hnub nimno, Vajtswv nqua hu kom peb tso tej yam dabtsi tseg?
Anplas yog xeebntxwv ntawm Xees cajces. Nws yug los hauv ib tsevneeg uas teev tej dab nyob hauv lub nroog Ules, tebchaws Npanpiloos. Nws tau txais ib lo lus hu tshwjxeeb ntawm tus TSWV uas yog Vajtswv tiag hais tias: “Koj cia li tso koj lub tebchaws, koj cov kwvtij neejtsa, thiab koj txiv lub tsev tseg, thiab sawv kev mus rau nram lub tebchaws uas kuv yuav qhia rau koj” (nqe 1). Vajtswv xav kom nws tso lub tebchaws uas nws nyob tseg, tso zejzog uas nws koom nrog tseg, tso nws cajces uas nws ibtxwm nrog nyob tseg, thiab mus rau lub tebchaws uas Vajtswv yuav coj nws mus, tiamsis Vajtswv tsis tau qhia meej hais tias lub tebchaws ntawd nyob qhovtwg. Qhov no yog ib lo lus hu uas muaj kev sim siab kawg, rau qhov lub ntsiab ntawm lo lus hu ntawd yog kom Anplas tso txhua yam uas nws vamkhom tseg los tso siab plhuav rau Vajtswv tib leeg xwb.
Vajtswv coglus rau Anplas hais tias: “Kuv yuav pub koj muaj xeebntxwv coob, thiab lawv yuav ua ib haivneeg tseemceeb. Kuv yuav foom koob hmoov rau koj, kom koj lub koob lub npe nyob nto moo lug, thiab koj yuav ua rau lwm leej lwm tus tau txais koob hmoov” (nqe 2). Thaum uas Anplas twb laus heev lawm tiamsis tseem tsis tau muaj menyuam, ces Vajtswv coglus hais tias Nws yuav ua kom Anplas cajces huamvam coob. Thaum uas Anplas yuav tsum tso txhua yam uas nws muaj tseg, ces Vajtswv coglus hais tias Vajtswv yuav foom koob hmoov rau Anplas. Thaum uas tibneeg thoob ntiajteb tabtom siv zog nrhiav koob meej rau lawv tus kheej, ces Vajtswv coglus hais tias Nws yuav ua kom Anplas muaj koob meej. Anplas mloog raws Vajtswv lub suab hu, tso tej yam uas nws ibtxwm muaj tseg vim Vajtswv. Saib raws sab nraud zoo li yog kev poob, tiamsis qhov tseeb ntawd yog ib txojkev uas muaj puv npo koob hmoov, yog txojkev dhau los ua lub hauvpaus koob hmoov, thiab Vajtswv yuav foom koob hmoov ntawm Anplas “mus rau txhua haivneeg uas nyob thoob plaws ntiajteb.” (nqe 3). Vajtswv xav foom koob hmoov rau Anplas kom dhau ntawm nws, koob hmoov ntawd thiaj mus txog txhua tus thiab txhua haivneeg hauv ntiajteb. Thiab tsis muaj ib yam koob hmoov twg loj dua qhov uas tibneeg tau paub Vajtswv.
Niaj hnub nimno, Vajtswv kuj yuav hu kom peb tso tej yam uas peb ibtxwm ua tseg. Tej zaum vim tej ntawd yog yam uas Vajtswv tsis txaus siab, ces peb yuav tsum tso tseg. Lossis tej zaum muaj tej yam zoo dua uas Vajtswv xav foom pub rau peb. Tiamsis peb tsuas tau Vajtswv tej koob hmoov thaum peb kam mus raws kev ntseeg, tso siab plhuav rau Vajtswv ua tus coj. Vajtswv xav kom peb ntseeg thiab cia siab rau Nws lub homphiaj uas zoo kawg nkaus. Kev tso tej yam uas peb ibtxwm ua tseg yeej tsis yooj yim li, tiamsis yog peb ntseeg thiab ua raws Vajtswv lub suab hu, ces peb tsis yog tsuas tau txais koob hmoov rau tus kheej xwb, tiamsis tseem yuav dhau los ua lub hauvpaus faib koob hmoov mus rau lwm tus thiab.
Thov Vajtswv,
Tus Tswv, Koj paub yam uas zoo tshaj rau nyuam yaus lub neej. Thov Koj ntxiv kev ntseeg thiab kev ua siab loj rau nyuam yaus, kom nyuam yaus kam tso tej yam uas twb khi nyuam yaus cia tseg, thiab mus raws Koj lub suab hu. Thov kom nyuam yaus lub neej niaj hnub pom Koj tej koob hmoov, thiab dhau los ua lub hauvpaus faib tej koob hmoov ntawd rau ntau leej. Nyuam yaus tuav Tswv Yexus Khetos lub npe thov, Amees.
Peb tabtom tau Vajtswv hu tso yam dabtsi tseg kom thiaj mus tau raws li Nws lub homphiaj uas zoo kawg nkaus rau peb lub neej? Peb yuav teb li cas?
Nyeem Vajluskub hauv peb lub xyoos: Exethaws 7
Kênh Youtube BHKTHN:
