Klei Aê Diê Blŭ: Y-Mathiơ 25:14-23
Êlan kliăng: “Khua ñu lač kơ ñu, ‘Jăk leh, Ơ dĭng buăl jăk leh anăn sĭt suôr. Ih dôk sĭt suôr hlăm bruă điêt, kâo srăng brei ih kiă kriê lu. Mŭt bĕ leh anăn mâo klei hơ̆k mơak mbĭt hŏng khua ih” (Y-Mathiơ 25:21, 23)
Klei êmuh ksiêm mĭn: Êlâo đuĕ hiu kbưi, ya dŏ khua jao kơ phung dĭng buăl ñu? Ya ngă pô ƀơ̆ng mnga êma talăng mâo klei mưn msĕ si pô ƀơ̆ng mnga dua talăng mơh. Ya drei srăng ngă čiăng mâo klei Khua Yang bi mni jing dĭng buăl jăk leh anăn sĭt suôr?
Khua Yang Yêsu lŏ yua klei yăl dliê bi hriêng čiăng mtrŭt phung ƀĭng kna Ñu mă bruă hur har nanao êjai dôk guôn hruê Ñu lŏ hriê. Sa čô êkei đuĕ hiu kbưi iêô phung dĭng buăl ñu leh anăn jao talăng kơ digơ̆, sa čô êma talăng, sa čô dua talăng, pô mkăn sa talăng. Ênoh sa talăng jing prŏng snăk, mdư̆m hŏng prăk mlan sa čô mă bruă hŏng jơ̆ng kngan lu thŭn. “Tui si grăp čô thâo yua prăk” kyuanăn mâo hĕ klei mdê ti krah phung dĭng buăl anăn (êlan 15). Amâo mâo ôh pô khua amâo jao talăng ƀiădah khua thâo sơăi hnơ̆ng klei thâo grăp čô kyuanăn ñu amâo jao ôh bruă klam ktrŏ đei êgao hnơ̆ng kơ phung dĭng buăl ñu dưi gui.
“Pô mă tŭ leh êma talăng nao čhĭ mnia mtam hŏng prăk anăn; leh anăn ñu ƀơ̆ng mnga êma talăng mkăn. Msĕ mơh pô mă tŭ leh dua talăng ƀơ̆ng mnga dua talăng mkăn” (êlan16-17). Boh blŭ “ƀơ̆ng mnga” čiăng lač kơ klei mâo mnga lu hĭn dŭm dưi. Anei jing phung dĭng buăl thâo săng kơ klei khua digơ̆ čiăng tơdah jao talăng kơ digơ̆. Digơ̆ đăo sĭt nik khua srăng wĭt leh anăn duah digơ̆ brei digơ̆ tĭng nư (êlan 19), ƀiădah klei digơ̆ amâo mĭn ôh jing tơdah khua wĭt ƀuh digơ̆ gưt asăp leh anăn sĭt suôr hŏng bruă jao leh, mâo klei khua bi mni, jao bruă prŏng hĭn leh anăn brei klei mưn, wăt tơdah pô ƀơ̆ng mnga êma talăng amâodah dua talăng mâo klei mưn msĕ sơăi (êlan 21-23). Khua brei klei mưn tui si klei digơ̆ gưt asăp, dôk sĭt suôr leh anăn klei digơ̆ yua jih klei thâo digơ̆, amâo djŏ tui si ênoh mnga digơ̆ ƀơ̆ng.
Mâo lu phung đăo kơ Krist hruê anei ka thâo kral mơh klei brei Aê Diê brei leh kơ diñu. Mâo đa đa mkăn lač Aê Diê brei kơ diñu ƀiă đei, kyuanăn diñu amâo mâo klei jhŏng ôh mă bruă kơ Khua Yang. Diñu srăng hngah leh anăn lui bruă ngă anăn kơ pô mâo klei brei lu hĭn, thâo hĭn kơ diñu. Brei drei thâo Khua Yang thâo klă klei thâo drei leh anăn Ñu knŏng čiăng drei mă bruă kơ Ñu tăp klei thâo drei đuč, leh anăn wăt tơdah mâo mă knŏng “sa talăng” dưn, anăn ăt jing sa ênoh prăk lu mơh čiăng kơ drei “ƀơ̆ng mnga” kơ Khua Yang. Talăng Khua Yang jao leh kơ grăp čô drei amâo djŏ pioh yua kơ drei pô ôh, ƀiădah čiăng kơ drei mâo mnga kơ Khua Yang, si tô hmô yua jih dŏ Khua Yang brei leh kơ drei msĕ si mmông, klei suaih pral, klei thâo, prăk mah, lu dŏ mkăn đa đa…pioh mă bruă kơ Khua Yang leh anăn ba klei tŭ dưn kơ lu mnuih. Amâo djŏ knŏng hjăn phung khua pô mtô, pô mtô ôh, ƀiădah grăp čô drei jing dĭng buăl kơ Khua Yang sơăi. Brei drei jing phung dĭng buăl jăk leh anăn sĭt suôr kơ Khua Yang.
Ya klei brei Aê Diê brei leh kơ drei? Si drei dôk ƀơ̆ng mnga kơ Khua Yang?
Wah lač: Ơ Khua Yang khăp, kâo bi mni kơ Ih bi mtlaih kâo leh, brei klei brei leh anăn brei kâo dưi mă bruă hlăm sang Ih. Đru kâo hŏng jih ai tiê mă bruă kơ Ih sĭt suôr nanao čiăng hruê Ih lŏ hriê kâo dưi mă tŭ klei mưn yuôm bhăn mơ̆ng Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Êsther 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
