Klei Aê Diê Blŭ: II Y-Timôthê 1:1-2
Êlan kliăng: “Kâo gơ̆ Y-Pôl, sa čô khua ƀĭng kna Krist Yêsu tui si klei Aê Diê čiăng, kyua klei ƀuăn kơ klei hdĭp hlăm Krist Yêsu, Čih mơĭt kơ Y-Timôthê, anak kâo khăp êdimi” (II Y-Timôthê 1:1-2a)
Klei êmuh ksiêm mĭn: Akŏ hră mơĭt, si klei Khua ƀĭng kna Y-Pôl hưn mdah kơ ñu pô, kơ Khua Yang, leh anăn kơ Y-Timôthê? Ya knuih mdê brei mnuih mă bruă kơ Aê Diê bi mâo hĕ? Ya drei srăng ngă čiăng bi mđĭ klei đăo phung Aê Diê jao leh kơ drei răng kriê?
Anei jing blư̆ tal dua Khua ƀĭng kna Y-Pôl čih hră mơĭt knŏng kơ Khua pô mtô hlăk ai Y-Timôthê. Ñu čih tui si jar hră mơĭt ênuk anăn, kyuanăn klei kkuh čhưn ti kŏ hră mâo lu anôk msĕ hŏng klei kkuh čhưn hlăm hră ñu čih tal êlâo. Jih dua pŏk hră hưn mdah kơ ñu jing “sa čô Khua ƀĭng kna Krist Yêsu”, čih “mơĭt kơ Y-Timôthê” sơăi, leh anăn čih sa klei hơêč hmưi msĕ sơăi. Ƀiădah lĕ, ăt mâo mơh anôk mdê yuôm drei dưi ƀuh.
Tal sa, hlăm hră tal sa, Khua ƀĭng kna Y-Pôl lač ñu jing Khua ƀĭng kna “tui si klei mtă mơ̆ng Aê Diê”, bi hlăm hră tal dua, ñu lač ñu jing Khua ƀĭng kna “tui si klei Aê Diê čiăng” leh anăn “kyua klei ƀuăn kơ klei hdĭp hlăm Krist Yêsu” (êlan 1). Jing Khua ƀĭng kna, jing sa čô mă bruă kơ Khua Yang “tui si klei Aê Diê mtă”, čiăng kñăm kơ klei gưt asăp kơ klei dưi Pô ruah leh anăn mjing ñu leh. Bi “tui si klei Aê Diê čiăng” leh anăn “kyua klei ƀuăn” lĕ, brei ƀuh klei pô mă bruă uêñ mĭn kluôm dhuôm jing klei Aê Diê pô uêñ mĭn amâo djŏ klei ñu čiăng ngă klei ñu pô čiăng ôh. Klei gưt asăp wăt klei čiăng bi mơak kơ Khua Yang jing knuih brei bi mâo hĕ kơ jih jang hlei pô mă bruă kơ Khua Yang.
Tal dua, hlăm hră I Y-Timôthê, Khua ƀĭng kna Y-Pôl iêô kơ Y-Timôthê jing “anak kâo sĭt hlăm klei đăo”, snăn hlăm hră anei ñu iêo kơ khua pô mtô hlăk ai Y-Timôthê jing “anak kâo khăp êdimi” (êlan 2), klei iêô anei bi êdah klei sĭt suôr leh anăn klei bi mguôp kjăp ñu hŏng êkei hlăk ai Y-Timôthê, pô ñu dôk răng kriê leh anăn bi mđĭ klei hdĭp myang, jing klei khăp sĭt suôr snăk, bi khăp msĕ si ama hŏng anak. Hlăm bruă răng kriê, đru bi mđĭ ai hlăm klei đăo, čiăng kơ klei mtrŭt, bi hriăm, wăt klei ƀuah mkra ênưih mă tŭ leh anăn mâo klei mpŭ snăn brei klei bi mguôp čiăng bi mđĭ klei hdĭp myang jing klei bi mguôp sĭt leh anăn hŏng klei khăp, amâo djŏ asăp mtrŭn, klei mgô̆ amâodah ngă khă bi mâo ôh.
Ktuê êlan tui hlue Khua Yang, amâo djŏ phung đăo kơ Krist knŏng đăo jing djăp leh ôh, ƀiădah brei đĭ hriê kơ prŏng nanao hlăm klei hdĭp myang amâo mdei ôh hŏng klei hur har hriăm Klei Aê Diê Blŭ leh anăn bi mguôp hŏng Khua Yang. Grăp čô drei čiăng mâo sơăi pô răng kriê klei hdĭp myang kăp đru brei, leh anăn Khua Yang msĕ mơh čiăng yua drei jing pô kăp răng kriê bi mđĭ klei hdĭp myang kơ sa čô amâodah kơ lu mnuih hlăm Phung Sang Aê Diê leh anăn hlăm gŏ sang, čiăng kơ jih jang mbĭt mđrăm đĭ hriê kơ prŏng hlăm Khua Yang. Brei drei mă bruă hŏng jih ai tiê drei, khăp hŏng klei khăp sĭt, bi mguôp sĭt suôr hdơ̆ng drei, bi đru bi mđĭ hdơ̆ng drei tui si klei Khua Yang čiăng.
Kơ hlei pô ih dôk răng kriê klei hdĭp myang? Leh anăn hŏng si ai tiê ih răng kriê?
Wah lač: Ơ Khua Yang, lač jăk kơ Ih kyuadah Ih brei kâo đĭ hriê kơ prŏng leh hŏng klei răng kriê klei hdĭp myang mơ̆ng phung nao êlâo. Đru kâo msĕ mơh ƀuăn rơ̆ng leh anăn thâo khăp, hŏng jih ai tiê đru bi mđĭ klei hdĭp myang jih jang phung Ih jao leh kơ kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Êsther 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
