Klei Aê Diê Blŭ: II Y-Pêtrôs 1:1-2
Êlan kliăng: “Kâo gơ̆ Y-Simôn Pêtrôs, sa čô dĭng buăl leh anăn khua ƀĭng kna Yêsu Krist, čih mơĭt kơ phung mă tŭ leh klei đăo yuôm mđơr hŏng klei hmei đăo hlăm klei kpă ênô Aê Diê leh anăn Pô Bi Mtlaih drei, Yêsu Krist.” (II Y-Pêtrôs 1:1)
Klei êmuh ksiêm mĭn: Ya klei Khua ƀĭng kna Y-Pêtrôs mñă hlăm klei blŭ akŏ hră II Y-Pêtrôs anei? Ya klei ñu wah lač kơ phung mâo sa klei đăo yuôm bhăn srăng mâo thiăm? Ya ngă? Ya klei diih mđĭ ai ayŏng amai adei sa klei đăo hlăm klei wah lač brei?
Khua ƀĭng kna Y-Pêtrôs čih hră I Y-Pêtrôs čiăng mđĭ ai phung ƀuôn sang Aê Diê dôk tŭ klei knap mñai hlăk êjai mtao Nêrô ngă jhat kơ Phung Sang Aê Diê, leh anăn ñu čih hră tal dua anei hlăm wưng klei ngă jhat dôk đĭ ktang snăk. Ñu amâo lač ôh kơ klei tŭ knap mñai ƀiădah mñă kơ bruă djă pioh klei đăo hlăk tŭ boh klei leh anăn phung khua pô mtô soh hiu mplư. Kyua anăn, hlăm êlan tal êlâo ñu čih: “…čih mơĭt kơ phung mă tŭ leh klei đăo yuôm mđơr hŏng klei hmei đăo hlăm klei kpă ênô Aê Diê leh anăn Pô Bi Mtlaih drei, Yêsu Krist” (êlan 1). Phung mă hră jing phung đăo mă tŭ leh sa klei đăo yuôm bhăn Aê Diê brei leh msĕ si ñu mă tŭ leh, jing klei đăo kơ Khua Yang Yêsu jing Aê Diê leh anăn Pô Bi Mtlaih. Klei anăn mđĭ ai diñu thiăm klei huĭ mpŭ kơ Aê Diê ti krah klei arăng ngă jhat, kyua adôk lu mnuih hdơr leh anăn wah lač brei kơ diñu. Mbĭt anăn, ăt mñă diñu mâo Aê Diê brei klei đăo hlăm Ñu, dưi yap jing kpă ênô, dưi rơ̆ng klei bi mtlaih kyua êrah Khua Yang Yêsu Krist.
Khua ƀĭng kna Y-Pêtrôs wah lač kơ phung đăo dôk tŭ klei arăng ngă jhat: “Brei klei pap leh anăn klei êđăp ênang bi bŏ diih hlăm klei thâo kral Aê Diê leh anăn Yêsu Khua Yang drei” (êlan 2). Phung đăo kơ Krist knŏng mâo klei brei bŏ hŏng klei pap leh anăn klei êđăp ênang Aê Diê “kyua thâo kral” Aê Diê. Khua ƀĭng kna lač sa klei kpă ênô yuôm bhăn, thâo kral Aê Diê amâo djŏ jing klei thâo ôh ƀiădah jing klei bi mguôp hŏng Aê Diê tơdah kjăp ai tiê hriăm Klei Aê Diê Blŭ leh anăn bi mguôp hŏng Ñu. Ƀrư̆ giăm Aê Diê, klei pap leh anăn klei êđăp ênang Aê Diê ƀrư̆ êbeh dlai hlăm drei.
Klei wah lač Khua ƀĭng kna Y-Pêtrôs lŏ mñă drei sa mta, lu blư̆ drei hur har ƀuăn kâo srăng hdơr kơ ayŏng amai adei hlăm klei wah lač, ƀiădah tơdah truh ti sang, drei khăng wơr wah lač brei kơ ayŏng amai adei pô. Kyua anăn, Klei Aê Diê Blŭ mñă kơ drei brei hdơr kơ phung ayŏng amai adei pô mâo sa klei đăo čiăng wah lač brei. Klei mđĭ ai, klei mđing uêñ, hŏng klei wah lač srăng thiăm klei mđĭ ai leh anăn klei ktang mơ̆ng Aê Diê čiăng kơ ayŏng amai adei hlăm Khua Yang hrô kơ tui duah klei đru mơ̆ng lăn ala, snăn “đăo hlăm klei kpă ênô Aê Diê leh anăn Pô Bi Mtlaih drei, Yêsu Krist” (êlan 1).
Drei wah lač brei nanao kơ ayŏng amai adei pô mâo sa klei đăo mơ̆?
Wah lač: Ơ Khua Yang, kâo bi mni kơ Ih kyua Ih jing Pô brei klei pah mni kơ pô tui duah Ih. Akâo kơ Ih thiăm kơ kâo klei khăp, klei mđing uêñ, leh anăn klei wah lač brei kơ phung ayŏng amai adei mâo sa klei đăo. Akâo kơ Khua Yang đru kâo bi mguôp nanao hŏng Ih, knang kơ Ih čiăng mâo klei pap leh anăn klêi đăp ênang êbeh dlai Aê Diê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
