2 Petus 1:1-2
Nqe cim:
“Kuv yog Ximoos Petus tus uas yog ib tug tubtxib thiab yog Yexus Khetos tus timthawj.
Kuv sau tsab ntawv no xa mus rau txhua tus uas ntseeg Yexus Khetos tus uas yog peb tus Vajtswv thiab peb tus Cawmseej uas yog tus ncaj ncees. Nws pub nej thiab peb muaj cuabkav los ntseeg ib yam nkaus” (2 Petus 1:1)
Lus nug xav:
– Timthawj Petus hais meej txog yam dabtsi hauv thawj nqe ntawm tsab ntawv 2 Petus no?
– Nws thov Vajtswv kom cov uas muaj tib txoj kev ntseeg tau txais yam dabtsi ntxiv? Vim li cas?
– Koj txhawb cov kwvtij uas muaj tib txoj kev ntseeg dhau los ntawm txoj kev sib thov Vajtswv pab li cas?
Timthawj Petus tau sau tsab ntawv 1 Petus los txhawb Vajtswv cov menyuam uas raug kev txomnyem thaum vajntxwv Nelo (Nero) tsim txom Pawg ntseeg, thaum Petus sau tsab 2 Petus no los txhawb cov ntseeg yog lub sijhawm uas muaj kev tsimtxom cov ntseeg loj kawg nkaus. Hauv tsab ntawv no, timthawj Petus tsis hais txog kev tsimtxom tiamsis nws hais kom yuav tsum tuav rawv kev ntseeg kom ruaj thaum ntsib kev txomnyem, kev tawmtsam ntawm cov xibhwb cuav. Vim li ntawd, lolus xubthawj nws sau hais tias: “Kuv sau tsab ntawv no xa mus rau txhua tus uas ntseeg Yexus Khetos tus uas yog peb tus Vajtswv thiab peb tus Cawmseej uas yog tus ncaj ncees. Nws pub nej thiab peb muaj cuabkav los ntseeg ib yam nkaus” (nqe 1). Cov neeg uas Petus sau ntawv mus rau yog cov ntseeg uas tau txais tib txoj kev ntseeg muaj nqis uas Vajtswv tau pub rau lawv, ib yam li Vajtswv tau pub rau Petus, ntawd yog txoj kev ntseeg uas tau ntseeg txais yuav Tswv Yexus uas yog Vajtswv thiab yog tus Cawmseej. Qhov no txhawb tau lawv zog hlub Vajtswv hauv txoj kev tsimtxom, vim tseem muaj coob leej nco txog lawv thiab thov Vajtswv pab lawv. Thiab ntawd kuj yog lolus ntuas hais tias Vajtswv yog tus pub rau lawv muaj kev ntseeg, tau suav ncajncees thiab tau tabpov rau txoj kev cawmdim los ntawm Yexus Khetos cov ntshav.
Timthawj Petus thov Vajtswv rau cov ntseeg uas raug kev tsimtxom hais tias: “Thov Vajtswv foom koob hmoov thiab pub txojkev kaj siab rau nej txhua tus uas paub Vajtswv thiab paub peb tus Tswv Yexus Khetos lawm” (nqe 2). Timthawj Petus qhia hais tias cov ntseeg yuav tau txais Vajtswv txoj kev hlub tshua thiab kev kaj siab puv npo thaum lawv “paub Vajtswv” tiag tiag. Qhov uas “paub Vajtswv” tsis yog tsuas paub los ntawm tej ntaub ntawv lossis kev kawm xwb, tiamsis yog rau siab nyeem kawm Vajtswv Txojlus thiab sib txuas nrog Nws. Thaum peb nyob ze Vajtswv dua, peb yuav tau txais Nws txoj kev hlub tshua thiab kev kaj siab ntau dua.
Timthawj Petus tej lus thov Vajtswv kuj ntuas peb txog ib yam tseemceeb, ntau zaus peb hais tias, “Kuv yuav nco ntsoov thov Vajtswv rau koj” tiamsis thaum peb rov mus tsev lawm, peb pheej tsis nco thov Vajtswv rau peb cov kwvtij nkauj muam. Vim li ntawd, Vajtswv Txojlus ceebtoom kom peb nco txog cov uas muaj tib txoj kev ntseeg nrog peb thiab thov Vajtswv pab lawv. Los ntawm peb tej lus txhawb zog, hmov tshua, thiab kev thov Vajtswv yuav pab kom lawv muaj zog ntxiv los ntawm Vajtswv. Ces lawv yuav tsis mus nrhiav kev cia siab ntawm lub ntiajteb, tiamsis yuav tso siab rau Vajtswv thiab Tswv Yexus Khetos uas yog peb tus Cawmseej.
Thov Vajtswv,
Tus Tswv, nyuam yaus ua Koj tsaug vim Koj yog tus foom koob hmoov rau cov uas nrhiav Koj. Thov pub kom nyuam yaus muaj kev hlub, hmov tshua, thiab nco ntsoov thov Vajtswv rau nyuam yaus cov kwvtij nkauj muam uas muaj tib txoj kev ntseeg. Thov pab kom peb nyob ze Koj thiab tso siab rau Koj tas mus li, kom peb tau txais Koj txoj kev hlub tshua thiab kev kaj siab puv npo. Nyuam yaus tuav Tswv Yexus Khetos lub npe thov, Amees.
Peb puas pheej thov Vajtswv rau peb cov kwvtij uas muaj tib txoj kev ntseeg?
Nyeem Vajluskub hauv peb lub xyoo: Malakaus 9
Kênh Youtube BHKTHN:
