Klei Aê Diê Blŭ: II Y-Pêtrôs 2:17-22
Êlan kliăng: “Phung anăn jing msĕ si akŏ êa thu, msĕ si dhul angĭn êbŭ kpuh; Aê Diê pioh leh kơ diñu klei mmăt tĭt hlăm anôk ti gŭ.” (II Y-Pêtrôs 2:17)
Klei êmuh ksiêm mĭn: Ya rup Khua ƀĭng kna Y-Pêtrôs yua čiăng bi msĕ hŏng klei phung khua pô mtô soh leh anăn klei phung khua pô hưn êlâo mplư? Hŏng si êlan diñu mplư phung dôk hmư̆? Ya klei hưn êlâo brei drei răng kơ klei mđing hmư̆ klei mtô mblang myang?
Khua ƀĭng kna Y-Pêtrôs yua leh dua rup bi hmô djŏ hŏng êa, kyuadah êa jing yuôm êdimima kơ klei hdĭp phung ƀuôn sang ti krĭng Ngŏ (Trung Đông) thu krô. Bi mklăk hŏng Khua Yang Yêsu jing akŏ êa sĭt (Y-Yôhan 4:13-14), “klei đăo soh” mơ̆ng phung khua pô mtô soh leh anăn phung khua pô hưn êlâo soh mtô mblang knŏng jing klei čang hmăng hơăi mang, jing “hnoh êa amâo mâo êa ôh”. Klei blŭ diñu dlăng mơ̆ng kbưi jing sa kbăng êa hlăm kdrăn tač bŏ hŏng klei hmăng hmưi, ƀiădah boh sĭt knŏng jing kbăng êa thu, amâo mâo êa ôh, knŏng bi luč klei čang hmăng kơ phung čang guôn đuč. Khua ƀĭng kna Y-Pêtrôs ăt lŏ bi msĕ klei đăo soh mơ̆ng phung khua pô mtô soh leh anăn phung khua pô hưn êlâo soh mtô mblang hŏng “dhul angĭn êbŭ kpuh”. Tơdah leh rah mjeh, mnuih ngă hma hmăng hmưi mâo dhul knam ba hriê êa hjan krih hma digơ̆. Ƀiădah arăng mplư digơ̆ leh, kyuadah anăn knŏng jing knam mmăt leh anăn djăl “angĭn ktang thut mđuê̆ ” ngă kơ digơ̆ kluôm dhuôm luč klei čang hmăng.
Phung khua pô hưn êlâo soh leh anăn phung khua pô mtô soh yua “klei diñu bi mni kơ diñu pô kraih ktang” (êlan 18), mblang jing “klei blŭ hưn ktưn hơăi mang”, čiăng mplư phung hmư̆. Diñu mă ai mnuih mkăn hŏng klei diñu bi mni kơ diñu pô, boh sĭt jing klei mgao, hŏng lu mta klei ƀuăn jăk jĭn, ƀiădah boh sĭt knŏng jing klei hơăi mang, amâo mâo klei hdĭp ôh, ƀiădah knŏng atăt ba phung hmư̆ kơ klei rai luč. Hruê anei, lu mnuih čiăng tui duah klei thâo kral mrâo mrang. Diñu lač snei, klei hriăm leh anăn đup gưt Klei Aê Diê Blŭ jing klei ênuk êgao leh, kƀah klei thâo mĭn, grang mgang (bảo thủ), amâo mhač čhač (không cởi mở). phung khua pô mtô soh djă păn klei mĭn anei leh anăn khăng mplư bi djhưng ai hŏng klei blŭ kraih ktang leh anăn mă ai tiê, ƀiădah amâo mâo tur Klei Aê Diê Blŭ ôh.
Mbĭt djiêô anăn, phung khua pô hưn êlâo soh leh anăn phung khua pô mtô soh hưn lu mta klei ƀuăn kơ klei êngiê, ƀiădah amâo djŏ klei êngiê tlaih mơ̆ng klei soh ôh, ƀiădah klei êngiê ngă klei soh leh anăn dôk hdĭp tui si klei pô čiăng (êlan 19). Yang Krist bi mtlaih leh drei mơ̆ng klei bhiăn phung mnuih bi mĭn, ƀiădah klei khăp leh anăn klei pap Aê Diê ka tuôm brei drei mâo klei êngiê ngă soh ôh, ăt kăn atăt drei lŏ wĭt kơ klei jing hlŭn kơ klei bhiăn rei (Rôm 6:1-2). Phung khua pô mtô soh, tơdah bi klah hĕ klei mtô kơ klei pap mơ̆ng boh phŭn klei sĭt nik, snăn diñu bi wê leh klei đăo kơ Krist jing hĕ sa mta rup mdê mkăn. Tơdah sa čô gĭr čiăng tlaih đuĕ mơ̆ng Aê Diê leh anăn klei bhiăn Ñu, pô anăn amâo srăng tuôm thâo kral klei êngiê sĭt, kjham hĭn mơh, diñu srăng jing hlŭn kơ klei kđeh diñu pô tluh. Brei drei dôk hdĭp hŏng Klei Aê Diê Blŭ čiăng dưi mâo Yang Mngăt Jăk mtrang mngač, đru drei amâo tŭ ôh klei mplư mơ̆ng klei mtô soh.
Si ngă drei jih ai tiê hdĭp tui hlue klei atăt gai mơ̆ng Klei Aê Diê Blŭ hlăm klei pap klei bi mtlaih čiăng đăm lĕ ôh hlăm klei mplư mơ̆?
Wah lač: Ơ Khua Yang, bi mni lač jăk kơ Khua Yang brei leh kơ kâo klei Blŭ Ih, jing Klei Blŭ Hdĭp čiăng mtrang mngač, atăt gai, leh anăn čiêm rông klei hdĭp myang kâo. Brei kâo jih ai tiê hdĭp hlue Klei Blŭ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Nêhêmi 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
