Klei Aê Diê Blŭ: II Y-Pêtrôs 2:10-16
Êlan kliăng: “Ƀiădah phung soh anăn jing msĕ si hlô mnơ̆ng amâo mâo klei thâo mĭn ôh, phung ngă tui si knuih diñu, phung arăng kkiêng pioh kơ arăng mă leh anăn bi mdjiê, phung dlao wač kơ klei diñu amâo thâo săng ôh. Arăng srăng bi rai diñu msĕ si hlô mnơ̆ng anăn” (II Y-Pêtrôs 2:12)
Klei êmuh ksiêm mĭn: Hŏng ya rup Khua ƀĭng kna Y-Pêtrôs bi msĕ phung khua pô mtô soh leh anăn phung khua pô hưn êlâo soh? Si klei bi knăl leh anăn klei srăng truh kơ diñu? Si drei ngă čiăng đăm lĕ hlăm klei mplư mơ̆ng phung khua pô mtô soh?
Khua ƀĭng kna Y-Pêtrôs bi msĕ phung khua pô hưn êlâo soh leh anăn phung khua pô mtô soh hŏng “hlô mnơ̆ng amâo mâo klei mĭn ôh”. Diñu bum ală mngăt ai tiê msĕ si hlô mnơ̆ng mluk mgu, amâo mâo klei mngač mtrang mơ̆ng klei sĭt nik ƀiădah knŏng ngă hlue si knuih diñu. Kyuanăn, diñu khăng “dlao wač kơ klei diñu amâo thâo săng ôh” amâodah êgao kơ hnơ̆ng diñu tuôm thâo kral. Diñu hngah klei Aê Diê bi êdah čiăng tui hlue klei mĭn anak mnuih, lui wăt klei mĭn kpă leh anăn klei bhiăn yang đar, lĕ hlăm klei mluk mgu mâo dưi bi hlao ôh. Tơdah sa čô mnuih hngah kơ Klei Aê Diê Blŭ, amâo yap Klei Aê Diê Blŭ jing tur leh anăn ktang myang dlông hĭn kơ klei hdĭp snăn srăng jing sa čô mnuih mluk mgu, bum ală mngăt ai tiê. Kjham hĭn mơh, tơl amâo lŏ thâo kral ôh klei mluk mgu diñu pô ƀiădah ăt krưh mgao hưn ktưn, dlăng kơ arăng jing phung hơăi mang.
Klei bum ală leh anăn klei amâo thâo săng phung khua pô mtô soh leh anăn phung khua pô hưn êlâo soh bi êdah klei diñu krưh mgao leh anăn “Phung anăn jhŏng leh anăn mgao, amâo huĭ ôh dlao wač kơ phung guh kơang” (êlan 10). “Phung guh kơang” tinei, čiăng lač kơ phung dĭng buăl jăk amâodah kơ “phung myang”. Diñu hngah kơ klei mâo phung dĭng buăl jăk; dlao wač kơ yang jhat, jing phung dĭng buăl jăk lĕ hlăm klei soh, jing mta bruă tơl wăt phung dĭng buăl jăk dôk ti anăp Khua Yang “amâo blŭ ôh klei phat kđi kơ phung guh kơang anăn hŏng klei dlao wač ti anăp Khua Yang” (êlan 11). Diñu amâo mâo Yang Mngăt Jăk kiă kriê klei hdĭp ôh ƀiădah knŏng jing msĕ si hlô mnơ̆ng amâo mâo klei thâo săng.
Klei bum ală mngăt ai tiê phung khua pô hưn êlâo soh leh anăn phung khua pô mtô soh wăt hlăm knhuah hdĭp khăp tluh kơ kđeh. Diñu ngă djăp mta klei knŏng kyua klei tŭ dưn kơ diñu pô, plah mă klei tŭ dưn mơ̆ng phung dôk hmư̆ kăp mprăp pioh kơ klei diñu tluh čiăng amâo thâo hrăp, leh anăn diñu ngă klei tă tăn čhŏ mrŏ tui msĕ si êlan Y-Balaam (êlan 15-16). Phung anei “yap klei ngă tă tăn êjai hruê jing klei mơak” (êlan 13), diñu amâo lŏ bi hgăm ôh klei soh wê diñu, diñu yua Klei Aê Diê Blŭ pioh mgang kơ knhuah hdĭp soh jhat, tă tăn čhŏ mrŏ diñu. Tơl wăt “Diñu yap klei ngă tă tăn êjai hruê jing klei mơak. Diñu jing phung čhŏ mrŏ, ngă klei bi hêñ, mơak hŏng klei diñu mplư, êjai diñu ƀơ̆ng huă mbĭt hŏng diih” (êlan 13), čiăng lač kơ klei ƀơ̆ng huă klei khăp nao mbĭt hŏng klei ƀơ̆ng mnăm sĭt suôr (I Kôrantô 11:17-22).
Khua ƀĭng kna Y-Pêtrôs blŭ ktang tĭt kơ klei srăng truh kơ phung anei (êlan 12). Phung arăng kkiêng leh anăn dôk hdĭp msĕ si “hlô mnơ̆ng amâo mâo klei thâo mĭn ôh” leh anăn ti knhal tuč “arăng srăng bi rai diñu msĕ si hlô mnơ̆ng”. Diñu amâo knŏng dôk hdĭp ngă klei tă tăn leh anăn čhŏ mrŏ kyua amâo mpŭ kơ Klei Aê Diê Blŭ, ƀiădah wăt srăng tŭ klei bi rai leh anăn “pô khăp ênoh mưn kơ bruă soh” diñu pô, mblang jing klei soh amâo ba klei tŭ dưn ôh ƀiădah lŏ bi mklăk wĭt, ñu srăng mplư leh anăn plah mă wĭt diñu pô. Čiăng kơ đăm lĕ ôh hlăm mnêč mplư phung khua pô mtô soh, brei drei hriăm Klei Aê Diê Blŭ leh anăn dôk răng kăp ngă hlue.
Čiăng kơ đăm bum ală mngăt ai tiê, si knuih brei drei mâo êjai răk dlăng, hriăm Klei Aê Diê Blŭ grăp hruê?
Wah lač: Ơ Khua Yang, akâo Yang Klei Sĭt Nik mtrang mngač ai tiê klei mĭn kâo hŏng Klei Ih Blŭ, leh anăn bi mtlaih kâo mơ̆ng klei mluk mgu hlăm klei hdĭp myang, kyua klei khăng ai tiê kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Nêhêmi 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
