II Petus 2:10-16
Nqe cim:
“Tiamsis cov xibhwb cuav ntawd ua raws li lawv lub siab nyiam xwb; lawv ruam ib yam li tej tsiaj qus uas yug los rau luag ntes thiab luag tua, lawv thuam tej zaj uas lawv tsis totaub. Lawv yuav raug puastsuaj ib yam li tej tsiaj nruab nrag.” (II Petus 2:12)
Lus nug xav:
– Petus muab cov xibhwb cuav thiab cov cev lus cuav piv rau yam dabtsi?
– Lawv tus yamntxwv thiab lawv lub neej yuav xaus zoo li cas??
– Peb yuav ua li cas thiaj tsis txhob poob rau tej kev dag ntxias ntawm cov xibhwb cuav?
Timthawj Petus muab cov cev lus cuav thiab cov xibhwb cuav piv rau tej “tej tsiaj qus” uas tsis paub dabtsi. Lawv dig muag sab ntsujplig ib yam li tej tsiaj txhu uas tsis muaj kev totaub, tsis tau txais qhov kaj ntawm Vajtswv qhov tseeb, tiamsis lawv tsuas ua raws li lawv tus mojyam xwb. Vim li ntawd lawv thiaj “thuam tej zaj uas lawv tsis totaub” thiab hais tej yam uas siab dhau lawv txojkev paub. Lawv tso tej yam uas Vajtswv twb qhia tshwm tseg, mus raws tibneeg txojkev xav, lawv tso tseg tej kev xav thiab kev totaub uas tibneeg ibtxwm muaj, qaug mus rau txojkev ruam uas tsis muaj leejtwg cawm tau. Thaum ib tug neeg tso Vajtswv Txojlus tseg, tsis saib Vajtswv Txojlus ua lub hauvpaus thiab muaj hwjchim siab tshaj hauv nws lub neej lawm, ces nws yuav dhau los ua neeg ruam thiab dig muag sab ntsujplig. Qhov phem tshaj ntxiv yog nws tsis paub tias nws tus kheej ruam, tiamsis tseem khav theeb thiab saib tsis taus lwm tus.
Kev dig muag thiab kev tsis totaub ntawm cov xibhwb cuav thiab cov cev lus cuav qhia tshwm dhau ntawm lawv txojkev khavtheeb. Lawv “saib tsis taus cov uas muaj hwjchim saum nruab ntug” (nqe 10). “Cov uas muaj hwjchim” ntawm no yog cov timtswv lossis “cov tubtxib saum ntuj uas muaj hwjchim ci ntsa iab”. Lawv tsis ntseeg tias muaj timtswv, lawv tseem cem thiab saib tsis taus tej dab phem uas yog cov timtswv raug dag ntxias, yog qhov uas txawm yog cov timtswv sawv ntawm Vajtswv xubntiag los twb “tsis thuam thiab tsis nkaug rau Vajtswv” (nqe 11). Lawv tsis tau Vaj Ntsujplig coj lubneej tiamsis lawv tsuas zoo li tej tsiaj txhu uas tsis muaj kev totaub.
Kev dig muag sab ntsujplig ntawm cov xibhwb cuav thiab cov cev lus cuav kuj qhia tshwm hauv lawv txojkev ua neej raws li kev ntshaw ntawm cev nqaij daim tawv. Lawv ua txhua yam rau lawv tus kheej, txeeb tej nqi zog ntawm cov uas mloog los txhaws lawv tej kev lomzem thiab kev txhaum raws li Npala-as tus qauv (nqe 15-16). Cov neeg no “txawm yog nruab hnub nrig los lawv ua kev phem kev qias” (nqe 13), tsis quav ntsej zais lawv tej kev txhaum, lawv siv Vajluskub los txhawb lawv tus kheej kev ua txhaum thiab kev ua neej tsis huv. Lawv tseem “qw ua nqaj ua nqug qaug dej qaug cawv” thaum nrog sawvdaws noj haus ua ke (nqe 13), qhov no xav hais txog tej rooj mov sib hlub hauv Pawg Ntseeg thiab Yexus Rooj Mov Dawbhuv (I Kauleethaus 11:17-22).
Timthawj Petus hais ncaj qha txog qhov xaus ntawm cov neeg ntawd lub neej (nqe 12). Lawv yug los thiab ua neej zoo li tej tsiaj txhu uas tsis paub dabtsi, thiab thaum kawg lawv yuav puastsuaj ib yam li tej tsiaj txhu ntawd. Lawv tsis yog tsuas ua neej qias neeg vim tsis hwm Vajtswv Txojlus xwb, tiamsis lawv tseem yuav raug kev puastsuaj vim lawv tej kev phem, txhais tau hais tias kev txhaum tsis ua rau lawv tau txais nqi zog tiamsis kev txhaum ua rau lawv raug dag ntxias thiab thaum kawg ua rau lawv puastsuaj. Yog li ntawd, yuav kom peb tsis poob mus rau hauv tej kev dag ntxias ntawm cov xibhwb cuav, peb yuav tsum kawm Vajtswv Txojlus txhua hnub thiab ceevfaj ua raws li Vajtswv Txojlus qhia.
Thov Vajtswv,
Tus Tswv, thov Vaj Ntsujplig uas qhia qhov tseeb qhib nyuam yaus lub siab thiab lub tswvyim los ntawm Koj Txojlus, thiab thov cawm nyuam yaus dim ntawm kev ruam sab ntsujplig vim lub siab tawv. Nyuam yaus tuav Tswv Yexus Khetos lub npe thov, Amees.
Yuav kom tsis dig muag sab ntsujplig, peb yuav tsum muaj tus cwjpwm zoo li cas thaum nyeem thiab kawm Vajluskub txhua hnub?
Nyeem Vajluskub hauv peb lub xyoos: Nehemis 3
Kênh Youtube BHKTHN:
