Klei Aê Diê Blŭ: I Y-Yôhan 4:16-18
Êlan kliăng: “… Hŏng klei anăn klei khăp truh kơ klei jăk klă hlăm drei, čiăng kơ drei dưi mâo klei knang ti hruê phat kđi” (I Y-Yôhan 4:17a)
Klei êmuh ksiêm mĭn: Si Khua ƀĭng kna Y-Yôhan hưn mdah Aê Diê jing klei khăp? Si ñu hưn brei thâo klei khăp klă ênŭm Khua Yang hlăm hruê phat kđi jing? Hŏng ya klei drei dưi dôk kjăp hlăm hruê phat kđi?
Khua ƀĭng kna Y-Yôhan hưn kơ klei khăp klă ênŭm Aê Diê hlăm hruê phat kđi. Anei jing tur klei čang hmăng kơ phung đăo kơ Khua Yang. Hŏng klei khăp Aê Diê yơh đru phung đăo kjăp ai tiê dôk ti anăp hruê knhal tuč. Ñu hưn hŏng klei kjăp mră: Aê Diê jing klei khăp (êlan 16). Kyua klei khăp, Ñu brei Anak Ñu mâo knŏng Sa Čô hriê ti lăn ala čiăng djiê hrô brei kơ klei soh jih jang mnuih (Y-Yôhan 3:16). Jih jang bruă Aê Diê ngă, mâo hlăm anăn wăt klei phat kđi kpă, jing djŏ guôp jih hŏng knuih klei khăp Ñu. Klei doh jăk amâo bi dră hŏng klei khăp Khua Yang ôh, leh anăn klei khăp amâo bi hrŏ ôh klei doh jăk Ñu. Hrô kơ klei anăn, jih dua klei anăn bi mtuôm mbĭt klă kluôm hlăm knuih jing Khua Yang leh anăn bi êdah kluôm ênŭm hlăm klei Anak Ñu săn asei mlei čiăng bi mtlaih mnuih.
Kyuadah Aê Diê jing klei khăp, drei mâo klei iêô mthưr brei “dôk hdĭp hlăm klei khăp” leh anăn “dôk hlăm Ñu”. Anei jing klei bi mguôp sĭt suôr hŏng Aê Diê găn hŏng Khua Yang Yêsu Krist. Tơdah drei djă pioh klei bi mguôp hŏng Khua Yang, drei dưi dôk hlăm Aê Diê, leh anăn Aê Diê dôk hlăm drei (êlan 16).
Khua ƀĭng kna Y-Yôhan ăt lŏ hưn mdah mơh: “Hŏng klei anăn klei khăp truh kơ klei jăk klă hlăm drei, čiăng kơ drei dưi mâo klei knang ti hruê phat kđi” (êlan 17). Hŏng klei Khua Yang dôk hlăm klei hdĭp drei yơh bi mjing klei khăp ñu klă ênŭm leh anăn đru drei kjăp ai tiê dôk ti anăp Ñu hlăm hruê phat kđi. Drei amâo dưi kjăp ai tiê kyua klei hdĭp kpă jăk drei pô ôh, ƀiădah drei kjăp ai tiê kyua drei jing dŏ Khua Yang Yêsu leh anăn klei kpă ênô Ñu guôm drei. Klei khăp yơh bi mtlaih drei leh, wăt mprăp brei kơ drei ti hruê knhal tuč. Klei pap Aê Diê hlăm klei bi mtlaih mjing klei kpă ênô Khua Yang hlăm klei phat kđi. Tơdah Aê Diê dlăng kơ drei, Ñu ƀuh klei kpă ênô Anak Ñu guôm drei.
Hruê phat kđi srăng jing hruê hơ̆k mơak hŏng phung dôk hlăm Yang Krist. Anăn jing wưng bruă Khua Yang ngă hlăm drei srăng bi êdah klă ênŭm, leh anăn klei khăp Ñu dơ̆ng leh hlăm klei truh kơ klei jăk klă. Drei srăng kjăp ai tiê kkuh mpŭ kơ Khua Yang, đăo kjăp Yang Krist bi leh ênŭm klei bi mtlaih, leh anăn djă pioh drei hlăm klei khăp Ñu, amâo mâo ya mta klei dưi bi ktlah ôh, wăt klei phat kđi knhal tuč. Kyuanăn, drei dlăng phă hruê phat kđi knhal tuč hŏng ai tiê đăo knang, kyua thâo Aê Diê phat kđi ăt jing Aê Diê bi mtlaih leh drei hŏng klei khăp klă ênŭm Ñu.
Si ngă drei huĭ amâodah kjăp ai tiê tơdah mĭn kơ hruê phat kđi?
Wah lač: Ơ Khua Yang, akâo Ih đru kâo dôk hdĭp hlăm klei khăp leh anăn klei bi mguôp hŏng Khua Yang nanao, čiăng kơ kâo amâo srăng huĭ ôh tơdah mĭn kơ hruê phat kđi. Akâo Ih krơ̆ng kâo đăo knang kơ Khua Yang tơl knhal tuč, čiăng kơ kâo kjăp ai tiê dôk ti anăp Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 107
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
