I Yauhas 4:16-18
Nqe cim:
“…Yog peb muaj kev hlub ib yam li Vajtswv lawm, peb yuav tsis ntshai Hnub uas Vajtswv txiav txim, rau qhov peb cov uas nyob hauv lub ntiajteb no peb lub neej twb zoo ib yam li Yexus Khetos lub lawm.” (I Yauhas 4:17a)
Phau Txhais Tshiab:
“Yog li no txojkev hlub thiaj tiav kiag rau hauv peb, mas hnub uas txiav txim peb yeej muaj siab tuab, vim tias Yexus zoo li cas peb kuj zoo ib yam li ntawd rau hauv lub ntiajteb no.”
Lus nug xav:
– Timthawj Yauhas tshajtawm li cas hais tias Vajtswv yog kev hlub?
– Nws qhia li cas txog Vajtswv txojkev hlub uas tiav hauv hnub txiav txim?
– Vim li cas peb thiaj muaj siab tuab, tsis ntshai hnub txiav txim?
Timthawj Yauhas qhia txog Vajtswv txojkev hlub uas tiav nyob rau hnub txiav txim. Qhov no yog lub hauvpaus kev cia siab ntawm cov neeg ntseeg Tswv Yexus. Vajtswv txojkev hlub yog yam ua rau cov ntseeg muaj siab ruaj khov rau hnub kawg. Timthawj Yauhas tshajtawm tseeb meej hais tias: “Vajtswv yog tus uas muaj kev hlub” (nqe 16). Vim txojkev hlub, Vajtswv txaus siab txib Nws Tib Leeg Tub los rau hauv ntiajteb tuag theej neeg lub txim (Yauhas 3:16). Txhua yam uas Vajtswv ua, txawm yog Nws txojkev txiav txim ncaj ncees, los yeej haum raws li Nws tus mojyam uas muaj kev hlub. Vajtswv txojkev dawb huv thiab Nws txojkev hlub tsis sib tawmtsam, thiab kev hlub tsis ua rau Vajtswv txojkev dawb huv raug txo qis, thiab kev dawb huv kuj tsis ua rau Nws txojkev hlub ploj mus. Tiamis ob yam no sib haumxeeb kawg nkaus nyob hauv Vajtswv tus yamntxwv thiab tau qhia tshwm meej nyob rau hauv Tswv Yexus Khetos txojkev tuag txhiv tibneeg.
Vim Vajtswv yog kev hlub, Nws hu peb kom ua neej “muaj kev hlub” thiab “nrog Vajtswv sib raug zoo”. Qhov no yog kev sib raug zoo ze heev nrog Vajtswv dhau los ntawm Tswv Yexus Khetos. Thaum peb nyob ruaj hauv txojkev sib raug zoo nrog tus Tswv, ces peb tau nyob hauv Vajtswv thiab Vajtswv nyob hauv peb (nqe 16).
Timthawj Yauhas hais txuas ntxiv hais tias: “Yog peb muaj kev hlub ib yam li Vajtswv lawm, peb yuav tsis ntshai Hnub uas Vajtswv txiav txim” (nqe 17). Qhov uas Vajtswv nyob hauv peb lub neej ua rau Nws txojkev hlub tiav hauv peb thiab pab kom peb muaj siab tuab, tsis ntshai sawv ntawm Nws xubntiag rau hnub txiav txim. Peb muaj siab tuab tsis yog vim peb tus kheej ua neeg zoo lossis ncaj ncees npaum li cas, tiamsis vim peb yog Tswv Yexus tug thiab Nws txojkev ncaj ncees npog peb lawm. Txojkev hlub uas cawm peb dim lawm kuj yog txojkev hlub uas npaj peb rau hnub kawg thiab. Vajtswv txojkev hlub tshua hauv txojkev cawmdim yuav dhau los ua Nws txojkev ncaj ncees hauv hnub txiav txim. Thaum Vajtswv ntsia peb, Nws pom Nws Leej Tub txojkev ncaj ncees npog peb lawm.
Hnub txiav txim yuav yog hnub muaj kev xyivfab rau cov neeg uas nyob hauv Tswv Yexus Khetos. Hnub ntawd yog lub sijhawm uas Vajtswv tes haujlwm hauv peb yuav qhia tshwm txhij txhua, thiab txojkev hlub uas Nws tau pib hauv peb yuav tiav zoo kawg nkaus. Peb ruaj siab pehawm tus Tswv, ntseeg ruaj hais tias Tswv Yexus Khetos twb ua tiav txojkev cawmdim lawm, thiab peb tau nyob ruaj hauv Nws txojkev hlub; tsis muaj dabtsi yuav cais tau peb ntawm Nws txojkev hlub, txawm yog hnub txiav txim zaum kawg los kuj cais tsis tau. Vim li ntawd, peb tos ntsoov hnub txiav txim nrog kev cia siab, paub hais tias Tus Vajtswv uas txiav txim kuj yog Tus Vajtswv uas tau cawm peb dim los ntawm Nws txojkev hlub uas zoo kawg nkaus.
Thov Vajtswv,
Tus Tswv, thov pab kom nyuam yaus niaj hnub ua neej nyob hauv Koj txojkev hlub thiab nyob ruaj hauv kev sib raug zoo nrog Koj, kom nyuam yaus tsis ntshai thaum xav txog hnub txiav txim. Thov pab nyuam yaus ntseeg ruaj mus txog hnub kawg, kom nyuam yaus muaj siab tuab, tsis ntshai thaum sawv ntawm Koj xubntiag. Nyuam yaus tuav Tswv Yexus Khetos lub npe thov, Amees.
Thaum xav txog hnub txiav txim, peb ntshai los peb muaj siab tuab?
Nyeem Vajluskub hauv peb lub xyoos: Phau Ntawv Nkauj 107.
Kênh Youtube BHKTHN:
