I Pêtrôs 5:13-14
“Inh apinh ‘Bok Kei-Dei ăn kơ iĕm mă lui kơ Yêsu Krist hiôk-hian. Na kơnh pơgê apinh iĕm sơng iŏk rôp băl ti mă ‘lơ̆ng wă kơ băt tơdrong ‘mêm băl!” (I Pêtrôs 5:14)
Nơ̆r jet tơchĕng pơwao:
– Tuch luch kơthơ ‘nâu, ‘bok Pêtrôs chih roi tơdrong kiơ?
– Yua kơ kiơ sư pơma pran tơdrong ‘nâu?
– Bơngai lui kăl kơ pơm kiơ wă kơ hiôk hian lăm hnam Kră Yang?
Tuch luch lăm kơthơ ‘nâu, ‘bok Pêtrôs tơ’blŏk kơ bơngai lui mă oei jơ̆p jang tơ rim pơlei ‘noh tơbăt kơ sư huay kơ sơ’ngon ôh, yua kơ lu bơngai lui tơ Pơlei Babilôn, ‘Bok Kei-Dei rơih iŏk lu sư thoi Sư rơih lu iĕm mơ̆n, lu sư đei nơ̆r jet gia pơma dơnuh păng iĕm. Markôs sư dang kon inh, sư hơdai lei-lăi jet gia iĕm mơ̆n. (trong 13). Chăl noh sơ̆, đe dan anăn dêh Babilôn ăn kơ dêh Rôm yua kơ dêh ‘nâu arih pơm kơnê̆ krưp dêh lăm char Rôm.
Pơtrơp dơ̆ng, Pêtrôs đei bơtho pơkă kơ bơngai lui “apinh iĕm sơng iŏk rôp băl ti mă ‘lơ̆ng wă kơ băt tơdrong ‘mêm băl. “’Nâu bơih tơdrong juăt lu bơngai lui chăl noh sơ̆ (Rôm 16:16; I Kôrintô 16:20; II Kôrintô 13:12; I Têsalônik 5:26). “Rôp băl ti mă ‘lơ̆ng wă pơma pơyom băl păng minh jơhngơ̆m đon lăm Kră Yang dôm nơ̆r jet gia păng tơdrong ‘mêm băl tơpă noh bơih tơdrong wă kơ hiôk hian lăm hnam Kră Yang, thoi Pêtrôs hơkat nơ̆r kơđeh “Inh apinh ‘Bok Kei-Dei ăn kơ iĕm mă lui kơ Yêsu Krist hiôk-hian. Na kơnh pơgê apinh iĕm sơng iŏk rôp băl ti mă ‘lơ̆ng wă kơ băt tơdrong ‘mêm băl!” (trong 14).
Nơ̆r jet gia tuch luch lăm kơthơ ‘nâu ‘bok Pêtrôs pơma jăng khan tơdrong hiôk hian tơpă ưh kơ sĭ lĕch đơ̆ng kon bơngai ôh dah đơ̆ng chăl arih mălei noh đơ̆ng Kră Yang Yêsu Krist. Lu bơngai lui đe pơm kơnê̆ păng pŭ iŏk tơdrong pơmat tat arih jơ̆p jang anih, tơ âu tơ to jơ̆p anih arih pơmat tat noh kư̆m ưh kơ gơh pơrăm lê̆ tơdrong hiôk hian Kră Yang đei ‘măn lê̆ “Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm ‘nĕ sơ’ngon păng ‘nĕ kơ hli.” (Yôhan 14:27). Bơngai lui kơ Kră Yang đei tơdrong hiôk hian tơpă kơplah kon pơlei Kră Yang đei tơdrong tơ’bưh hăm Kră Yang, na lăm tơdrong tơ’bưh ‘noh, rim ‘nu bơngai lui gô đei tơdrong tơ’bưh băl hăm tơdrong ‘mêm tơguăt băl lăm Kră Yang, rim ‘nu bơngai mă khan oei ‘bơ̆t anih ayơ mălei đei pơyom arih băt mơnat dih băl păng sơng iŏk dih băl.
Ahrei ‘nâu, mă bu kư̆m dai hơpơi kơ hnam akŭm bơ̆n đei tơdrong hiôk hian Kră Yang ăn. Wă kơ gơh thoi ei, rim ‘nu bơngai lui kăl kơ tơguăt dih băl, hiơ̆k tơgŭm dih băl, ưh kơ gơh pơdê băl. ‘Nĕ kơ lê̆ lu bơngai dơnuh hoh, lu bơngai măt tol, bơngai jo jăn mơlâu yua kơ ưh kơ đei bơngai hiơ̆k tơgŭm bơ̆n, kăl kơ minh nơ̆r jet gia dih băl, rôp băl ti mă ‘lơ̆ng noh kư̆m pơm kơ bôl buăl bơ̆n lăp đon bơih. Tơdrong mơlâu dah đei jơhngơ̆m pơang gô pơm kơ Khul Bơngai Lui gô tơklah dih băl, areh băl. Rim bơngai lui arih hiơ̆k dih băl gô tơgŭm băl lăm Khul Bơngai Lui jing minh anih pơm kơ đe ‘maih tơkan năm. Yua kơ lu sư ‘bôh arih noh đei lu bơngai đei ‘mêm dih băl păng jơhngơ̆m hiôk tơgŭm dih băl, pơyom dih băl, ưh kơ pơdê bu mơdrŏng dah dơnuh.
Ơ Kră Yang, inh bơnê kơ Ih yua kơ Ih đei ăn kơ inh tơdrong hiôk hian tơpă. Apinh Ih tơgŭm inh gơh đei tơdrong tơ’bưh hiôk hian lăm hnam Kră Yang hăm tơdrong hiơ̆k dih băl, tơguăt păng iŏk đon ala pơyom dih băl lăm tơdrong ‘mêm. Krao khan yua anăn Kră Yang Yêsu Krist, Amen.
Lu bơ̆n adrin tơgŭm pơjing tơdrong hiôk hian lăm hnam Kră Yang thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: HabaKuk 1
Kênh Youtube BHKTHN:
