I Pêtrôs 5:12
“Silas ‘nhŏng oh bơ̆n bơngai lui, inh lăng sư lui kơjăp tơpă, na kơthơ âu sư chih tơgŭm inh. Nhi chih minh ‘bar nơ̆r…” (I Pêtrôs 5:12a)
Nơ̆r jet tơchĕng pơwao:
– Silas sư ‘noh bu?
– Lăm sư đei tơdrong ‘lơ̆ng thoi yơ?
– Lu bơ̆n oei bơ̆jang kơ Kră Yang hăm jơhngơ̆m thoi yơ?
Lăm nơ̆r kơkuh tuch luch kơthơ, ‘bok Pêtrôs pao anăn Silas, đơ̆ng sư pơm kơdranh ăn “’Nhŏng oh bơngai lui kơjăp” Silas ‘noh đe krao anăn pha dơ̆ng, sư dai bơngai Rôm (Tơdrong jang 16:37), minh lăm lu bơngai đei rơih iŏk chĕp kơthơ chă năm ba tơ pơlei Jêrusalem đơ̆ng noh dơ̆ng năm tơ pơlei Antiôt (Tơdrong jang 5:22). Sư kiơ̆ hơdai Pôl năm chă bơtho Tơdrong ‘Nao ‘Lơ̆ng wơ̆t mă ‘bar (Tơdrong jang 15:40-41), na ‘bok Pôl đei chih roi lăm kơthơ nơ̆r pơma kơkuh jet gia lăm ‘bar kơthơ gơih ăn kơ bơngai lui tơ pơlei Têsalônik (I Têsalônik 1:1; II Têsalônik 1:1); păng sư kư̆m hơdai Timôthê bơ̆jang kơ Kră Yang tơ pơlei Kôrintô (II Kôrintô 1:19). Dôm tơdrong nơ̆r ‘Bok Kei-Dei đei chih tơbăt ăn kơ ‘bok Silas wă khan Sila, jơ̆ minh ‘nu bơngai bơ̆jang kơ Kră Yang tơnăp tơnen dêh lăm Khul Bơngai Lui Blŭng a, păng ‘bok Silas đei chih kơthơ chăl trong tuch luch ‘nâu, kơthơ mă sư chih âu sư chih tơgŭm đơ̆ng dôm nơ̆r ‘bok Pêtrôs đŏk ăn kơ sư gơih ăn kơ bơngai lui oei arih tơ jơ̆p jang anih tơ rim pơlei, lăm jơ hnơr ‘noh pơtao Nêron pơm kơnê̆ kơ Khul Bơngai Lui.
Lu bơ̆n ‘bôh ‘bok Silas lăm sư đei tơdrong ‘lơ̆ng. Mă minh, sư minh ‘nu bơngai tơnăp. ‘Bok Pêtrôs ưh kơ pao ‘bok Silas bơngai hơgei đei ‘băng, tơdrong jang tih, dah mă khan sư bơngai hlôh wao, mălei sư tơbăt: “’Nhŏng oh bơ̆n Bơngai Lui, inh lăng sư bơngai lui kơjăp tơpă”. (trong 12). ‘Nâu bơih minh lăm lu plei Yang Bơhngol ‘Lơ̆ng, (Galati 5:22), jơ̆ lu tơdrong ‘lơ̆ng mă Kră Yang pơư, păng sư wă lăng ‘bôh lăm lu bơ̆n kơplah bơ̆n đei sơng iŏk jên hu đơ̆ng Kră Yang pơjao (Mathiơ 25:21).
Mă ‘bar, ‘bok Silas ưh kơ đe pơang kơdih akâu, mălei jơhngơ̆m sư tơnăp đei ‘bok Pêtrôs pơm kơdranh kơ đe dơ̆ng, pơm kơdranh lăm kơthơ âu đei lơ bơngai băt. Đei mơ’nah pơư kơdih khan inh thoi âu, thoi to! Lăm jơhngơ̆m bơ̆n bơ̆jang kơ Kră Yang sư băt đĭ kon bơngai kư̆m băt mơ̆n. ‘Nĕ kơ đei bu pơang, yua kơ “Pơma thoi noh ưh kơ trŏ bơih.” (Yakơ 4:16).
Mă pêng, mă khan bơ̆n jang ‘bơ̆t anih ayơ, mă khan bơ̆n bơ̆jang kơ Kră Yang hơdai hăm ‘bok Pôl, ‘bok Pêtrôs dah hơdai hăm Timôthê hĭ, lei sư bơ̆jang oei tơnăp đĕch. Lăm âu ‘bok Silas minh ‘nu bơngai chih hla bơar đĕch, băt mơ̆ng păng chih ming kơthơ tơgŭm ‘bok Pêtrôs, mălei sư oei adrin bơ̆jang. Rim ‘nu kơ bơ̆n mă khan oei tơ anih ayơ tơdrong jang thoi yơ, tơdrong arih thoi yơ hĭ bơ̆n athei đĭ jơhngơ̆m tơnăp hơdai băl bơ̆jang “Mă tôm tơdrong jang, iĕm athei jang mă tơpă, jang hăm đĭ jơhngơ̆m, ‘nĕ kơ pơm đon, yua kơ iĕm jang wă pơhiôk Yŏng bơ̆n Yêsu Krist, ưh kơ sĭ iĕm jang wă pơhiôk kon bơngai đĕch ôh.” (Kôlôssê 3:23). Apinh Kră Yang ăn kơ lu bơ̆n minh ‘nu đĭch đam tơnăp truh năr tôch ning mônh Kră Yang gô pơư kơ bơ̆n. “Na yŏng sư khan: ‘Ơ dăm, ih jang kơ inh ‘lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang ‘lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.” (Mathiơ 25:23).
Ơ Kră Yang, inh apinh Ih thim jơhngơ̆m iơ̆m dim, iŏk đon ala wă kơ ling lang tơnăp bơ̆jang kơ Kră Yang đĭ chăl arih. Hơpơi đơ̆ng inh bơ̆jang, na đei lơ bơngai adrin păng kơjăp lăm đon lui. Krao khan yua anăn Kră Yang Yêsu Krist, Amen.
Jơhngơ̆m ‘bok Silas bơ̆jang đei pơlung lu bơ̆n arih tơnăp thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Nahum 3
Kênh Youtube BHKTHN:
