Galati 6:2-3
“Iĕm gơh tơgŭm dih băl thoi noh trŏ tơpă, thoi Kră Yang Yêsu Krist pơkă.” (Galati 6:2)
Nơ̆r jet tơchĕng pơwao:
– Tơdrong pơtrơp dơ̆ng bơngai lui kơjăp hiơ̆k pŭ iŏk noh kiơ?
– Yua kơ kiơ athei pơm keh tơdrong pŭ iŏk ‘nâu?
– Yua kơ kiơ lơ bơngai ưh kơ gơh tơgŭm dih băl?
Tơdrong arih bơngai lui jơ̆ minh tơdrong yak năm hơdai lăm bơngai lăm hnam dơnŏ ‘nao noh bơih khul bơngai lui kơ Kră Yang đei tơdrong pơgơ̆p păng tơgŭm dih băl (Rôm 15:1; I Kôrintô 12:26). Lăm Galati 6:1-5, đơ̆ng rŏng kơ bơngai “mă lui kơjăp” tơgŭm bơngai ưh kơ pơrơ̆ng pơm yoch hơmet ming sư tơ’bưh hăm Kră Yang păng khul bơngai lui lei na bơ̆n oei adrin dơ̆ng “gơh tơgŭm dih băl ”. nơ̆r “pŭ” wă khan pŭ trăp hăm tơdrong kĕ chơ̆n păng nơ̆r ‘nâu dang ei đei pơma tơ’bôh ‘nâu bơih minh tơdrong wă pơm jang hơnơ̆ng. Nơ̆r “pŭ trăp” pơma kơ minh pôm tơmam trăp, trăp tơpă păng anat dêh kơ wă tung lăm âu pơma kơ mă dôm tơdrong gleh pơmat ayơ mă minh ‘nu bơngai hiơ̆k tơ’bơ̆p tơ’bưh. Bu bu kư̆m đei tơdrong trăp kơdih, lei na thoi inh gơh pŭ thim dơ̆ng tơdrong trăp bơngai nai! Yua kơ noh bơih “khôi juăt Kră Yang” khôi juăt ‘mêm mơnat (Yôhan 13:34-35).
Mă khan lei ră, kiơ̆ kơ nơ̆r đei pơma dơ̆ng lăm âu pŭ trăp lăm âu noh kư̆m tơdrong pơhlŭ pơm kơ bơngai pơm yoch wih hơlơ̆k dơ̆ng pơm yoch mă khan gơh klaih đơ̆ng pơm yoch bơih ră. Tơdrong pơhlŭ kơ tĭt lê̆ păng oei hơnơ̆ng noh minh lăm tơdrong pŭ trăp hloh mă minh ‘nu bơngai lui gô pŭ. Klaih đơ̆ng minh tơdrong yoch ưh kơ sĭ khan ưh kơ đei tơdrong pơhlŭ wă pơm hơlơ̆k tơdrong yoch noh dơ̆ng ôh. Dah jơ mă pơm tơdrong yoch nai. Bơngai lui gah bơhngol ‘mêm mơnat kơ ‘nhŏng oh tơpă păng wă dêh hơmet bơngai noh lăm tơdrong yak năm lăm Yang Bơhngol ‘Lơ̆ng gô ‘măn jơ ‘năr dơ̆ng hăm bơngai noh păng ling lang wă bơtho pơlung, pơtrŭt noh bơih “gơh tơgŭm dih băl”.
Yua kơ kiơ lu bơ̆n athei ‘mêm mơnat, iŏk đon ala tơgŭm kơ ‘nhŏng oh mă pơm yoch tơbral (trong 1) mă-lei athei hiơ̆k tơgŭm wei lăng dŏng wă kơ lu sư lui kơjăp lăm tơdrong arih gah bơhngol (trong 2)? Noh yua kơ bơ̆n ưh kơ sĭ pơm kiơ̆ minh tơdrong jang dah tơdrong hiơ̆k pŭ iŏk đĕch ôh, na kư̆m minh trong arih ‘mêm mơnat lăm tơdrong arih Yang Bơhngol ‘Lơ̆ng păng bơnê kơ Kră Yang yua kơ kơplah bơ̆n gah Kră Yang păng khul bơngai lui, kơplah bơ̆n chu nơ̆r Kră Yang wă arih ‘mêm mơnat gơh tơgŭm dih băl lei na kư̆m gô đei lơ ‘nhŏng mai oh gơh tơgŭm dih băl kơ bơ̆n tơpă.
Lơ bơngai ưh kơ “gơh tơgŭm dih băl” yua kơ lu sư pơrŏ pơ ang dêh păng khan sư lui kơjăp (trong 3) thoi noh ưh kơ ‘maih tơ jur akâu kơdih wă tơgŭm dih băl. Mă tơpă, gah bơhngol, đĭ đăng kơ bơ̆n “lui ưh kơjăp” ngăl, bơ̆n gơh klaih yua kơ đơ̆ng mơnat ăn đĕch păng yak năm dơ̆ng kiơ̆ trong Kră Yang kư̆m yua tơdrong mơnat ăn đĕch dah ưh kơ ‘bônh kơ hlôh hăm tơdrong bơtho đơ̆ng Yang Bơhngol tơ’blŏk lei bơ̆n ‘bônh dêh “bơngai noh bơngai hơlĕnh” păng arih ưh kơ “pơm kiơ̆ khôi juăt Krist”
Kơkuh kơ Ih Kră Yang, apĭnh ăn kơ inh rim năr băt kơ Kră Yang rai hloh, băt tơpă tơdrong Kră Yang mơnat Sư ‘măn kơ inh na đơ̆ng noh inh gơh arih ‘mêm mơnat kơ ‘nhŏng mai oh bơ̆n, tơgŭm dih băl, krao khan yua anăn Kră Yang Yêsu Krist, Amen.
Bơ̆n đei hlôi bơih păng oei tơgŭm dih băl đơ̆ng lu tơdrong ayơ?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Mika 3
Kênh Youtube BHKTHN:
