Êsêkiên 36:22-28
“Inh gô ăn Yang Bơhngol Inh oei lăm lu iĕm, wă kơ lu iĕm pơm kiơ̆ khôi juăt inh, lu iĕm gô pơ’lơ̆ng pơm kiơ̆ lu nơ̆r Inh tơtă.” (Êsêkiên 36:27)
Nơ̆r jet tơchĕng pơwao:
- Đơ̆ng Êsêkiên bơngai pơtruh nơ̆r ‘Bok Kei-Dei, ‘Bok Kei-Dei đei roi tơbăt tơdrong kiơ mă ‘Bok Kei-Dei wă pơm kơ lu kon pơlei pơla Israel?
- Tơdrong kiơ wă pơm ăn kơ lu sư đei tơdrong tơplih?
- Yang Bơhngol ‘Lơ̆ng gô tơgŭm lu sư tơdrong kiơ?
- Tơdrong tơ’bôh kiơ lăm chăl arih bơ̆n pơsĭt kơ bơ̆n đei Yang Bơhngol ‘Lơ̆ng oei hơdai?
Chăl 36 lăm Hla bơar Êsêkiên gơh pơma noh jơ̆ ‘bai bơtho đơ̆ng Êsêkiên ăn kơ kon pơlei Israel hăm tơdrong sơmĕng kơplah lu sư ‘nao brŏk đơ̆ng đe tơlĕch lu sư đơ̆ng bơnă đĭch đe tơ ‘nguaih kơ teh đak lu sư yua kơ lu sư pơm plơ̆ kơ đe. Lăm chăl 36 ‘nâu (đơ̆ng trong 1-15), bơngai pơtruh nơ̆r ‘Bok Kei-Dei đei roi tơbăt ‘Bok Kei-Dei gô tơiung lăi dêh char lu sư. Mă ‘bar (trong 16-38), Kră Yang gô tơiung tơdrong arih lu kon pơlei pơla Sư. Mă khan lu sư ưh kơ tơnăp, Kră Yang oei tơ’bôh tơdrong ‘mêm Sư, mă khan lu sư ưh kơ hơnhŏ, mă lei tơdrong âu wă kơ anăn Kră Yang đei pôk pơư ang (trong 22), nơ̆r pơkă gĭt kăl dêh ưh kơ trŏ ăn kơ lu sư lăm tơdrong wih brŏk tơ dêh char lu sư kơdih ôh, mă lei noh jơ̆ chăl arih lu sư gô đei tơdrong tơplih đơ̆ng lăm jơhngơ̆m, noh jơ̆ tơdrong jang đơ̆ng Yang Bơhngol ‘Lơ̆ng Kră Yang ‘Bok Kei-Dei.
Nơ̆r đei pơma “jơhngơ̆m ‘nao” păng “jơhngơ̆m hăm sĕch” (trong 26) wă khan jơhngơ̆m đei tơdrong rơmuŏn, jơhngơ̆m mă băt kơ tơl kơ Nơ̆r Kră Yang, tơplơ̆ kơ “jơhngơ̆m hăm tơmo” noh jơ̆ pơma kơ tơdrong mă ưh kơ chu, arăng kơ̆l, arăng lăm jơhngơ̆m hăm tơdrong râu krao đơ̆ng ‘Bok Kei-Dei. Tơdrong tơplih âu ưh kơ trŏ đơ̆ng tơdrong adrin đơ̆ng kon bơngai ôh, mălei ‘nâu jơ̆ tơdrong tơplih đơ̆ng lăm tu tơm noh jơ̆ đơ̆ng Yang Bơhngol ‘Lơ̆ng đei bơ̆jang. Mă hloh dơ̆ng trong 27 đei pơma pran thoi âu: ““Inh gô ăn Yang Bơhngol Inh oei lăm lu iĕm, wă kơ lu iĕm pơm kiơ̆ khôi juăt inh, lu iĕm gô pơ’lơ̆ng pơm kiơ̆ lu nơ̆r Inh tơtă.” Tơdrong âu tơ’bôh ăn kơ tơdrong jang Yang Bơhngol ‘Lơ̆ng ưh kơ trŏ hơdrô̆ pơm ăn kơ jơhngơ̆m đei tơdrong rơmuŏn mă lei kư̆m ăn đei jơhngơ̆m pran wă kơ arih chu yom păng arih lăm tơdrong ‘lơ̆ng tơpăt đơ̆ng ‘Bok Kei-Dei.
Lăm chăl âu đei pơma ‘bar tơdrong jang Yang Bơhngol ‘Lơ̆ng: Mă mônh, tơplih jơhngơ̆m păng mă ‘bar, dui ba lăm tơdrong arih đei tơdrong ‘mêm mơnat păng chu yom. Đơ̆ng Yang Bơhngol ‘Lơ̆ng sư jơ̆ tơ’ngla gơh bơ̆jang păng gơh tơplih jơhngơ̆m kon bơngai. Đơ̆ng Sư ăn “jơhngơ̆m hăm sĕch” lei na kon bơngai gô đei băt mơn kơ tơdrong ‘mêm đơ̆ng Kră Yang, băt kơ tơbral, chă tơdrong ‘lơ̆ng rơgoh. Tơdrong lơ̆ng tơpăt ‘bơ̆t anăp Kră Yang ‘Bok Kei-Dei pơtơm đơ̆ng đei tơdrong tơplih đơ̆ng Kră Yang. Yang Bơhngol ‘Lơ̆ng tơgŭm bơ̆n bơwei păng “roi kiơ̆” thoi Kră Yang wă (trong 27), wă khan Kră Yang tơplih đơ̆ng tơdrong chu yom đơ̆ng tơdrong pơgŏ jing tơdrong hiôk chơt na arih rok kiơ̆, tơgŭm bơ̆n ‘mêm kơ tơduă kon bơngai, mơnat băl, bơ̆jang păng arih pơchrang hơdah tơdrong ‘lơ̆ng đơ̆ng Kră Yang ‘Bok Kei-Dei.
Chăl arih lu kon Kră Yang đei Yang Bơhngol ‘Lơ̆ng oei hơdai gô đei plei Yang Bơhngol ‘Lơ̆ng (Galati 5:22-23). ‘noh jơ̆ pơsĭt kơ minh chăl arih mă ‘bĕnh blai kơ Yang Bơhngol ‘Lơ̆ng. Minh jơhngơ̆m mă rơmuăn ‘bơ̆t anăp Kră Yang ling lang kơ ba ăn tơdrong ‘mêm kơ bơngai nai. Tơdrong ‘mêm noh jơ̆ tơ’bôh ăn kơ jơhngơ̆m hăm sĕch đei Yang Bơhngol ‘Lơ̆ng pơgơ̆r.
Ơ Yang Bơhngol ‘Lơ̆ng, Inh bơnê kơ Ih yua kơ Ih đei tơplih jơhngơ̆m inh. Apinh Ih ling lang kơ oei hơdai păng tơgŭm inh arih lăm tơdrong ‘lơ̆ng tơpăt Ih wă ba ăn tơdrong ‘mêm đơ̆ng Kră Yang Yêsu Krist đơ̆ng lăm tơdrong jang truh kơ nơ̆r pơma inh. Yua anăn Kră Yang Yêsu Krist. Amen
Lu bơ̆n tam đei sơng iŏk jơhngơ̆m “hăm sĕch” lei mă oei ling lang kơ jơhngơ̆m hăm “tơmo”?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 102-103
Kênh Youtube BHKTHN:
