Pajlug 27:3-4
Nqe cim:
“Tej kev nyuaj siab uas cov neeg ruam rhawv muaj hnyav dua pobzeb thiab suabzeb” (Pajlug 27:3)
Lus nug rau sawvdaws xav:
– Tej yam dabtsi nyhav dua pobzeb thiab suabzeb?
– Ris nra hnyav hauv kev xav, hauv nplooj siab cuamtshuam li cas rau peb?
– Yuav ua li cas kom peb tu lub siab paub ua tsaug thiab txaus siab kom peb kovyeej tej nra hnyav hauv kev ua neej?
Tus sau pajlug kos ib tus duab ciaj sia txog lub nra hnyav ntawm kev xav. Leejtwg los kuj paub txog pobzeb thiab suabzeb hnyav npaum li cas. Tiamsis Vajtswv Txojlus qhia hais tias tseem muaj tej nra hnyav uas hnyav dua, ntawd yog kev npautaws, kev chim, thiab txoj kev ntxub ntxaug hauv nruab siab.
Lo lus “Tej kev nyuaj siab uas cov neeg ruam rhawv muaj” yog piav txog txoj kev npautaws, kev chim siab ntawm tus neeg ruam thaum uas raug lwm tus txob thuam nws. Txoj kev npautaws uas nws tswj tsis tau tsuam hnyav rau nws sab ntsujplig, ua rau tus neeg ruam ceev tsis tau lub siab tus thiab ua tej uas tsis tswj siab raws nws txoj kev xav. “Kev chim” hauv lus Henplais lub ntsiab yog txoj kev chim npau hauv siab loj heev tuaj, pheej tshwm los ntawm tej lus hais thiab tej haujlwm ua uas tsis ua tib zoo xav thiab sib ntaus tiamsis tom qab tej ntawd ces xav txog lig lawm. “Kev nruj tsiv” tseem loj dua, ntawd yog kev npautaws uas kub heev, npog tas txoj kev xav zoo, thiab ua rau lwm tus raug mob. Tagnrho txoj “kev npautaws” thiab “kev nruj tsiv” puavleej muaj peevxwm rhuav tshem tas txhua txoj kev phoojywg thiab ua rau nws lub siab dhau los ntxub ntxaug lwm tus.
Txawm li ntawd los, muaj ib nqe Vajluskub tseem qhia mus deb dua thiab: “txojkev khib tseem phem heev dua” ntawd thiaj yog lub nra hnyav uas nyob zais nkoos tob tshaj plaws. Lub “siab khib” lub ntsiab hauv lus Henplais yog“mob siab vim khib”. Nws tsis nrov ncha moo lug li kev npautaws, nws nyob ntsiagto hauv nruab siab. Kev khib ua rau peb sib piv, sib twv saib leejtwg yeej swb thiab npautaws thaum pom luag tshaj yus. Tus neeg khib nws yeej tsis zoo siab rau nws cov kwvtij uas tau txais koob hmoov thiab ua rau nws feeb tsis tau tej koob hmoov uas Vajtswv pub rau nws. Vajtswv Txojlus ceebtoom: “…kev khib zoo ib yam li lub mob” (Pajlug 14:30). Kev khib zoo li ib tus mob uas nyob ntsiag to maj mam txo peb sab ntsujplig, yog peb tsis ntxov muab cob rau Vajtswv pab kho kom zoo mus.
Tej nra hnyav tshaj plaws hauv peb lub neej tsis yog tej khoom qhov txhia chaw tiamsis yog hauv lub siab thiab tej kev xav. Pobzeb tej zaum yeej nqa taus, suabzeb tej zaum yeej yawm taus mus lawd, tiamsis txoj kev khib thiab kev npautaws yuav tsuam peb hnyav mus txog thaum peb muab tej ntawd txawb rau ntawm Tswv Yexus kotaw. Tswv Yexus hais tias: “Nej cov uas sab sab vim ris nra hnyav, nej cia li los cuag kuv, kuv yuav cia nej so” (Mathais 11:28). Tsuas yog hauv Tswv Yexus xwb, peb thiaj nrhiav tau kev kaj siab hauv sab ntsujplig. Thaum uas peb fij lub nra hnyav rau tus Tswv, Nws yuav hloov tej ntawd los ua kev hlub, muaj lub siab ntev thiab kev paub ua tsaug. Tus neeg txawj ntse nws paub kawm siv lus mos muag los teb luag tej lus txob thuam, hloov kev chim ua lus thov Vajtswv pab, thiab zoo siab thaum luag tau txais koob hmoov. Thaum ntawd peb yuav kaj siab, hauv nruab siab tsis muaj nra hnyav kev khib, kev chim tsuam yus lawm.
Thov Vajtswv,
Vajtswv, thov pab nyuam yaus tso tseg txoj kev khib, kev chim hauv nruab siab mus.Thov Vaj Ntsujplig hloov nyuam yaus lub neej dua tshiab los ntawm txoj kev hlub, kev ua siab ntev thiab kev paub ua Vajtswv Koj tsaug. Thov pab nyuam yaus zoo siab nrog rau lwm tus uas tau txais koob hmoov thiab nyuam yaus paub txaus siab rau tej uas Koj pub nyuam yaus. Nyuam yaus tuav Tswv Yexus Khetos lub npe thov, Amees.
Peb ua neej li cas los ntawm txoj kev hlub, kev ua siab ntev thiab kev paub ua Vajtswv tsaug?
Nyeem Vajluskub hauv peb lub xyoos: Tshwmsim 21
Kênh Youtube BHKTHN:
