Tes Haujlwm 2:1-4
Nqe cim:
“Vaj Ntsujplig tus Dawbhuv los kav tagnrho lawv txhua tus lub siab, ces lawv txawm hais tau lwm yam lus raws li Vaj Ntsujplig kom lawv hais” (Tes Haujlwm 2:4)
Lus nug xav:
– Cov thwjtim sib sau los nyob ua ke ib qho muaj lub ntsiab li cas?
– Tus duab cua thiab hluavtaws qhia tshwm dabtsi txog Vaj Ntsujplig tus cwjpwm thiab Nws tes haujlwm?
– Vaj Ntsujplig pub hwjchim rau peb kom peb ua tiav tes haujlwm twg?
Vaj Ntsujplig kev nqis los hauv hnub Peetekos qhia tawm ntau yam uas tseemceeb heev. Tim ib, Vajtswv cov menyuam muaj kev sib koom (nqe 1). Mloog Tswv Yexus uas ciaj sia sawv rov qab los tej lus “cov ntseeg sawvdaws tuaj nyob ua ke rau hauv ib lub tsev” koom siab thov Vajtswv thiab zov tos. Los ntawm qhov kev sib koom ntawd, Vajtswv lub hwjchim tshwm tawm. Vaj Ntsujplig ua haujlwm muaj hwjchim tshaj plaws thaum Vajtswv cov menyuam ua neej koom siab.
Tim ob, Vaj Ntsujplig lub hwjchim (nqe 2-3). Vaj Ntsujplig nqis los sai heev thiab muaj zog kawg nkaus, tau Vajtswv Txojlus piav qhia hais tias: “suab nrov nroo ntws saum ntuj los ib yam li ib nthwv cua hlob hlob… zoo li tus nplaim taws los…”. Nov yog tus duab ntawm lub hwjchim thiab kev hloov pauv saum ntuj los. Cua yog piv rau kev ua pa, kev tshuab pa ntawm Vajtswv pub kom ciaj sia (Chivkeeb 2:7; Yauhas 20:22), plaim taws yog piv rau kev lim tawm, kev kub siab thiab muaj Vajtswv nyob nrog cig lam lug (Khiavdim 3:2); Malakis 3:2). Cov thwjtim uas ib txwm muaj lub siab ntshai nim no dhau los muaj lub siab tawv, tsis ntshai ua tim khawv rau Vajtswv. Vaj Ntsujplig qhia tawm Vajtswv tus muaj hwjchim uas ciaj sia, Tus uas pub kev hloov pauv dua tshiab, lub siab tawv thiab txojsia rau tus ntseeg. Hnub kevcai Peetekos muaj tiav li Tswv Yexus tau cog lus lawm, cov thwjtim yuav “tau lub hwjchim uas yuav los saum ntuj los” (Lukas 24:49).
Tim peb, ua tiav Vajtswv lub luag haujlwm: Lawv “txawm hais tau lwm yam lus raws li Vaj Ntsujplig kom lawv hais” (nqe 4). Txujci “hais tau lwm yam lus” qhia pom hais tias Txojmoo Zoo yuav tau tshaj qhia rau txhua haivneeg, txhua lub tebchaws. Hnub Peetekos coj txhua haivneeg los koom ua ke rau ntawm Tswv Yexus thiab muab txoj kev ntxhov hnub thaud ntawm tus Pejthuam rhuav pov tseg (Chivkeeb 11). Vajtswv pub lub hwjchim ntawm Vaj Ntsujplig puv npo tsis yog coj los txhawb nqa yus tus kheej tiamsis yog cia kom ua tiav lub luag haujlwm tshaj qhia Txojmoo Zoo. Pawg ntseeg tseem muaj nyob yog ua tus Tswv tes haujlwm ntxiv los ntawm Vaj Ntsujplig lub hwjchim.
Hnub Peetekos tsis yog ib qhov xwm txheej rau keebkwm xwb, tiamsis tseem yog yam uas muaj nyob tamsim no thiab ntxiv mus rau yav tom ntej hauv Vajtswv Pawg ntseeg. Yam uas tau tshwm rau ntawm chav tsev hnub thaud tseem yuav tshwm rau Pawg ntseeg uas koom siab thov Vajtswv nim no. Qhib siab txais yuav Vajtswv lub hwjchim thiab fij tus kheej rau Tswv Yexus lub luag haujlwm. Peb yuav tsum koom siab rau ntawm Vaj Ntsujplig thiab thov Vajtswv, koom nrhiav Vajtswv kom tau Vaj Ntsujplig lub hwjchim hloov peb dua tshiab, kom peb muaj lub siab tawv ua tim khawv rau Tswv Yexus, tshaj qhia Nws txoj kev hlub rau neeg ntiajteb.
Thov Vajtswv,
Vajtswv, ua Koj tsaug uas Koj tau pub Vaj Ntsujplig nqis los rau hnub Peetekos. Thov Koj muab peb txhua tus los koom ua ke rau hauv Koj txoj kev hlub, thiab pub rau peb puv npo Vaj Ntsujplig lub hwjchim kom muaj lub siab tawv ua tim khawv qhia Koj txoj kev hlub rau neeg ntiajteb. Nyuam yaus tuav Tswv Yexus Khetos lub npe thov, Amees.
Vaj Ntsujplig hloov peb lub neej dua tshiab li cas?
Nyeem Vajluskub hauv peb lub xyoos: Tshwmsim14
Kênh Youtube BHKTHN:
