I Petus 5:5-7
Nqe cim:
“yog li ntawd nej cia li muab nej tej kev nyuaj siab huv tibsi tso plhuav rau Vajtswv” (I Petus 5:7)
Lus nug xav:
– Yam dabtsi ua rau qee tus ntseeg Yexus thim rov qab tsis nrog tus Tswv mus lawm?
– Tus Tswv npaj rau Nws haivneeg zoo li cas?
– Zaj kawm no txhawb peb yam dabtsi thaum nrog tus Tswv mus?
Cov ntseeg Yexus ua neej nyob hauv ntiajteb no yuav khiav tsis dhau txojkev txhawj, txomnyem, sim siab, thiab ntau zaus zoo li uas tas kev cia siab lawm. Tej ntawd yog qhov uas thaiv ib cov ntseeg Yexus rov nug tus kheej “Vajtswv puas pom kuv lub neej ne?”, muaj qee tus tu siab, thiab thim rov qab tsis nrog tus Tswv mus lawm.
Tiamsis txhua tus ntseeg Yexus yuav tau nco ntsoov tias Vajtswv yuav npaj txhua yam rau peb, txawm yog tej uas peb hais tsis tau tawm. Cia kom Vajtswv ua tus npaj, peb yuav tsum ua raws li Vajtswv Txojlus hais tias “Nej txhua tus yuav tsum txo nej lub hwjchim… nej yuav tsum txo nej lub hwjchim thiab cia Vajtswv tus uas muaj hwjchim kav nej” (nqe 5-6). Thaum peb txo hwjchim thiab ntseeg ruaj Vajtswv lub hwjchim, lees yuav Nws txojkev coj ces peb thiaj hais tau zoo ib yam li Yauxej hais rau nws cov tijlaug hais tias: “Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawd hloov ua qhov zoo” (Chivkeeb 50:20). Vajtswv ua tsis yog leejtwg ua, “thaum txog hnub uas Vajtswv teem cia lawm, nej yuav tau ntsejmuag” (nqe 6).
Peb ntseeg ruaj tias Vajtswv yuav niaj hnub npaj ua raws li Timthawj Petus tej lus qhia, vim “Vajtswv tsis khuvxim nws tus Tub, tiamsis nws muab nws tus Tub los theej peb sawvdaws lub txhoj, tsis yog nws muab nws tus Tub xwb, tiamsis nws tseem muab txhua yam pub dawb rau peb thiab” (Loos 8:32). Txawm yog li ntawd los, qhov vimchiv ua rau peb tsis tau txais Vajtswv txojkev pab ces yog peb tsis muaj kev ntseeg txaus thiab muab peb lub nra tso rau Nws ris. Yog li, cia kom Vajtswv npaj rau peb, peb yuav tau ua li no “cia li muab nej tej kev nyuaj siab huv tibsi tso plhuav rau Vajtswv” (nqe 7). “ txhua yam kev txhawj xeeb” tsis yog tsuas muab qhia rau Vajtswv tej uas peb ua tsis tau, es ho khaws cia yam uas peb xav tias yus muaj peev xwm ua tau. Txhua tus ntseeg Yexus yuav tau nco ntsoov thiab hais kov kho tias, “Tus Tswv, koj pub kev thajyeeb rau peb; txhua tsav yam uas peb ua tiav lawm, twb yog koj pab peb” (Yaxayas 26:12).
Zaj kawm no txhawb peb zog thaum ntsib kev txomnyem, sim siab, tsis txhob ua tus qaug zog, yws, thim rov qab tso kev ntseeg, tiamsis yuav tau sawv khov kho, ntseeg Vajtswv tas siab. Vim Vajtswv yog tus uas hlub peb, Nws yuav muab yam uas zoo kawg nkaus rau peb raws li lub sijhawm Nws teem cia. Tsis txhob maj mus nrhiav kev pab ntawm tibneeg, tiamsis cia li los cuag Vajtswv, txhos caug, lees txhua yam yus qaug zog, ua tsis tau tso rau Vajtswv thiab “Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv” (nqe 7).
Thov Vajtswv,
Vajtswv, ua tsaug uas Koj hlub thiab npaj txhua yam rau nyuam yaus. Thov pab kom nyuam yaus ua taus siab khov, txo hwjchim thiab ua siab ntev kom ncaj ncees taug txojkev mus saum ntuj ceebtsheej txawm yog yuav ntsib kev nyuaj li cas. Nyuam yaus tuav Tswv Yexus lub npe thov, Amees.
Peb yuav tiv kev txomnyem, sim siab zoo li cas thaum paub tias tus Tswv yuav niaj hnub npaj rau peb?
Nyeem Vajluskub hauv peb lub xyoo: Tshwmsim 3
Kênh Youtube BHKTHN:
