I Pêtrôs 5:5
“Lu đe adruh tơdăm oei hơmuh-hơmŏng, iĕm kư̆m lei-lăi athei chu yom kơ lu đe kră; păng đĭ đăng kơ iĕm hăm lu đe kră athei iŏk jơhngơ̆m đon dim wă kơ chu yom dih băl; yua kơ ‘Bok Kei-Dei ưh kơ wă ôh kơ lu bơngai pơang akâu, Sư tơgŭm lu bơngai dim, lu bơngai băt kơ chu yom kơ đe.” (I Pêtrôs 5:5)
Nơ̆r jet tơchĕng pơwao:
– ‘Bok Pêtrôs bơtho pơlung bơngai lui tơdrong kiơ?
– Yua kơ kiơ đĭ đăng bơngai athei iŏk jơhngơ̆m đon dim?
– ‘Bok Pêtrôs bơtho tơdrong ‘nâu kiơ̆ kơ đơ̆ng yơ?
– ‘Bai pơhrăm tơ’blŏk kơ bơngai oei hơmuh hơmŏng kư̆m thoi bơngai kră wei lăng arih păng bơ̆jang thoi yơ lăm khul bơngai lui?
‘Bok Pêtrôs bơtho kơ lu bơngai lui oei hơmuh hơmŏng athei chu kơ lu kră wei lăng wă khan bơngai mă pơgơ̆r gah bơhngol. Phŏ phŏ lơ wơ̆t lu bơngai pơgơ̆r lăng lu bơngai oei hơmuh hơmŏng ưh kơ rơa kiơ thoi noh ưh kơ mơnat; tơplơ̆ dơ̆ng, bơngai oei hơmuh hơmŏng ưh kơ chu păng ưh kơ mơ̆ng kiơ̆ bơngai pơgơ̆r. Lăm âu ‘bok Pêtrôs ưh kơ pơgŏ lu bơngai oei hơmuh hơmŏng chu kiơ̆ tơdrong kơ đei ôh, mălei sư bơtho pơđĭ kơ lu bơngai pơgơ̆r kư̆m thoi bơngai oei hơmuh hơmŏng “păng đĭ đăng kơ iĕm hăm lu đe kră athei iŏk jơhngơ̆m đon dim wă kơ chu yom dih băl”. Kră wei lăng athei iŏk đon ala bơ̆jang păng bơngai hơmuh hơmŏng kư̆m kăl kơ tơ jur akâu iŏk đon ala chu kơ bơngai kră pơgơ̆r. tơdrong iŏk đon ala tơpă gô tơgŭm kơ bơ̆n mă khan bơ̆n oei ‘bơ̆t sơnăm ayơ kư̆m wă hŏk pơhrăm apinh jet, mơ̆ng păng chu yom dih băl. Păng tơdrong gĭt kăl hloh wă kơ lu bơngai hơmuh hơmŏng chu yom noh tơdrong arih đơ̆ng bơngai kră wei lăng, đĭ jơhngơ̆m bơ̆jang păng ling lang pơm kơmĭl ‘lơ̆ng kơ bơngai lui (I Pêtrôs 5:1-4).
Pêtrôs bơtho dôm tơdrong ‘nâu kiơ̆ kơ nơ̆r Kră Yang Yêsu bơtho kơplah Sư ôp jơ̆ng lu bơngai pơhrăm păng Sư, Sư đei chih răk lăm jơhngơ̆m ưh kơ layơ hiơt. Hăm lu bơngai pơhrăm păng Sư, Kră Yang Yêsu bơih ‘Bok Kei-Dei kư̆m jơ̆ ‘bok Thây, mălei Sư iŏk akơn chô̆ ‘bơ̆t rơhiĕo Sư tuh đak lăm kơthao na ôp jơ̆ng lu bơngai pơhrăm păng Sư, mă khan ‘bok Juđa Ikariôt Sư kư̆m ôp mơ̆n (Yôhan 13:3-5). Kră Yang Yêsu chô̆ kơn ‘bơ̆t rơhiĕo hăm che tơdrong iŏk đon ala, păng Sư bơtho kơ bơ̆n lu bơngai mă kiơ̆ Sư kư̆m athei iŏk đon dim chu yom dih băl. Đơ̆ng kơ mĭl đon ala đơ̆ng Kră Yang Yêsu pơdrŭt lu kon Kră Yang pơ̆n nuih tơ’bôh tơdrong arih iŏk đon ala, chu yom dih băl. Tơdrong nai dơ̆ng, Pêtrôs kư̆m iŏk nơ̆r Kră Yang lăm Tơdrong Pơđơ̆k 3:34 wă bơtho kơ lu bơngai kră wei lăng kư̆m thoi bơngai hơmuh hơmŏng. Bơngai đei tơdrong arih iŏk đon ala. Hiôk hơiă dih băl, chu yom gô mơ̆n đei pŭn hiôk đơ̆ng Kră Yang ăn ‘noh bơih tơdrong arih bơ̆jang, chu yom đei Kră Yang lăp đon.
Khul bơngai lui kăl dêh bơngai kră wei lăng bơ̆jang hăm jơhngơ̆m iŏk đon ala, pơm kơmĭl ‘lơ̆ng, băt mơnat, tơdrong kĕ chơ̆n wă tơiung, pơtrŭt bơtho tơ’bôh bơngai hơmuh hơmŏng bơ̆jang kơ Kră Yang. Jing bơngai hơmuh hơmŏng, athei yua iŏk sơnăm oei tơdăm, jơhngơ̆m pran, tơdrong hlôh wao, jơhngơ̆m tŏ chhông pơgơ̆p hơdai hăm tơdrong iŏk đon ala chu yom păng băt mơ̆ng. Hơpơi wă kơ đĭ đăng kơ bơ̆n hơdai băl đĭ jơhngơ̆m bơ̆jang kơ Kră Yang ba ăn đei yua, pơư pơang kơ ‘Bok Kei-Dei.
Ơ Kră Yang iơ̆m dim, inh bơnê kơ Ih yua kơmĭl iŏk đon ala đơ̆ng Kră Yang Yêsu ling lang tơ’blŏk kơ inh iŏk jơhngơ̆m đon dim. Apinh Ih ăn kơ đĭ đăng lu nhôn mă khan sơnăm ayơ kư̆m đĭ jơhngơ̆m hơdai bơ̆jang kơ Kră Yang wă pơjing Khul bơngai lui. Wơ̆ pran, krao khan yua anăn Kră Yang Yêsu Krist, Amen.
Bơ̆n đei iŏk jơhngơ̆m đon dim bơ̆jang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 2
Kênh Youtube BHKTHN:
