I Petus 5:5
Nqe cim:
“Ib yam nkaus li ntawd, nej cov uas yog tub hluas, nej yuav tsum mloog cov yawg laus tej lus. Nej txhua tus yuav tsum txo nej lub hwjchim thiab ib tug pab ib tug; rau qhov Vajtswv txojlus hais tias, Vajtswv tawmtsam tus uas khavtheeb, tiamsis Vajtswv pub koob hmoov rau tus uas txo hwjchim” (I Petus 5:5)
Lus nug xav:
– Timthawj Petus ntuas cov ntseeg hluas yam dabtsi?
– Vim li cas tagnrho txhua tus neeg yuav tsum txo hwjchim?
– Timthawj Petus qhia yam no raws li qhovtwg?
– Cia li ntuas cov hluas, cov ua thawjcoj ua neej thiab ua haujlwm li cas hauv Pawg Ntseeg?
Timthawj Petus ntuas cov ntseeg hluas kom yuav tsum mloog cov txwjlaug lus. Ntau zaus tus thawjcoj saib tsis taus cov hluas, yog li ua tsis taus siab ntev; dua li, cov hluas tsis mloog lus lossis tsis ua raws li cov thawjcoj hais. Ntawm no Timthawj Petus tsis yuam cov hluas yuav tsum mloog lus txhua yam, tiamsis Petus qhia cov hluas thiab cov thawjcoj “txhua tus yuav tsum txo nej lub hwjchim thiab ib tug pab ib tug”. Tus thawjcoj yuav tau txo hwjchim ua haujlwm thiab cov hluas kuj yuav tau txo hwjchim mloog lawv hais. Txojkev txo hwjchim yuav ua rau txhua hom neeg txaus siab txo hwjchim kawm, mloog thiab ua siab ntev. Thiab qhov tseemceeb dua cia kom cov hluas mloog lus yog los ntawm cov thawj kev ua neej, ua haujlwm thiab ua qauv zoo rau pab yaj (I Petus 5:1-4).
Timthawj Petus qhia tej no raws li Tswv Yexus cov lus qhia thaum Nws ntxuav cov thwjtim kotaw, Petus kawm tau tus qauv no zoo heev. Hais txog cov thwjtim, Tswv Yexus ib ke yog Vajtswv ib ke yog xibhwb, tiamsis Nws txaus siab hlo muab ib txoj phuam los sia ntawm duav, muab dej los thiab ntxuav cov thwjtim kotaw, ntxuav leej Yudas Ixakali-us (Yauhas 13:3-5). Tswv Yexus muab txoj phuam los sia ntawm duav qhia tias Nws txo hwjchim, thiab Nws qhia rau peb cov uas nrog Nws mus yuav tsum txo hwjchim ib leeg pab ib leeg. Los ntawm Tswv Yexus tus qauv txo hwjchim, txhawb zog rau Vajtswv cov menyuam ua tau siab tawv qhawv qhia tshwm lub neej txo hwjchim, ua haujlwm pab txhua tus. Dua li, Timthawj Petus kuj muab Vajtswv Txojlus hauv Pajlug 3:34 los txhawb cov thawjcoj thiab cov hluas. Tus neeg uas ua neej txo hwjchim, nyob sib haum, mloog lus yuav tau txais Vajtswv tej koob hmoov. Nov yog lub neej ua haujlwm,, mloog lus, haum tus Tswv siab.
Vajtswv Pawg Ntseeg cheemtsum cov thawjcoj ua haujlwm los ntawm lub siab txo hwjchim, ua qauv, paub mloog, ua siab ntev rau cov hluas. Thov Vajtswv pub rau cov thawjcoj siv tej kev ua neej, kev paub, ua siab ntev, zam txim los txhawb zog, pab, coj qhia cov hluas hlub Vajtswv. Yog tus neeg hluas, cia li siv tagnrho lub neej hluas, dag zog, kev txawj ntse, lub siab nquag nrog rau kev txo hwjchim ua neeg mloog lus mloog hais. Thov kom peb txhua tus koom siab ua tus Tswv tes haujlwm, kom tawg paj txi txiv, ua rau Vajtswv tau ntsejmuag.
Thov Vajtswv,
Vajtswv tus uas siab ntev, ua tsaug vim Tswv Yexus tus qauv txo hwjchim qhia nyuam yaus paub ua neej txo hwjchim. Thov Koj pub rau peb txhua tus txawm yog yuav nyob rau lub hnubnyoog twg los peb sib pab ua Koj tes haujlwm kom Pawg Ntseeg loj hlob vammeej. Nyuam yaus tuav Tswv Yexus lub npe thov, Amees.
Peb tabtom hnav txojkev txo hwjchim ua haujlwm zoo li cas?
Nyeem Vajluskub hauv peb lub xyoo: Tshwmsim 2
Kênh Youtube BHKTHN:
