Klei Aê Diê Blŭ: I Kôrantô 1:17-18
Êlan kliăng: “Kyuadah klei mtô kơ kyâo bi kal jing klei khŏ kơ phung dôk rai luč, ƀiădah ñu jing klei myang Aê Diê kơ phung drei Aê Diê dôk bi mtlaih.” (I Kôrantô 1:18)
Klei êmuh ksiêm mĭn: Ya klei khua ƀĭng kna Y-Pôl kñăm mtô ktuê jih thŭn mlan ñu djă bruă? Si klei mtô anăn jing, hŏng phung lăn ala? Bi hŏng drei, ya klei yuôm mơ̆ng klei mtô anăn?
Khua ƀĭng kna Y-Pôl hưn kñăm Yang Krist yơh tiŏ nao ñu hiu mtô Klei Mrâo Mrang Jăk (êlan 17). Leh anăn Klei Mrâo Mrang Jăk ñu hiu mtô ktuê jih thŭn mlan ñu mă bruă, anăn jing klei mtô kơ kyâo bi kal Khua Yang Yêsu. Ñu amâo yua klei knhâo mbruă ñu, klei ñu thâo blŭ ôh čiăng mtô Klei Mrâo Mrang Jăk anăn, ƀiădah hŏng klei myang kyâo bi kal.
Hŏng lu mnuih, kyâo bi kal jing klei awăt êdu leh anăn klei hêñ mlâo. Si klei bi mtlaih dưi truh hŏng klei sa čô mnuih arăng pơ̆ng ti kyâo bi kal? Si klei dưi hĭn dưi mâo hŏng klei knap mñai leh anăn klei djiê? Hlăm ênuk phung Rôm kiă kriê, arăng pơ̆ng ti kyâo bi kal jing gui klei hêñ jhat kjham hĭn kơ jih jang klei mkăn. Ƀiădah khua ƀĭng kna Y-Pôl brei thâo, jih jang ya klei phung lăn ala yap jing klei khŏ, boh sĭt jing klei thâo mĭn Aê Diê. Kyâo bi kal brei ƀuh êlan Khua Yang kdlưn hĭn kơ êlan drei, leh anăn hdră Ñu bi mtlaih mnuih kdlưn êgao hĭn kơ klei anak mnuih dưi thâo săng.
Hŏng hlei pô đăo, kyâo bi kal amâo djŏ jing klei khŏ ôh, ƀiădah jing klei myang Aê Diê. Ti kyâo bi kal yơh, nư klei soh tla brei leh, leh anăn klei kpă ênô Khua Yang ăt djă pioh nanao. Mbĭt hŏng klei anăn, klei khăp Khua Yang tuh brei leh hŏng klei pap brei klei soh leh anăn brei klei bi grăng kơ phung mnuih soh. Kyâo bi kal amâo knŏng jing sa klei bi knăl ôh; anăn jing anôk kpă ênô leh anăn klei khăp Aê Diê bi tuôm mbĭt. Klei lăn ala yap jing klei dlưh lĕ, snăn klei đăo yap jing klei dưi hĭn. Klei lăn ala pia jing klei khŏ, snăn klei đăo thâo kral anăn jing klei myang Aê Diê. Klei mtô kơ kyâo bi kal jing klei mtô kơ klei myang leh anăn klei khăp Aê Diê pioh kơ anak mnuih (êlan 18). Knŏng kyâo bi kal anôk Khua Yang Yêsu tŭ klei djiê, kơh dưi mâo klei myang bi mtlaih, kyuadah tinăn jing anôk klei kpă ênô leh anăn klei khăp klei pap Aê Diê dưi wĭt lač. Khua ƀĭng kna Y-Pôl bi klă mơh snei : “Bi kơ kâo, kâo amâo srăng bi mni kơ kâo pô ôh, knŏng hlăm kyâo bi kal Khua Yang drei Yêsu Krist. Hŏng kyâo bi kal lăn ala djiê leh kơ kâo, leh anăn kâo djiê leh kơ lăn ala.” (Galati 6:14).
Drei amâo knŏng mâo klei iêô brei đăo, ƀiădah wăt brei dôk hdĭp hlăm klei myang kyâo bi kal msĕ mơh. Brei hdĭp hŏng klei thâo hdơr knga, amâo hưn ktưn kơ pô ôh, ƀiădah brei mơak hưn mni kơ kyâo bi kal Yang Krist. Kyâo bi kal amâo knŏng rơ̆ng brei hjăn kơ klei bi mtlaih ôh, ƀiădah wăt bi mjing klei hdĭp drei grăp hruê msĕ mơh, iêô mthưr brei drei thâo bi khăp, săn asei mlei, bi pap brei hŏng klei kmah leh anăn dôk hdĭp kpă ênô čiăng lŏ wĭt lač kơ klei pap prŏng Khua Yang brei kơ drei.
Si drei mơak hưn mni kơ kyâo bi kal Yang Krist hlăm klei drei dôk hdĭp grăp hruê?
Wah lač: Ơ Khua Yang, akâo klei mtô Klei Mrâo Mrang Jăk leh anăn klei myang kyâo bi kal ngă bruă hlăm klei hdĭp kâo nanao. Đru kâo mơak hưn mni kyâo bi kal Yang Krist leh anăn klei khăp Khua Yang kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 92-93
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
