Loos 3:21-26
Nqe cim:
“Yav tas los Vajtswv ua siab ntev thiab tsis rau txim rau cov neeg uas ua txhaum.” (Loos 3:25b)
Lus nug xav:
– Timthawj Paulus piav li cas txog Vajtswv txojkev ncaj ncees??
– Tibneeg tau suav hais tias yog neeg ncaj ncees los ntawm dabtsi?
– Tswv Yexus txojkev tuag txhiv saum ntoo khaublig muaj ntsiab lus li cas rau tibneeg ntiajteb thiab rau peb tus kheej?
Tshooj Vajluskub no qhia pom txog tibneeg txhaum qhov kev cheemtsum kawg nkaus, thiab txojkev cawmdim ci ntsa iab uas los ntawm Vajtswv los, dhau ntawm Tswv Yexus tus ntoo khaublig. Nyob saum lub roob Khaulakhauthas, tus Tswv txojkev ncaj ncees thiab txojkev hlub tau sib ntsib txhij txhua.
Thaum piav txog Vajtswv txojkev ncaj ncees thiab txoj kevcai, Timthawj Paulus qhia rau peb paub hais tias txoj kevcai qhia tshwm Vajtswv txojkev ncaj ncees tiamsis tsis muaj peevxwm cawm tau tibneeg txhaum. Nws qhia meej hais tias tsuas yog dhau ntawm txojkev ntseeg Cawmseej Yexus, tibneeg thiaj li tau suav hais tias yog neeg ncaj ncees (nqe 21-22), “rau qhov txhua tus puavleej ua txhaum thiab tu ncua Vajtswv lub tshwjchim lawm” (nqe 23). Vajtswv txojcai dawbhuv qhia peb pom hais tias peb muaj txim thiab tsis muaj cuabkav cawm tau peb tus kheej, tibneeg yuav tsis muaj hnub ua tau raws li Vajtswv txojkev ncaj ncees. Tiamsis los ntawm txojkev hlub tshua, tus Tswv tau qhia tshwm Nws txoj koob hmoov hlub uas loj kawg nkaus rau tibneeg dhau los ntawm Tswv Yexus (nqe 24). Txojkev ncaj ncees tsis yog los ntawm peb qhov kev sib zog lossis kev ua raws li txoj kevcai ntxiv lawm, tiamsis yog Vajtswv txoj koob hmoov pub dawb dhau ntawm Tswv Yexus. Peb tau suav hais tias yog neeg ncaj ncees los ntawm tus Tswv txoj koob hmoov hlub thiab dhau ntawm txojkev ntseeg rau kev tuag txhiv uas Tswv Yexus tau ua tiav lawm (Efexus 2:8). Tau ua neeg ncaj ncees txhais tau hais tias tau Vajtswv tshajtawm hais tias yog neeg ncaj ncees: peb tej kev txhaum raug tshem tawm, nuj nqis raug them, thiab peb lub neej tau ntxuav huv si lawm. Qhov no tagnrho yog Vajtswv pub dawb xwb (Loos 6:23).
Ntoo khaublig yog qhov chaw uas Vajtswv txojkev dawbhuv tawmtsam nrog tibneeg tej kev txhaum, tiamsis kuj yog qhov chaw uas Vajtswv txojkev hlub coj kev cawmdim los. “Vajtswv txib Yexus Khetos los tuag theej neeg lub txhoj thiab nws cov ntshav ntxuav neeg tej kev txhaum, Vajtswv thiaj zam tau neeg lub txhim, vim neeg ntseeg Yexus Khetos” (nqe 25). Yog hais tias Vajtswv tso tseg twjywm tsis rau txim rau txojkev txhaum, ces Nws yuav tsis yog tus ncaj ncees. Yog Nws txiav txim rau peb tsis muaj txojkev hlub tshua, peb yuav raug puastsuaj. Tiamsis nyob hauv Tswv Yexus txojkev tuag txhiv, Nws yeej muaj kev ncaj ncees txhij txhua thaum Nws pub txoj koob hmoov hlub rau cov neeg muaj txim.
Nyob saum ntoo khaublig, Vajtswv txojkev ncaj ncees tau ua tiav thiab Nws txojkev hlub tshua tau nchuav lug. Nws txojkev chim tau muab tso rau saum Tswv Yexus tawmtsam txojkev txhaum, tib lub sijhawm ntawd Nws txoj koob hmoov hlub tau nchuav lug rau txhua tus uas ntseeg. Li ntawd, ntoo khaublig tsis tsuas yog yam cuabyeej cawm peb dim xwb tiamsis tseem yog qhov chaw uas qhia tshwm siab tshajplaws txog Vajtswv tus yam ntxwv: Nws ib ke ncaj ncees ib ke hlub tshua; ib ke dawbhuv ib ke siab zoo. Thov tus Tswv pab peb tuav ruaj lubneej dawbhuv, muaj txojkev hlub thiab mob siab qhia tshwm tus Tswv txojkev hlub rau lwm tus.
Thov Vajtswv,
Vajtswv, nyuam yaus ua Koj tsaug vim nyuam yaus tsuas yog ib tug neeg txhaum tsim nyog tuag xwb, tiamsis los ntawm Koj txojkev tuag txhiv ua rau nyuam yaus tau ua neeg ncaj ncees. Thov pab nyuam yaus ua lubneej tsim nyog rau txoj koob hmoov hlub uas Koj tau muab rau nyuam yaus. Nyuam yaus tuav Tswv Yexus Khetos lub npe thov, Amees.
Peb puas txais tau tus Tswv txojkev hlub thiab txojkev ncaj ncees uas muab rau peb tus kheej lawm tau?
Nyeem Vajluskub hauv peb lub xyoos: Daniyees 11
Kênh Youtube BHKTHN:
