Rôm 5:6-11
“Na kơplah bơ̆n oei pơm yoch, lăp minh ‘nu Yêsu Krist đĕch lôch tang bơ̆n. ‘Noh boih bơ̆n băt kơ ‘Bok Kei-Dei ‘mêm kơ kon bơngai bơ̆n tơpă.” (Rôm 5:8)
Nơ̆r jet tơchĕng pơwao:
- Yua kơ kiơ ‘long pơglang bơih tơdrong pơsĭt rơđah ăn kơ tơdrong ‘mêm tih hlich chrơp đơ̆ng Kră Yang?
- Kră Yang Yêsu chu lôch tơ ‘long pơglang ba ăn tơdrong kiơ kơ lu bơngai yoch?
- Lu bơ̆n pơm tơdrong kiơ kơplah arih lăm tơdrong sĭt trŏ âu?
Pơih nơ̆r blŭng a, Pôl đei tơbăt kơplah lu bơ̆n đei pơm yoch na Kră Yang Yêsu chu lôch yua kơ lu bơ̆n. Kon bơngai phŏ kơnh đei mơ̆n lôch ăn kơ bơngai ‘lơ̆ng, mă lei tơdrong Kră Yang Yêsu lôch ‘noh jơ̆ hloh kơ đĭ đăng tơdrong lôch nai, Sư lôch yua kơ bơngai yoch ‘noh jơ̆ tơ’bôh kơ tơdrong ‘mêm hlich chrơp dêh!
Tơdrong dŏng pơklaih ưh kơ trŏ tơdrong apah đơ̆ng bơ̆n jang dah pơm tơdrong kiơ ôh, mă lei đei Kră Yang song ăn đĕch kơ lu bơ̆n kơplah bơ̆n oei ayăt hăm Sư (trong 8). Tơ kông Gôlgôtha, tơdrong tơpăt sĭt hăm tơdrong ‘mêm đei tơ’bơ̆p; tơdrong ‘lơ̆ng tơpăt Kră Yang ưh kơ gơh lê̆ hlôi tơdrong đêl pơm ôh, mă lei tơdrong ‘mêm Sư kư̆m ưh kơ hŭt lê̆ bơngai yoch. ‘long pơglang jơ̆ tơ’bôh kơ tơdrong tơpăt sĭt păng tơdrong ‘mêm ‘bĕnh blai. Tơdrong ‘mêm Kră Yang ưh kơ khan yua kơ bơ̆n đei pơm tơdrong kiơ bơih. Kră Yang băt kơ kon bơngai bơ̆n ưh kơ gơh hơmet tơplih đơ̆ng lăm bơhngol, dah pơsĭt kơ tơdrong tơpăt. Kră Yang đei jang ăn kơ bơ̆n kơplah bơ̆n ưh kơ gơh pơm minh tơdrong kiơ. Thoi noh, ‘long pơglang noh jơ̆ tơbôh hơđăl rơđah dêh kơ tơdrong ‘mêm mă hloh kơ đon kon bơngai bơ̆n đei tơchĕng: tơdrong ‘mêm wă năm tơ lu bơngai mă lăng kơdih sư ưh kơ đei yua kiơ.
Yua kơ pham ‘Bok Krist lu bơ̆n gơh jô̆ jing ‘lơ̆ng tơpăt păng đei dŏng đơ̆ng tơdrong hil mĭl đơ̆ng Kră Yang (trong 9). Tơdrong hil mĭl noh jơ̆ ‘Bok Kei-Dei đei pơm yua kơ tơdrong yoch kon bơngai. Tơdah lê̆ tơdrong hlôi ling lang ưh kơ đei hil mĭl, lei tơdrong ‘lơ̆ng tơpăt Kră Yang nhen thoi ưh kơ gĭt. Mă lei trŏ kơ kon bơngai đei pŭ iŏk tơdrong phak, Kră Yang ‘Bok Kei-Dei đei dan tơdrong ‘noh ăn kơ Kon Sư kơdih pŭ iŏk noh jơ̆ Kră Yang Yêsu. Tơ ‘long pơglang tơdrong yoch đei sek tơlang bơih, kư̆m dai đei tơdrong mơnat tuh ăn kơ lu bơngai yoch gơh đei mơnat păng đei tơdrong a-rih ‘nao.
Yua kơ tơdrong yoch ba ăn kơ bơ̆n jing ayăt hăm ‘Bok Kei-Dei, ataih đơ̆ng Kră Yang, păng arih ayăt kơ ‘Bok Kei-Dei (trong 10a). Yua kơ đơ̆ng tơdrong Kră Yang Yêsu lôch, lu bơ̆n gơh hiôk hơ iă hăm ‘Bok Kei-Dei, gơh tơ’bưh hăm ‘Bok Kei-Dei ưh kơ đei tơdrong kiơ pơgăn jing kon Sư mă ‘mêm kơ eng, tơdrong hơlam ‘noh kơjăp yua kơ tơdrong Kră Yang Yêsu iung arih đơ̆ng lôch (trong 10a)
Pơtôch kơ lăm chăl âu đei nơ̆r krao lăm tơdrong hiôk chơt: “Thoi noh na dang ei bơ̆n chơt hiôk hăm ‘Bok Kei-Dei boih, yua kơ Yêsu pơm ‘long sơlam kơ bơ̆n hăm ‘Bok Kei-Dei; yua kơ Yêsu na bơ̆n gơh hiôk hăm ‘Bok Kei-Dei.” (Rôm 5:11). ‘Bơ̆t ‘long pơglang noh jơ̆ tơdrong ‘mêm hăm tơdrong hil mĭl đei tơ’bơ̆p băl. ‘Bơ̆t ‘noh, lu bơ̆n đei ‘bôh tơdrong tih krưp gah tơdrong yoch, kư̆m dai mơn kơ tơdrong mơnat tih tin ưh kơ băt dang yơ đơ̆ng ‘Bok Kei-Dei. Kơplah bơ̆n arih yua kơ tơdrong sĭt âu, lu bơ̆n đei tơdrong rơngei hăm tơdrong chhôk hal, dơ̆ng kơjăp lăm tơdrong chang sơmĕng, păng đei nơ̆r krao kăl kơ tơ’bôh tơdrong ‘mêm hăm mơnat kơ bơngai nai yua kơ bơ̆n đei sơng bơih ‘mêm đơ̆ng Kră Yang.
Kơkuh kơ Kră Yang, apinh Ih tơgŭm inh ling lang kơ ‘blŏk kơ tơdrong Ih đei chu lôch tơ ‘long pơglang yua kơ tơdrong yoch inh wă kơ inh arih trŏ thoi Ih wă kiơ̆ thoi tơdrong mơnat păng tơdrong ‘mêm mă Ih đei ‘măn ăn kơ inh bơih. Yua anăn Kră Yang Yêsu Krist. Amen
Lu bơ̆n hăm đei băt kơ tơdrong ‘mêm hlich chrơp Kră Yang đei tơ’bôh tơ kơpal ‘long pơglang ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 10
Kênh Youtube BHKTHN:
