Klei Aê Diê Blŭ: Rôm 5:6-11
Êlan kliăng: “Ƀiădah Aê Diê bi êdah klei Ñu khăp kơ drei snei, êjai drei ăt jing mnuih soh Krist djiê kyua drei.” (Rôm 5:8)
Klei êmuh ksiêm mĭn: Si ngă kyâo bi kal jing klei hưn bi sĭt kơ klei khăp yuôm bhăn Khua Yang? Ya klei ba brei kơ phung mnuih soh mơ̆ng klei Khua Yang Yêsu tŭ klei djiê ti kyâo bi kal? Ya klei drei ngă tơdah dôk hdĭp hlăm klei sĭt nik anei?
Kčưm dơ̆ng, khua ƀĭng kna Y-Pôl brei thâo, êjai drei adôk jing mnuih soh, Khua Yang Yêsu tŭ klei djiê kyua drei leh. Anak mnuih năng ai dưi djiê brei kơ mnuih kpă, ƀiădah Khua Yang Yêsu tŭ klei săn asei mlei kdlưn hĭn kơ jih jang klei, Ñu djiê kyua mnuih soh. Anăn yơh jing bi êdah klei khăp yuôm bhăn!
Klei bi mtlaih amâo djŏ jing klei mưn kơ bruă ngă amâodah ênoh yuôm drei ôh, ƀiădah Khua Yang brei leh kơ drei êjai drei adôk jing phung roh hŏng Ñu (êlan 8). Ti cư̆ Gôlgôtha, klei kpă ênô leh anăn klei khăp bi tuôm mbĭt leh: klei doh jăk Khua Yang amâo dưi lui ôh klei soh, leh anăn klei khăp Ñu amâo lui ôh mnuih soh. Kyâo bi kal yơh jing anôk klei kpă ênô dưi ngă bi leh, leh anăn klei khăp êbeh dlai. Klei khăp Khua Yang amâo kna ti dlông ya mta klei čoh čuăn tĭng kơ drei ôh. Ñu thâo anak mnuih amâo dưi bi mkra, bi mlih knuih hjăn păn pô ôh, amâodah hưn bi sĭt klei sĭt suôr ôh. Khua Yang ngă leh êjai drei amâo dưi ngă sa mta klei ôh. Kyuanăn yơh, kyâo bi kal yơh jing klei hưn bi sĭt guh kơang kơ klei khăp kdlưn êgao hĭn kơ jih jang klei mnuih dưi thâo săng: klei khăp kơ phung mnuih amâo mâo klei năng ôh.
Hŏng êrah Yang Krist drei dưi yap kpă leh anăn dưi tlaih mơ̆ng klei Aê Diê ngêñ (êlan 9). Klei ngêñ jing klei wĭt ngă kpă ênô Aê Diê hŏng klei soh. Tơdah lui hĕ klei soh, klei kpă ênô Ñu srăng bi mtrŭn ti gŭ. Ƀiădah hrô kơ klei brei phung mnuih klam boh jhat klei soh, Aê Diê mdưm klei klam ktrŏ anăn ti dlông Anak Ñu jing Khua Yang Yêsu. Ti dlông kyâo bi kal, klei soh tŭ klei phat kđi klă ktang leh, hrăm mbĭt hŏng klei pap tuh brei leh čiăng kơ phung mnuih soh mâo klei pap brei klei soh leh anăn mă tŭ klei hdĭp mrâo.
Klei soh yơh bi mjing drei jing phung roh hŏng Khua Yang, bi kbưi drei hŏng Khua Yang, leh anăn hdĭp bi kdơ̆ng hŏng Ñu (êlan 10a). Kyua hŏng klei djiê Khua Yang Yêsu, drei dưi mâo klei bi grăng, dưi atăt ba wĭt hlăm klei bi mguôp hŏng Aê Diê, dưi jing anak Ñu khăp hơiêng. Klei bi grăng anăn mâo klei rơ̆ng kjăp kyua hŏng klei Khua Yang Yêsu kbiă lŏ hdĭp leh (êlan 10b).
Trăn Klei Aê Diê Blŭ anei bi ruê̆ hŏng klei iêô mthưr hơ̆k mơak: “Amâo djŏ dŭm anăn ôh, ƀiădah msĕ mơh drei hơ̆k mơak hlăm Aê Diê kyua Khua Yang drei Yêsu Krist. Hlăm Gơ̆ yơh drei mâo leh klei bi grăng hŏng Aê Diê” (êlan 11). Kyâo bi kal jing anôk klei ngêñ leh anăn klei khăp bi tuôm mbĭt. Tinăn, drei ƀuh hnơ̆ng ktrŏ kjham klei soh, mbĭt hŏng thâo kral klei pap prŏng prĭn Aê Diê. Tơdah dôk hdĭp hlăm klei sĭt nik anei, drei mâo klei êngiê hơ̆k mơak, dôk kjăp hlăm klei čang hmăng, leh anăn iêô mthưr bi lar klei khăp hrăm mbĭt hŏng klei pap drei pô mă tŭ leh.
Si ngă drei thâo kral mơ̆ klei khăp yuôm bhăn Khua Yang bi êdah leh ti dlông kyâo bi kal?
Wah lač: Ơ Khua Yang, akâo Khua Yang đru kâo thâo kral nanao klei Khua Yang săn asei mlei ti kyâo bi kal kyua klei soh kâo, čiăng kâo dưi dôk hdĭp năng hŏng klei khăp klei pap Khua Yang pioh brei leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniel 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
