Klei Aê Diê Blŭ: I Y-Timôthê 5:3-16
Êlan kliăng: “Hlei pô jing mniê djiê ung sĭt, dôk hjăn păn, čang hmăng kơ Aê Diê leh anăn hruê mlam dôk gĭr kwưh leh anăn wah lač” (I Y-Timôthê 5:5)
Klei êmuh ksiêm mĭn: Mâo dŭm hdră hdĭp klei hdĭp phung mniê djiê ung, leh anăn anăn jing si klei hdĭp? Ya klei mñă kơ drei mơ̆ng klei hdĭp anăn?
Klei hdĭp phung mniê djiê ung hlăk mphŭn dô dleh dlan snăk. Klei Aê Diê Blŭ lu blư̆ lač leh kơ bruă klam phung đăo brei mđing uêñ, kriê dlăng kơ phung mniê djiê ung (Klei Mtô Mñă Klei Bhiăn 10:18; 14:29; 24:21,…). Trăn Klei Aê Diê Blŭ hruê anei amâo djŏ knŏng jing klei mñă mơ̆ng Khua ƀĭng kna Y-Pôl kơ phung kiă biăp kơ klei brei kriê dlăng phung mniê djiê ung hlăm Phung Sang Aê Diê ôh, ƀiădah lŏ mâo klei mtô yuôm bhăn kơ phung mniê djiê ung dôk hdĭp hlăm klei dleh dlan kơ ai tiê leh anăn mnơ̆ng dhơ̆ng.
Mâo dua hdră hdĭp klei hdĭp mniê djiê ung mâo lač hlăm êlan 3-16. Tal sa, phung mniê djiê ung hdĭp hlăm klei hdĭp “bi truh klei phat kđi kơ diñu pô” (êlan 11-15). Anei jing phung mniê djiê ung hlăk ai, leh anăn năng ai lač wăt kơ phung amâo djŏ dôk hlăk ai ôh. Klei kơ phung anei jing “khăng dôk hơăi mang” kyua anăn mưng “hiu sang anei sang adih”, “jing phung djưč leh anăn hiu yăl dliê kơ bruă arăng”, “blŭ klei amâo năng blŭ ôh” (êlan 13). Phung mniê djiê ung dôk hơăi mang khăng yua hruê mmông hŏng klei hơăi mang, boh nik ba klei jhat, hŏng klei yăl dliê kơ bruă pô mkăn, blŭ êkŭt kơ pô mkăn. Diñu jing phung mniê djiê ung “khăp kơ klei hlăp lêñ”, phung “bi ktlah mơ̆ng Krist yơh” (êlan 11) leh anăn “klah đuĕ leh čiăng tui hlue Satan” (êlan 15). Mta phŭn jing phung mniê djiê ung anei dôk hlăm klei mưng bi kah mbha mnuih hŏng mnuih leh anăn klư̆ digơ̆ hlăm anôk kbưi hŏng Aê Diê.
Tal dua, jing phung mniê djiê ung dưm ai tiê “čang hmăng kơ Aê Diê”. Anei jing phung mniê djiê ung bi liê hruê mmông pô hlăm bruă “gĭr kwưh leh anăn wah lač” (êlan 5), “ngă djăp mta bruă jăk” (êlan 9-10). Lač mdê, diñu jing phung amâo gun kpăk bruă kriê dlăng ung, anak ôh kyua anăn yua leh hruê mmông pô kơ klei hdĭp mngăt myang hŏng Aê Diê leh anăn jing tŭ dưn kơ pô mkăn. Diñu amâo brei pô jing “mưng dôk hơăi mang” ôh, ƀiădah yua hruê mmông kơ ya klei đru pô dôk giăm Aê Diê leh anăn tŭ dưn kơ Aê Diê lu hĭn.
Khua pô mtô Warren W. Wiersbe lač, klei thâo brei ƀuh phung mniê djiê ung huĭ mpŭ jing “sang pui kmlă klei hdĭp mngăt kơ Phung Sang Aê Diê”. Diñu jing ai ktang mơ̆ng mmông bi kƀĭn wah lač, diñu myơr pô kơ bruă čuă čhưn, kriê dlăng, mđing hmư̆ pô mkăn. Bi phung mniê amâo huĭ mpŭ jing klei ktrŏ kơ Phung Sang Aê Diê, kyua pô anăn brei mâo Phung Sang Aê Diê mđing dlăng, jing “Sang mkra mjing hdăng” (bi hmô kơ klei blŭ duñ duñ), mâo nanao klei blŭ duñ duñ, blŭ ƀuah kơ pô mkăn.
Wăt tơdah drei jing phung mniê djiê ung amâodah hơăi, akâo kơ Khua Yang đru drei đăm alah, dôk hơăi mang ôh, blŭ klei amâo năng ôh, ƀiădah brei yua hruê mmông wăn kơ bruă tŭ dưn, mđĭ klei đăo knang kơ Khua Yang leh anăn “hruê mlam gĭr wah lač”.
Si drei dôk yua hruê mmông pô wăn?
Wah lač: Ơ Khua Yang, kâo ăt dôk yua hruê mmông pô hŏng klei hơăi mang leh anăn jhat. Akâo kơ Ih đru kâo mdih čiăng yua hruê mmông mđĭ klei đăo knang kơ Khua Yang, gĭr ai tiê wah lač leh anăn ngă bruă tŭ dưn kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniêl 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
