Bơtho Khôi Juăt 15:7-11
“Pŭn dêh lu bơngai mă băt mơnat kơ đe, ‘Bok Kei-Dei kư̆m mơnat kơ lu sư mơ̆n.” (Mathiơ 5:7)
Nơ̆r jet tơchĕng pơwao:
– Bu jơ̆ bơngai mă bơ̆n kăl kơ mơnat?
– Tơdrong ayơ jơ̆ tơdrong kăl wă tih hloh lu bơngai jum dăr kăl kơ bơ̆n pơm kơ lu sư?
– Bơ̆n oei pơm tơ’bôh jơhngơ̆m ‘mêm mơnat hăm bơngai nai thoi yơ?
Lăm tơdrong pŭn mă 5 Kră Yang Yêsu lăp pơma ‘bơm kơ “lu bơngai mă băt mơnat kơ đe” na ưh kơ đei tơbăt bơngai mă đei mơnat noh, thoi noh Kră Yang wă bơtho kơ lu kon pơlei dêh char ‘Bok Kei-Dei wă kơ băt mơnat kơ đĭ đăng bơngai đei tơdrong kăl wă noh. Tơdrong ‘nâu đei khan hơđăl lăm tơdrong Kră Yang Yêsu bơtho đơ̆ng tơdrong pơtih gia kơ bơngai Samari pơm ‘lơ̆ng. Bơngai mă kăl kơ đei tơdrong mơnat noh bơngai đei tơdrong kăl wă mă khan bơngai noh bu hĭ. Khôi Juăt Kră Yang bơtho: “Mă-lei tơdah lăm dêh mă đơ̆ng Kră Yang ‘Bok Kei-Dei asong ăn, oei đei bơngai dơnuh hin, na ‘nĕ kơ kret kơ lu bơngai noh. Mă-lei athei bơlang ti, asong ăn tŏk iŏk tôm tơmam kiơ mă lu sư kăl wă… Kơchăng bĕ, ‘nĕ kơ răk mong tơchĕng kơnê̆ ‘nâu: Sơnăm mă tơpơh jơ̆ sơnăm ăn rơngei wă truh boih! Kơchăng bĕ, wă kơ iĕm huay kơ đei jơhngơ̆m kơnê̆ hăm lu ‘nhŏng oh iĕm bơngai dơnuh hin, ưh kơ gơh tŏk iŏk kiơ…kơnh lu sư krao ôr Kră Yang tơmăk kơ iĕm, iĕm gô đei tơdrong yoch. Iĕm athei ăn kơ đe tŏk iŏk mă hơlăng, ‘nĕ ăn hăm jơhngơ̆m ưh kơ hiôk….” (Bơtho Khôi Juăt 15:7-11).
Jơ̆ng ‘bang Yôhan păng Yakơ bre sư khan tơdrong ‘mêm păng đon lui đơ̆ng minh ‘nu bơngai ‘măn kơ ‘Bok Kei-Dei athei pơm tơ’bôh đơ̆ng bơngai noh ‘mêm păng tơgŭm kơ lu bơngai pơmat (I Yôhan 3:17; Yakơ 2:15-16). Athei krao khan apĭnh Kră Yang yua bơ̆n kơdih, kơ jên tơmam, jơhngơ̆m pran, jơ ‘năr păng khul bơngai lui wă kơ bơ̆n lăng tơ bơngai wă kăl kơ tơgŭm, păng athei tơ’bôh tơdrong ‘mêm Kră Yang Yêsu kơ bơngai pơm tơ’bôh mă tơpă.
Mă khan lei ră, ‘nĕ kơ hiơt kon bơngai bơ̆n oei đei tơdrong kăl wă gah bơhngol đơ̆ng noh bơih, jing bơngai mă đei jơhngơ̆m băt mơnat, bơ̆n kư̆m kăl hiơ̆k tơchĕng tơdrong gah bơhngol kơ lu bơngai lăm teh đak păng lu bơngai jum dăr kơ bơ̆n. thoi ei bơih, bơngai mă đei tơdrong pơmat noh bơngai Adrin tơpă ră roi tơdrong ‘Nao ‘Lơ̆ng, đĭ jơhngơ̆m krao khan tơgŭm lu bơngai lăm teh đak, lăm khul bơngai lui, păng lăm hnam dơnŏ bơ̆n mă oei rơdu gah bơhngol… lơ bơngai bơih dêh kơ mơnat kơplah lăng ‘bôh lu bơngai jĭ đơ̆ng tơblah, lu bơngai hơ’lơ̆p nge mă mĕ ‘bă sư achăng tŭk….mă-lei hăm đei dôm ‘nu bơngai sơ’ngon kơplah lăng ‘bôh rim năr bơngai lăm hnam dơnŏ, bôl buăl, jih la ‘ma ngiĕo…lôch mă ưh kơ tam mă băt tơdrong ‘nao ‘lơ̆ng ưh?
Kră Yang Yêsu bơtho kơ bơngai đei jơhngơ̆m ‘mêm mơnat noh bơngai đei tơdrong pŭn hiôk (Mathiơ 5:7). pơtao Sôlômôn kư̆m đei khan: “…Mă-lei pŭn hiôk dêh kơ bơngai bu băt mơnat kơ bơngai dơnuhhin.” (Tơdrong Pơđơ̆k 14:21). Thoi noh bơngai mă pơm kiơ̆ tơdrong băt mơnat wei rong bơhngol sư hămtơdrong ‘lơ̆ng păng hiôk jơhngơ̆m yua kơ băt kơdih pơm kơ Kră Yang lăp đon. Bơngai mă đei jơhngơ̆m băt mơnat mă khan ưh kơ đei iŏk tơdrong mơnat đơ̆ng bơngai nai lei na tơpă bơ̆ngô iŏk tơdrong mơnat đơ̆ng tơdrong Sư dŏng pơklaih, Kră Yang ‘Bok Kei-Dei gô mơnat dơ̆ng kơ bơ̆n,bơwei, wei rong rim năr, rim khei sơnăm lăm teh đak âu (Hơriso 18:25).
Kơkuh kơ Ih ơ Kră Yang, apĭnh Ih ăn kơ inh đei jơhngơ̆m thoi Ih, đei jơhngơ̆m gơh tơgŭm thoi bơngai samari pơm ‘lơ̆ng wă tơ’bôh tơdrong ‘mêm Kră Yang kơ teh đak pơmat ‘nâu, krao khan yua anăn Kră Yang Yêsu Krist, Amen.
Bơ̆n hăm lăp đon tơ’bôh tơdrong mơnat kơ đĭ đăng bơngai kiơ̆ kơmĭl bơngai Samari pơm ‘lơ̆ng ưh?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Êsêkiên 43
Kênh Youtube BHKTHN:
