Hơriso 5:1-12
“Ơ Kră Yang! Pơgê hrôih Ih gô kơtơ̆ng nơ̆r inh; Pơgê hrôih inh gô roi dôm tơdrong kiơ ‘bơ̆t anăp Ih păng chang gô.” (Hơriso 5:3)
Nơ̆r jet tơchĕng pơwao:
– Pơtao Đawit đei pơm kiơ lăm jơ pơkă băl pơgê hrôih sư hăm Kră Yang?
– Bơ̆n pơhrăm iŏk tơdrong kiơ đơ̆ng jơhngơ̆m păng nơ̆r sư krao khan?
– Bơ̆n đei tơ ‘blŏk kăl kơ tơplih tơdrong kiơ lăm tơdrong bơ̆n krao khan?
Lăm kơplah đei lơ tơdrong kơnê̆ đơ̆ng bơngai pơm kơnê̆. Pơtao Đawit hơdrol sư chơ chă Kră Yang rim pơgê hrôih. Sư krao khan hăm Kră Yang ‘Bok Kei-Dei jơ̆ pơtao sư (trong 1-2). Sư băt kơ năl kơ Kră Yang jơ̆ tơ’ngla ‘lơ̆ng tơpăt păng areh kơ tơdrong kơnê̆; Ih areh kơ đĭ đăng bơngai pơm kơnê̆ tơ-huŏng lu bơngai pơ-ang, pơ-răm đĭ lu bơngai pơm pơma hơlĕnh, areh kơ lu bơngai pơ lôch đe păng lu bơngai sa pơ gâm (trong 4-6). Sư ‘bĕnh kơ tơdrong ‘mêm mơnat, bơwei, ăn tơdrong hiôk chơt păng pŭn hiôk kơ bơngai bu mă hli yom kơ sư (trong 11-12).
Pơtao Đawit mơ̆t lăm hnam Kră Yang păng kơkuh bơ̆t anih ‘lơ̆ng rơgoh Sư, sư krao apinh Kră Yang mơ̆ng nơ̆r sư krao khan păng lăng lăng tơdrong tơchĕng sư. Sư roi dôm tơdrong đei tơpă, đĭ jơhngơ̆m păng chang gô tơdrong chông hơnhăk đơ̆ng Kră Yang. ‘Nâu jơ̆ tơdrong pơma dơnuh băl sư hăm Kră Yang lăm tơdrong tơ’bưh jê̆ băl păng lui ngeh tơpă. Sư pơtơm roi dôm tơdrong sư tơchĕng gah lu bơngai kơnê̆, jơ̆ lu bơngai ưh kơ pơm trŏ, đei jơhngơ̆m kơnê̆, pơma nơ̆r pơrăm păng pơma pơ iôm. Sư krao apinh Kră Yang phak lu sư yua kơ lu sư blah plơ̆ Kră Yang păng pơm dôm tơdrong kơnê̆. Sư apinh Kră Yang pơm trong mă tơhnă wă kơ sư hoei kơ pơ̆k huŏng đơ̆ng dôm tơdrong lu sư pơhlŭ. Pơtao Đawit lui tơpă kơ Kră Yang jơ̆ tơ’ngla ‘lơ̆ng tơpăt oei pơgơ̆r. Sư gô pơm tơpăt. Yua kơ thoi ‘noh sư hơmĕng tơpă chang tơdrong dŏng pơklaih đơ̆ng Kră Yang păng sơng iŏk tơdrong hiôk chơt, pŭn hiôk Kră Yang ăn (trong 7,11-12).
Pơtao Đawit jơ̆ bơngai hli yom păng pơm kiơ̆ thoi Kră Yang wă. Sư ưh kơ gơnang kơ tơdrong gơh hơgei păng jơhngơ̆m pran sư kơdih mă lei lăm tôm tơdrong gô mơ̆ng kơ Kră Yang, chang gô tơdrong tơl tơ wih păng chông anhăk đơ̆ng Kră Yang wă tơ’bơ̆p hăm lu ayăt. Sư gô mơ̆ng kơ Kră Yang sek tơlang păng pơm ‘mong thoi ‘nơ̆r Kră Yang đei bơtho lăm ‘Bơtho Khôi Juăt 32:35 “Tơdrong pơm ‘mong gô lê̆ kơ Inh, Inh gô pơm tôm. Trŏ năr jơ̆ng lu sư tơsĕr pơ̆k. Tơdrong răm wă jê̆ truh kơ lu sư bơih. Tơdrong pơlôch lu sư, gô truh tĕnh.”
Apinh Kră Yang ăn kơ bơ̆n ‘bôh tơdrong krao khan pơhrôih đei yua tơpă lăm minh năr ‘nao plơ̆ng. Tơdah ưh tam mă pơm apinh athei pơtơm hloi năr ‘nâu. ‘măn tơ anih hơđơ̆ng kơplah bơ̆n roi dôm tơdrong bơ̆n apinh gô tơgŭm bơ̆n mơn tơdrong bơ̆n jê̆ Kră Yang, đei tơdrong pơlung, đei tơ’blŏk ăn kơ bơ̆n gah tơdrong sư wă, păng ‘bônh kơ băt kơ tơdrong chông anhăk đơ̆ng Yang ‘Bơhngol ‘Lơ̆ng, lăm tơdrong pơma dơnuh hăm bơngai nai, păng kư̆m đei tơdrong chông anhăk đơ̆ng Kră Yang lăm tơdrong jang bơ̆n kăl kơ pơm.
Ơ Kră Yang ‘Lơ̆ng Tơpăt, jơ̆ ‘bă ling lang ‘mêm kơ inh, pơgê hrôih inh oei chơ chă ih wă bơnê, kơkuh păng pơma dơnuh hăm Kră Yang, lăm teh đak đei lơ bơngai hơlĕnh pơdăr păng pơm kơnê̆, apinh ‘Bă wei lăng inh hlôi đơ̆ng tơdrong kơnê̆, tơ ‘blŏk kơ inh băt chang gô ih, wă kơ nơ̆r pơma, tơdrong jang păng tơdrong tơchĕng inh năr ‘nâu trŏ thoi ih lăp đon, inh krao khan yua anăn Kră Yang Yêsu Krist, Amen.
Lu bơ̆n hăm pơm hloi tơdrong pơkă băl rim pơgê hrôih hăm Kră Yang ưh?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 28
Kênh Youtube BHKTHN:
