Mathais 24:3-5
Nqe cim:
“Yuav muaj ntau leej tuav kuv lub npe dag ntxias nej hais tias, ‘Kuv yog tus Mexiyas!’ thiab lawv yuav dag ntxias ntau leej yuam kev” (Mathais 24:5)
Lus nug xav:
– Tswv Yexus qhia paub lub cim xubthawj ntsig txog hnub kawg yog dabtsi?
– Niaj hnub nim no peb tabtom ntsib qhov no li cas?
– Yuav ua li cas kom peb tsis raug dag hauv kev ntseeg?
Thaum uas tabtom nyob pem lub Roob Txiv Ntoo Roj, cov thwjtim los nug Tswv Yexus twjywm hais tias: “Thov koj qhia rau peb saib thaum twg mam li muaj tej no, thiab yuav muaj yam twg qhia rau peb paub hais tias, twb txog lub sijhawm uas koj yuav los thiab lub ntiajteb yuav kawg” (nqe 3). Lawv thov Tswv Yexus piav qhia meej ob qho no, thaum twg lub tuamtsev puastsuaj thiab lub cim twg qhia txog hnub Tswv Yexus rov qab los thiab ntiajteb kawg.
Tswv Yexus teb rau cov thwjtim txog tej uas yuav tshwm rau hnub kawg (Mathais 24:14). Ntawm cov lus teb Tswv Yexus tsis hais meej lub sijhawm twg, tiamsis pib qhia tej lus ceebtoom: “Nej yuav tsum ceevfaj, tsis txhob pub leejtwg dag ntxias tau nej yuam kev” (nqe 4). Tswv Yexus piav qhia lub cim xubthawj ntawm hnub kawg “kev dag ntxias”. Lolus “ceevfaj” (nqe 4) lub ntsiab yog ceevfaj zov, ua zoo saib, vim yuav muaj ntau txoj kev dag ntxias rau thaum ntiajteb yuav kawg. Tswv Yexus taw qhia rau cov thwjtim paub yuav muaj neeg coob leej qhia tej lus dag ntxias los dag cov ntseeg Tswv Yexus. “Cov neeg dag ntxias” lub tswvyim yog cim civ hu yus yog tus cawmseej thiab qhia tej lus cuav, tsis raws li qhov tseeb. Tej lug qhia ntawm cov xibhwb cuav thiab tus cawmseej cuav yuav dag thiab rhuav ntau tus ntseeg txoj kev ntseeg puastsuaj. Lub ntsiab yog yuav muaj coob leej ntseeg cov xibhwb cuav thiab tus cawmseej cuav heev dua li Vajtswv tej lus qhia tseeb. Ntawd yog qhov vimchiv uas Tswv Yexus qhia cov thwjtim yuav tsum ceevfaj tsam raug dag.
Peb tabtom nyob rau tiam vammeej mas tibneeg nyiam caum thiab txhawb nqa tej yam uas tsis muaj qabhau, mloog thiab ua raws li pab neeg coob, tsis tsum ua zoo xav lossis tsis zeem paub qhov twg yog lossis tsis yog. Niaj hnub nimno, hauv txoj kev ntseeg yim hnub yim muaj xibhwb cuav coob sawv, thiab muaj coob tus txhawb nqa thiab ua neej raws kev ntseeg cuag li lawv yog tus cawmseej.
Yuav ua li cas kom yus ceev tau yus txoj kev ntseeg? Tswv Yexus ceebtoom “yuav tsum ceevfaj” (nqe 4) lub ntsiab yog peb yuav tsum ua tib zoo ceevfaj tej uas neeg nyiam caum ntawm cov xibhwb cuav thiab tej lus qhia cuav. Kom peb tsis raug dag hauv kev ntseeg, cheemtsum “Cia li muab Txojlus tseeb los ua siv sia” (Efexus 6:14), txhais hais tias peb yuav tsum nquag nyeem, kawmVajtswv Txojlus uas yog qhov tseeb thiab nyob ruaj rau qhov tseeb ntawd. Ntawm tej lus qhia txawv, tej lus qhia zoo mloog, cia li kawm cov ntseeg huv Npele-as tus qauv (Tes Haujlwm 17:11), coj los saib raws li Vajluskub kom paub yog lossis txhaum.
Thov Vajtswv,
Vajtswv, thov pab nyuam yaus tseg sijhawm ntau los kawm Koj Txojlus,kom tibneeg tej kev qhia dag ntxias tsis tau nyuam yaus poob ntawm Koj. Nyuam yaus tuav Tswv Yexus Khetos lub npe thov, Amees.
Peb puas muaj Vajtswv Txojlus kom zeem paub qhov yog thiab qhov yuam kev?
Nyeem Vajluskub hauv peb lub xyoos: Exekees 26
Kênh Youtube BHKTHN:
