Klei Aê Diê Blŭ: Y-Mathiơ 24:3-5
Êlan kliăng: “Kyuadah lu mnuih srăng hriê mgưt hŏng anăn kâo, lač, ‘Kâo jing Krist,’ leh anăn diñu srăng mplư lu mnuih.” (Y-Mathiơ 24:5)
Klei êmuh ksiêm mĭn: Khua Yang Yêsu brei thâo ya klei bi knăl tal êlâo djŏ tuôm kơ hruê knhal tuč? Hruê anei si drei dôk tlă anăp hŏng klei anei? Si drei ngă čiăng amâo tŭ ôh klei arăng mplư hlăm klei đăo?
Êjai Ñu dôk gŭ ti dlông čư̆ Ôliwơ, phung ƀĭng kna êmuh hjăn Khua Yang Yêsu, “Hưn kơ hmei hbĭl klei anăn srăng truh, leh anăn ya jing klei bi knăl kơ klei ih lŏ hriê, leh anăn kơ hruê knhal tuč ênuk?” (êlan 3). Diñu akâo kơ Khua Yang mblang dua mta, hbĭl Sang yang dlưh rai, leh anăn mâo ya klei bi knăl kơ hruê Khua Yang lŏ hriê hŏng hruê knhal tuč. Phung ƀĭng kna mđing kơ klei truh Sang yang dlưh rai kyua diñu đăo tơdah Sang yang dlưh rai snăn hruê knhal tuč ăt srăng truh mơh.
Khua Yang Yêsu wĭt lač kơ phung ƀĭng kna kơ klei truh hlăm hruê knhal tuč (Y-Mathiơ 24:14). Hlăm klei Ñu wĭt lač, Ñu amâo lač ôh wưng klă klơ̆ng ƀiădah mphŭn pŏk hŏng klei hưn brei răng: “Răng bĕ, đăm brei arăng mplư diih ôh” (êlan 4). Khua Yang Yêsu bi êdah klei bi knăl tal êlâo kơ dŭm hruê knhal tuč anăn jing “Klei Mplư”. Boh blŭ “brei răng” (êlan 4) jing klei thâo kăp răng, ksiêm dlăng bi nik, kyua mâo lu klei mplư hlăm dŭm hruê knhal tuč. Khua Yang lač kơ phung ƀĭng kna thâo kơ lu mnuih srăng blŭ klei luar čiăng mplư phung đăo kơ Khua Yang. Hdră êlan phung “hiu mplư” anei jing diñu srăng mgưt Anăn Khua Yang Yêsu, čŏng lač pô jing Yang Krist leh anăn mtô klei luar, amâo djŏ hŏng klei sĭt nik. Klei mtô luar phung khua pô mtô soh leh anăn phung mgưt ngă Yang Krist anei srăng mplư leh anăn bi rai klei đăo lu mnuih. Jih mâo lu mnuih srăng đăo hlue si klei mplư phung pô mtô soh leh anăn Krist mgưt hĭn kơ klei kpă ênô Aê Diê bi êdah leh. Anăn jing mta phŭn Khua Yang mtô phung ƀĭng kna brei răng huĭ arăng mplư.
Drei dôk hdĭp hlăm sa ênuk anak mnuih khăp tui tiŏ leh anăn mpŭ kơ ênoh yuôm mgưt, diñu hmư̆ leh anăn hlue ngă êlan lu mnuih ngă ƀiădah amâo ksiêm mĭn ôh amâodah bi mklă ôh soh amâodah djŏ. Hlăm klei đăo, ƀrư̆ hruê ƀrư̆ mâo lu klei đăo soh, ăt msĕ mơh lu mnuih hiu mtô leh anăn hlue ngă klei đăo msĕ si hdră diñu yơh jing Krist!
Si drei ngă čiăng dưi krơ̆ng klei đăo pô? Khua Yang Yêsu lač “răng bĕ” (êlan 4) jing brei drei jih ai tiê thâo răng ti anăp klei mplư ênuk mrâo, ti anăp jih jang klei mtô soh leh anăn phung khua pô mtô soh. Čiăng kơ đăm lĕ ôh kơ klei mplư hlăm klei đăo, brei drei “mă klei sĭt nik jing hrăng hơiêng” (Êphêsô 6:14), jing brei kriăng dlăng, hriăm Klei Aê Diê Blŭ jing Klei Sĭt Nik leh anăn kjăp hlăm Klei Sĭt Nik anăn. Ti anăp klei mtô klei đăo mrâo mrang mdê, klei mtô mblang hmư̆ jăk, brei tui hriăm klei phung đăo ti ƀuôn Ƀêrê bi hmô (Bruă Phung Khua Ƀĭng Kna 17:11), ksiêm dlăng hŏng Klei Aê Diê Blŭ čiăng thâo soh amâodah djŏ?
Drei siă suôr hŏng Klei Aê Diê Blŭ leh anăn knang mơ̆ng tur Klei Aê Diê Blŭ čiăng bi mklă soh amâodah djŏ mơ̆?
Wah lač: Ơ Khua Yang, akâo kơ ih đru kâo êlâo hĭn mđing pioh hruê mmông hriăm Klei Aê Diê Blŭ, čiăng kơ klei mtô soh anak mnuih amâo dưi mgei ôh klei đăo kâo hlăm Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
