Yausuas 1:10-18
Nqe cim:
“Cov kwvtij, kuv tuav peb tus Tswv Yexus Khetos lub npe ntuas nej sawvdaws, kom nej hais tej lus uas ua rau sawvdaws nyob sib haum thiaj tsis ua rau nej tawg ua pab ua pawg. Nej yuav tsum koom ua ib lub siab, xav ib yam thiab muaj ib lub homphiaj xwb” (1 Kauleethaus 1:10)
Lus nug xav:
– Yausuas hais rau cov thawjcoj, cov pejxeem thiab xeem Lunpee, xeem Khas thiab xeem Manaxes yuav tsum ua dabtsi?
– Lawv qhia tshwm kev sib koom li cas?
– Kev sib koom tseemceeb li cas hauv Pawg ntseeg?
Tom qab uas txais tau Vajtswv tej lus samhwm, Yausuas hais rau cov thawjcoj kom cov pejxeem npaj zaub mov noj rau peb hnub uas yuav hla tus dej Yauladees. Yausuas kuj hais rau xeem Lunpees, Khas thiab Manaxes yog cov xeem uas tau Mauxes pub cai rau lawv nyob sab hnub tuaj tim tus dej Yauladees. Yausuas hais dua kom lawv rov nco txog Mauxes tej lus uas thaum faib cheemtsam av no rau lawv (nqe 12-15; 2 Kevcai 3:12-20). Tamsim no lawv tsis tau nyob puag tes puag taw saib yus cov kwv hla dej mus sab tim ub sib ntaus. Cov txiv neej uas muaj lub siab tawv yuav tau nqa cuabyeej mus ua tub rog, koom mus sib txeeb lub tebchaws Vajtswv coglus tseg. Mus txog thaum uas txhua xeem no tau txais thaj av uas Vajtswv coglus tseg, muaj tebchaws ua noj ua haus, nyob thajyeeb lawd ces cov xeem no thiaj li tau rov qab los rau yus thaj av.
Yausuas tej lus qhia pom nws xav kom Vajtswv haivneeg tagnrho txhua tus sib koom siab. Nws xav kom tagnrho txhua xeem koom sib ntaus, kom txeeb tau thaj av uas Vajtswv coglus tseg. Kev sib koom tsis yog pom muaj hauv txhua xeem xwb tiamsis tseem pom muaj nyob hauv cov pejxeem nrog rau cov thawjcoj thiab. Thaum hnov Yausuas hais, cov thawjcoj thiab cov xeem Lunpees, Khas thiab Manaxes puavleej koom siab mloog lus thiab txiav txim siab yuav ncajncees los ntawm qhov uas coglus hais tias yog leejtwg tsis mloog tej lus uas Yausuas hais ces yuav raug txiav txim tuag vim nws ua txhaum rau Vajtswv, ib yam li Mauxes tej lus uas nws tau hais lawd: “Tiamsis yog nej tsis ua raws li nej coglus tseg, kuv qhia rau nej hais tias, nej ua txhaum rau tus TSWV ntag. Yog nej tsis ua li ntawd, nej yuav raug txim vim nej tej kev txhaum” (Teev Npe 32:23). Lawv kuj txhawb Yausuas hais tias “Koj ua siab tawv qhawv tsis txhob ntshai”, hais ib yam li Vajtswv twb tau txhawb Yausuas zog lawd.
Peb pom los ntawm Yausuas cov lus samhwm, thiab peb xeem nyob sab hnub tuaj tim tus dej Yauladees koom hais ib lolus txhawb Yausuas, tagnrho txhua yam ntawd puavleej yog los ntawm Vajtswv lub tswvyim los thiab Nws samhwm, vim li ntawd lawv thiaj sib koom hauv Vajtswv lub siab nyiam. Kev sib koom yog yam uas niaj hnub nim no cov ntseeg cheem tsum muaj nyob hauv Pawg ntseeg kom ua tiav Vajtswv lub homphiaj. Ntau zaug peb hais tias sib koom, tiamsis tseem sib faib ua pab ua pawg zoo li Pawg ntseeg Kauleethaus hnub thaud, vim totaub yuam kev kev sib koom, xav hais tias kev sib koom yog koom siab nrog ib tug neeg twg txoj kev xav. Kev sib koom tsis yog koom siab raws tib neeg txoj kev xav tiamsis yog kev sib koom siab ua ke raws li Vajtswv lub siab nyiam. Thaum peb txhua tus puavleej cim nco tau Vajtswv Txojlus qhia, thiab peb tej lus cogtseg rau Vajtswv lawd, peb yuav sib txhawb los ntawm Vajtswv Txojlus ces peb txhua tus puavleej yuav tig los ntawm Vajtswv, siab homphiaj khiav, thaum peb txhua tus yuav sib koom siab ua ke tuav tes ua Vajtswv haujlwm los ntawm qhov uas zoo tshaj plaws.
Thov Vajtswv,
Vajtswv, thov pub nyuam yaus muaj lub siab txo hwjchim, sib hlub kom sib koom tau ua ke hauv Vaj Ntsujplig kom sib koom ua Koj tes haujlwm hauv Pawgntseeg. Nyuam yaus tuav Tswv Yexus Khetos lub npe thov, Amees.
Peb puas tau qhia tshwm txoj kev sib koom hauv Pawg ntseeg lawd los tsis tau?
Nyeem Vajluskub hauv peb lub xyoos: Exekees 22
Kênh Youtube BHKTHN:
