Mika 6:6-8
“Ơ kon bơngai: Tơdrong mă Kră Yang wă kơ ih pơm ‘lơ̆ng tơpăt, wă kơ đei tơdrong ‘mêm mơnat păng yak năm hăm jơhngơ̆m iơ̆m dim, pơyom kơ ‘Bok Kei-Dei ưh?” (Mika 6:8)
Nơ̆r jet tơchĕng pơwao:
– Mă trŏ sư, kon pơlei Isơrael chu yom pơm kiơ̆ nơ̆r Kră Yang, mă-lei lu sư tă tơ pơm kiơ bơih ‘nâu?
– ‘Bok Kei-Dei wă kơ kon pơlei Sư khŏm pơm tơdrong kiơ?
– Tơdrong arih ‘lơ̆ng tơpăt băt ‘mêm mơnat, găt dim, iŏk đon ala ba ăn kơ bơ̆n tơdrong kiơ dang ei?
Đei nơ̆r KraYang jet sơ̆:’Bok Kei-Dei wă kơ kon bơngai khŏm pơm tơdrong kiơ? Mika bơngai pơtruh nơ̆r’Bok Kei-Dei tơl:
Hăm trŏ kơ “rơbâu tŏ triu tơno”, hăm trŏ kơ “hơngan glung đak rơmă ôliwơ” ưh? Mă-lei nơ̆r Kră Yang tơl tă tơ hmă đĕch păng nơ̆r Kră Yang tơl noh mơ̆t hlom lăm jơhngơ̆m, nơ̆r Sư tơl ‘noh, Sư wă kơ kon pơlei Sư pơm tơdrong ‘lơ̆ng tơpăt, băt ’mêm mơnat, găt dim, yak năm iŏk đon ala kơ‘Bok Kei-Dei. Kră Yang ưh kơ kuă ôh tơdrong kon pơlei Sư kơkuh kơ Sư‘nei, mă-lei Sư dan tơm tơdrong arih lu kon pơlei Sư ‘nâu ‘bơ̆t tơdrong‘lơ̆ng tơpăt Sư, dan ‘bơ̆t tơdrong‘mêm mơnat, dim găt Sư noh. Kon pơlei Kră Yang khŏm tơ’bôh kơ đe đon lui, tơ’bôh noh hăm tơdrong arih sa, jang pơm tơpă hloi.
“Pơm tơdrong ‘lơ̆ng tơpăt” ‘Lơ̆ng tơpăt ‘nâu wă pơma gah tơdrong tơpăt hơnơ̆ng, bơ̆n lăng rim ‘nu bơngai hơtŏ đĕch, ưh kơ pôk bơngai âu kơtĭt pơjuă bơngai to… Bơ̆n pơm tơpăt hơnơ̆ng ‘noh, dang pơma ‘bơ̆r re dŏng lu bơngai ‘bơ̆r đon kơđei, lu bơngai mă đe hiơt pă ‘blŏk, pă wêr, pă leng lăng bơih noh. Kră Yang wă kơ bơ̆n kon pơlei Sư ‘nâu ưh kơ pơma ‘bơ̆r đĕch ôh gah tơdrong tơpăt hơnơ̆ng ‘nâu, kư̆m ưh kơ krao athei đe đĕch pơm, mă-lei kơdih akâu bơ̆n khŏm pơm tơdrong tơpăt hơnơ̆ng‘nâu. Bơ̆n kăl kơ lăng‘bôh tơdrong đei tơpă lăm chăl arih bơ̆n dang ei‘nâu, kăl kơ lăng‘bôh tơ anih lu bơngai pơgơ̆r teh đak ‘nâu, lu sư yua tơdrong jang pơm tih sư noh pơgŏ pơjuă lu bơngai hơtŭch, răm‘băm… lu sư pơm thoi noh dang lĕ gŭt lê̆ ‘long kŏng đơ̆ng tơpăt hơnơ̆ng, gŭt lê̆ jing grê gah âu dah gah to; bơ̆n kư̆m kăl kơ lăng tơ nơ̆r‘bơ̆r lu bơngai mă dơ̆ng‘bơ̆t anăp tơpôl, sư pơma trŏ dêh mă-lei đe lê̆ tơ noh đĕch kuă kơ iŏk nơ̆r sư noh. Bơ̆n kư̆m kăl kơ lăng tơ lu bơngai đe pơm kơ sư răm sơ’ngon jĭ jơhngơ̆m, kăl kơ lăng tơ lu bơngai arih ‘lơ̆ng mă-lei đe pơjuă pơkep, đe pơm ưh kơ tơpăt hơnơ̆ng hăm lu sư, ưh kơ đei bơngai wă sek hơmet ăn lu sư,pơm thoi noh, đe khan ‘mêm kơ maih pơkah kơ hu, bơ̆n lăng tơ lu sư noh wă kơ bơ̆n kơdih hơmet ăn wă kơ huay pă đei pơdê băl thoi noh dơ̆ng. “’maih wă tơdrong iơ̆m dim” ‘nâu bơih pơm keh jơhngơ̆m mơnat. Đơ̆ng nơ̆r tơm nơ̆r Hêbrơ wă khan “’mêm hăm tơdrong ‘mêm truh um, truh tôch”. Noh đơ̆ng kơdih akâu ‘mơ̆i‘maih năm tơ lu bơngai nai, năm hăm tơdrong mơnat, mă-loi năm tơ lu bơngai mă ưh kơ trŏ lăp kơ mơnat noh, năm tơ lu bơngai kơtơih pơ̆k, dah mă năm tơ lu bơngai mă kon pơlei pơla tơring tơrang hiơt kơ lu sư noh. Dim găt băt mơnat ‘nâu, oei sa ‘lơ̆ng hăm lu bơngai jih ‘ma ưh kơ ngê̆ yua kơ lu đe ei arih trŏ lăp kơ bơ̆n mơnat ‘mơ̆i ôh, phŏ kơnh bơngai ayơ ei sư pơm kơnê̆ kơ bơ̆n, trŏ kơ bơ̆n pơm‘mong kơ sư ră, mă-lei bơ̆n rơih iŏk tơdrong mơnat ăn,huay kơ jô̆ yo; phŏ kơnh đe pơm kơnê̆ kơ bơ̆n, trŏ kơ bơ̆n tơwih kơ sư rŏng, mă-lei bơ̆n rơih iŏk tơdrong hơmet tơiung ming tơdrong pơgơ̆p tơ’bưh bơ̆n hăm bơngai noh; phŏ kơnh đei bơngai ayơ ei glăi hăm bơ̆n ră mă-lei bơ̆n rơih iŏk lê̆ sư brŏk ‘lơ̆ng đĕch ưh kơ tơchĕng kơ đei yua ăn kơ bơ̆n dah ưh kơ đei yua ăn kơ bơ̆n. Bơ̆n ‘bôh ‘bar tơdrong ‘nâu: Tơdah tơdrong tơpăt blah pơjăr hăm tơdrong glăi, tơdrong ưh kơ trŏ, lei tơdrong dim găt băt mơnat ‘nâu hơmet pơklaih rơka jơhngơ̆m.
Bơ̆n arih tơpăt hơnơ̆ng, ‘lơ̆ng rơgoh, dim găt băt ‘mêm mơnat noh bơ̆n pơchrang hơdah kơ đe jơhngơ̆m ‘Bok Kei-Dei Tơ’ngla mă ‘mêm mơnat, dim găt, tơpăt hơnơ̆ng, ‘lơ̆ng rơgoh noh.
“Yak năm iŏk đon ala kơ‘Bok Kei-Dei” ‘nâu bơ̆n arih lăm tơdrong lui bơ̆n dang lĕ bơ̆n yak đei kơnao, rim kơnao rai hlôh băt kơ Kră Yang oei hơdai, chông anhăk bơ̆n. Bơ̆n iŏk đon ala noh bơ̆n drơ̆ng bơ̆n kơdih rơdu hơtŭch, lăp đon pơđêng đon mơ̆ng đe pơma, mơ̆ng đe bơtho dah tơ’blŏk ăn…, păng ling-lang jet, pơhrăm iŏk đơ̆ng đe.Bơ̆n iŏk đon ala ‘nâu bơwei wă kơ tơdrong tơpăt hơnơ̆ng noh huay kơ pơm krĕnh dêh; Bơ̆n iŏk đon ala ‘nâu kư̆m bơwei wă kơ tơdrong iơ̆m dim gơh găt băt mơnat noh huay kơ jing‘bônh kơ lăp đon tơdrong kơnê̆, huay kơ jing pơm ăn rơhơi tơdrong ưh kơ‘lơ̆ng noh. Yak năm hăm đon ala noh năm hơdai Kră Yang rim năr, arih kơchăng, pơ’lơ̆ng kiơ̆ kơ Kră Yang wă kơ bơ̆n pơm.
Nơ̆r Mika bơngai pơtruh nơ̆r ‘Bok Kei-Dei ling-lang‘lơ̆ng, ‘nao yua kơ sư dan tơm đon lui sư noh ưh kơ dan ‘bơ̆t lu tơmam mă bơ̆n soi pơyơ̆r noh ôh, mă-lei sư dan đon lui sư tơ lăm jơhngơ̆m, dan‘bơ̆t tơdrong arih bơ̆n mă Kră Yang hơtai tơplih ăn jing ‘nao noh. Bơ̆n arih sa tơpăt hơnơ̆ng ‘lơ̆ng trŏ, ‘mêm mơnat găt dim, iŏk đon ala, dôm tơdrong noh tơklep băl jing thoi minh pôm tơmam soi pơyơ̆r kơ‘Bok Kei-Dei, Sư lăp đon iŏk; tơdrong tơpăt hơnơ̆ng, ’lơ̆ng trŏ, ’mêm mơnat, găt dim, iŏk đon ala‘noh kư̆m pơjing ăn tơdrong arih Bơngai Lui kơ Yêsu Krist noh‘lơ̆ng, lăng hơiă. Apinh Kră Yang ăn kơ bơ̆n arih lăm tơdrong lăp đon hơmet ming dôm tơdrong đêl glăi, na jang pơm dôm tơdrong kiơ kiơ noh, jang pơm hăm jơhngơ̆m ‘mêm mơnat, găt dim păng iŏk đon ala wă kơ Kră Yang chông anhăk.
Ơ Kră Yang’Bok Kei-Dei inh, Inh apinh Ih bơtho inh pơm tơdrong tơpăt hơnơ̆ng ‘lơ̆ng trŏ, arih ‘mêm mơnat, găt dim, păng iŏk đon ala yak năm hăm Ih rim năr.Inh krao khan yua anăn Kră Yang Yêsu Krist, Amen!
Bơ̆n pơm kiơ̆ tơdrong ‘Bok Kei-Dei wă kơ bơ̆n pơm noh, bơ̆n pơm lăm hnam dơnŏ, lăm tơdrong jang bơ̆n, păng lăm Khul Lui thoi yơ bơih?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 83-84.
Kênh Youtube BHKTHN:
