Blŭng a 4:8-10
“Kră Yang jet dơ̆ng, Ih pơm kiơ thoi noh? Inh ‘bôh pham oh ih ôr đơ̆ng teh păng nơ̆r sư krao kơtơ̆ng truh tơ Inh.” (Blŭng a 4:10)
Nơ̆r jet tơchĕng pơwao:
– Ka-in đei pơlôch oh sư kơdih thoi yơ?
– Đơ̆ng rŏng kơ sư đei pơlôch oh sư, Kră Yang đei pơma hăm sư thoi yơ?
– Lu bơ̆n đei pơhrăm tơdrong kiơ lăm tơdrong ‘net ‘net ba truh kơ tơdrong pơm yoch?
Tơdrong đei truh thoi âu lăm minh năr ‘lơ̆ng hiôk, kơplah Kain păng Abel oei jang tơ mir. ‘Bok Kain kư̆m oei pơma dơnuh hăm oh sư kơdih hmă đĕch. Mălei hlĭch dêh, sư đei năm tơ oh sư kơdih na pơlôch hloi oh sư. Tơdrong âu Abel ưh kơ ngeh kơ ‘nhŏng sư kơdih, oei pơma dơnuh băl hmă đĕch, mă lei tă kơ pơlôch sư! ‘nâu jơ̆ tơdrong truh mă Abel ưh kơ đei tơchĕng lê̆ adrol, tơdrong âu kư̆m chrêu kơ đon ‘Bok Ađam păng yă Ewơ, mă lei tơdrong âu ưh kơ hlĭch ôh hăm Kain. Yua kơ đơ̆ng hơdrol kơ ‘noh sư đei tơdrong blĕk hăm Kră Yang yua kơ Kră Yang ưh kơ wă iŏk tơmam sư pơyơ̆r mă lei sơng iŏk tơmam soi pơyơ̆r đơ̆ng Abel. Kră Yang đei khan lê̆ hơdrol kơ sư tơdrong oei chop gô ‘bơ̆t ‘măng, mă lei sư kăl kơ pơgơ̆r tơdrong ‘noh. Tơpă ‘nâu mă tơdrong ‘bôh hơđăl kơ tơdrong mă năm tơ tơdrong răm păng tơdrong plei tuch luch kơnh răm băm tơdah Kain ưh kơ dơ̆ng bơ̆t doh. Tơdrong truh trŏ thoi nơ̆r Kră Yang đei khan lê̆ hơdrol, Kain đei lê̆ jei tơdrong pơhlŭ na ba ăn tơdrong năm truh tơdrong pơm yoch, noh jơ̆ pơlôch lê̆ oh sư kơdih.
Đơ̆ng rŏng kơ đei tơdrong pơlôch bơngai, Kră Yang đei năm tơ Kain păng đei apinh “Abel, oh ih tơyơ?” păng “ih đei pơm tơdrong kiơ bơih” (trong 9-10). ‘bar ‘nơ̆r apinh âu ba ăn kơ Kain đei tơ’bơ̆p lăm tơdrong yoch mă đêl sư đei pơm bơih, bơngai mă sư đei pơlôch păng tơdrong pơm glăi tih sư. Kră Yang đei ‘bôh hơđăl dôm tơdrong đei truh. Kră Yang apinh ưh kơ trŏ kơ Kră Yang ưh kơ băt tơdrong đei truh bơih ôh mă lei Kră Yang apinh wă kơ Kain lăng tơdrong yoch mă đêl sư đei pơm bơih. Pơm yoch kăl kơ drơ̆ng păng tơbral. Sơ’ngon hloh, Kain đei yua nơ̆r hơlĕnh wă kơ pơklơ̆p lê̆ tơdrong yoch sư păng wă ưh kơ pŭ iŏk tơdrong yoch mă đêl sư đei pơm.
Sơ̆p hla bơar Nơ̆r ‘Bok Kei-Dei đei tơ’bôh tơdrong hơrĭ hơrĭ kơ tơdrong pơm yoch thoi âu: “Tơdrong ‘noh lăm jơhngơ̆m bơ̆n hưch hanh ‘maih pơm tơdrong âu tơdrong to, na pơhlŭ bơ̆n jing pơm yoch. Tơdrong yoch bơ̆n rai tih rai lơ boih, na bơ̆n gô truh kơ tơdrong lôch.” (Yakơ 1:14-15). Ưh kơ đei tơdrong khan minh ‘nu bơngai iung đơ̆ng tep na jing hloi bơngai pơlôch bơngai, pơm pơyô kư̆ kă, tơ tông klĕ. Mă tơpă yua kơ tơdrong ‘maih wă pơhlŭ, pơlung sư đunh jơnăr bơih, păng bơngai ‘noh đei tơchĕng chĕp ba lăm jơhngơ̆m. Na mưh trŏ kơ jơnăr kơnh, tơdrong noh jing ba ăn truh kơ sư pơm yoch, pơm tơdrong kơnê̆ krưp. Thoi noh, rim ‘nu kơ bơ̆n kăl kơ lăng kơdih bơ̆n pơ’lơ̆ng păng sơngah kơ tơdrong pơhlŭ đơ̆ng blŭng a. Ma mưh pơm ‘bơm tơdrong yoch, kăl kơ pơ̆n nuih kơ drơ̆ng iŏk, tơbral hăm Kră Yang na apinh Kră Yang mơnat, pơlăi kơ bơ̆n thoi đêl, ‘nĕ kơ chă trong wă kơ ôn.
Ơ Kră Yang, inh đei drơ̆ng tơpă ‘bơ̆t anăp Ih inh bơngai kơnê̆ yoch đei lơ wơ̆t pơm yoch. Apinh Ih tơgŭm inh pơ̆n drơ̆ng kơdôm tơdrong yoch mă inh đei pơm păng tơbral nĕ kơ ăn inh ôn tơdrong yoch. Apinh tơdrong mơsêh Ih tơplih inh rim năr, tơgŭm inh kĕ jei đơ̆ng dôm tơdrong yoch păng arih trŏ thoi inh jing kon Kră Yang ‘Bok Kei-Dei tơ kơpal plĕnh ti. Yua anăn Kră Yang Yêsu Krist, Amen.
Kơplah bơ̆n pơm yoch, lu bơ̆n hăm jah tĕnh hrĕnh tơbral bơ̆t anăp Kră Yang lei mă chă trong wă ôn pơklơ̆p?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Kôrintô 13.
Kênh Youtube BHKTHN:
