Blŭng a 4:1-7
“Dah ih pơm ‘lơ̆ng liơ ih ưh kơ pơ̆n ngơk muh măt? Na mưh ưh kơ pơm ‘lơ̆ng, to tơdrong yoch răp gô ‘bơ̆t ‘măng ‘ngeng kơ ih dêh mă-lei ih ‘nĕ kơ ăn jei sư.” (Blŭng a 4:7)
Nơ̆r jet tơchĕng pơwao:
– Yua kơ kiơ ‘Bok Kei-Dei sơng iŏk tơmam soi ‘bok Abel mălei sơngah kơ tơmam soi Kain?
– Lu bơ̆n đei pơhrăm iŏk tơdrong kiơ đơ̆ng nơ̆r Kră Yang tơbăt?
Đơ̆ng rŏng kơ Kră Yang puh tơweh, lĕch đơ̆ng pơgar Êđen pŭn hiôk, Ađam choh jang, gleh hrat ‘mơ̆i na đe sa, Kră Yang ăn kơ bre sư đei ‘bar ‘nu kon drŏnglo Kain păng Abel. Bre sư wơ̆ ‘lŏ, pơtrơp tơdrong jang ‘ba sư, Kain pơtăm phe ‘ba, Abel rong sem dơrong. Truh jơ năr, bre sư năm pơyơ̆r tơmam kơ Kră Yang dôm tơmam đêl lu sư đei: Kain yua phe ‘ba sư pơm tơmam pơyơ̆r kơ Kră Yang, na Abel kư̆m lei lăi pơyơ̆r kon triu, Kră Yang lăng gah Abel iŏk tơmam pơyơ̆r, mălei Kră Yang ưh kơ lăng Kain păng kư̆m ưh kơ iŏk tơmam soi sư (trong 3-5).
Sơ̆p hla bơar nơ̆r ‘Bok Kei-Dei ưh kơ tơbăt yua kơ kiơ mălei Sư ‘bôh lăm jơhngơ̆m rim ‘nu bơngai adrol kơ wă pơyơ̆r tơmam soi. Kơplah noh Kain pơyơ̆r tơmam ưh kơ đei hơmet lê̆, ưh kơ đei lĕch đơ̆ng lăm jơhngơ̆m, Abel pơyơ̆r tơmam soi ‘lơ̆ng hloh kon triu tuh blŭng a (trong 4). Tơmam soi ‘bok Abel pơyơ̆r sư đei rơih hơmet pơlen, ‘lơ̆ng hloh lăm khul sem dơrong noh, jơhngơ̆m ‘blŏk kơ Kră Yang. Bơngai chih hla bơar Hêbrơ đei tơblang tơdrong pơm tơ’bôh ‘bok Abel sư pơm tơ’bôh đơ̆ng đon lui: “’Bok Abel sơ̆ yua kơ sư đei đon lui, na sư soi kơ ‘Bok Kei-Dei trŏ thoi ‘Bok Kei-Dei lăp đon. Gah ‘nhŏng sư Kain sư soi ưh kơ trŏ ôh, na ‘Bok Kei-Dei ưh kơ lăp đon kơ sư. ‘Bok Abel sư đei đon lui tơpă, na ‘Bok Kei-Dei jô̆ sư bơngai ‘lơ̆ng. Thoi noh na ‘Bok Kei-Dei lăp đon kơ tơdrong sư soi noh. ‘Bok Abel lôch boih, mă-lei đe oei ư-ang sư truh dang ei yua kơ sư đei đon lui.” (Hêbrơ 11:4).
‘Nguaih kơ noh, yua kơ Kră Yang “Mă-lei ưh kơ đei lăng Kain păng kư̆m ưh kơ iŏk tơmam soi sư, na Kain blĕk dêh mah ‘bri ‘bra muh măt sư.” (trong 5). ‘Bok Kain đei tơ’bôh jơhngơ̆m blĕk păng ơh tơpă hăm Kră Yang yua kơ Kră Yang ưh kơ lăng tơmam soi sư noh. Kră Yang đei tơ’bôh tơdrong glăi lăm chăl arih sư: “Kră Yang apinh Kain thoi âu: “Yua kơ kiơ ih blĕk? Yua kơ kiơ ih kŭp muh măt ih? Dah ih pơm ‘lơ̆ng liơ ih ưh kơ pơ̆n ngơk muh măt?” (trong 6-7a). Kră Yang tơbăt kơ Kain jơhngơ̆m pơm thoi noh krê hơmơt păng kăl kơ iơ̆m dim đei tơblang tơdrong noh ưh kơ ‘lơ̆ng ôh. Kră Yang tơ’bôh trong wă kơ Kain tơbral, tơplih păng khă sư to tơdrong yoch oei chang gô ih. Ih athei hiơ̆k puh tơweh, gơh gơ̆t hăm tơdrong yoch ‘nĕ ăn jei sư: “Na mưh ưh kơ pơm ‘lơ̆ng, to tơdrong yoch răp gô ‘bơ̆t ‘măng ‘ngeng kơ ih dêh mă-lei ih ‘nĕ kơ ăn jei sư.” (trong 7b).
Bơngai mă ayăt kơ lu bơ̆n noh yang kơnê̆ oei răp gô păng yua lơ trong wă pơhlŭ bơ̆n. Mălei tơdrong pơhlŭ ưh kơ trŏ khan bơ̆n pơm yoch. Tơdrong gĭt kăl noh lu bơ̆n pơm thoi yơ ‘bơ̆t tơdrong pơhlŭ noh. Dah lu bơ̆n ưh kơ pơjăng, pơgơ̆t lei gô jei tơdrong yoch. Kră Yang wă kơ bơ̆n “wei pơgơ̆r” pơhlŭ tơplih kơ sư pơgơ̆r minh. Lu bơ̆n gơh pơm tơdrong noh hăm tơdrong bơ̆n năm tơ Kră Yang, gơnang kơ tơdrong ‘mêm mơnat ăn đĕch Kră Yang, Kră Yang pơkă khan Sư Yang tơpăt sĭt. “Gah tơdrong đe pơhlŭ wă kơ iĕm kiơ̆ sư pơm yoch, lu ‘nhŏng oh bơ̆n nai đe kư̆m pơhlŭ mơ̆n. Mă-lei ‘Bok Kei-Dei wei-lăng bơ̆n, Sư ưh kơ ăn đe pơhlŭ bơ̆n truh tơ bơ̆n pơm tơdrong yoch ôh, Sư gô tơgŭm bơ̆n tơpă wă kơ bơ̆n huay kơ lui kơ đe pơhlŭ.” (I Kôrintô 10:13).
Ơ Kră Yang, apinh Ih tơgŭm inh băt iŏk đon ala băt kơnăl kơ tơdrong yoch. Kơplah tơdrong yoch blah bơ̆n, apinh Ih tơgŭm inh gơnang kơ tơdrong mơnat ăn đĕch đơ̆ng Ih păng yak năm thoi tơblah, wă kơ jơhngơ̆m păng chăl arih inh ling lang ưang kơ Ih. Krao khan yua anăn Kră Yang Yêsu Krist, Amen.
Lu bơ̆n oei pơgơ̆r lu tơdrong pơhlŭ wă huay kơ pơm yoch, dah mă lê̆ tơdrong kơnê̆ pơgơ̆r bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 12
Kênh Youtube BHKTHN:
