Hơriso 116:12-14
“Inh gô iŏk kiơ wă ‘mong kơ Kră Yang. Gah dôm tơdrong ‘lơ̆ng mă Sư đei pơm kơ inh?”
(Hơriso 116:12)
Nơ̆r jet tơchĕng pơwao:
- Tơ’ngla chih Sơ̆p hla bơar Hơriso 116 băt kơ tơdrong mă Kră Yang song ăn kơ sư thoi yơ?
- Sư đei pơkă pơkăm tơdrong kiơ wă bơnê kơ tơdrong đơ̆ng ‘Bok Kei-Dei song ăn?
- Minh sơnăm hlôh hloh, ih đei băt kơ tơdrong Kră Yang song ăn thoi yơ?
- Lu bơ̆n đei pơkăm tơdrong kiơ lăm sơnăm ‘nao?
Wă yak năm lăm sơnăm ‘nao bơih, lăng lăng đêl sơnăm hlôi bơih, phŏ lu bơ̆n tơdrong mơn kơ dôm tơdrong pŭn hiôk đơ̆ng Kră Yang đei ăn kơ lu bơ̆n. Bơngai chih Sơ̆p hla bơar Hơriso 116 yua dôm nơ̆r “dôm tơdrong Kră Yang song ăn” lăm trong 12 wă khan dôm tơdrong ‘lơ̆ng mă Kră Yang đei ‘măn lê̆ kơ sư. Sư đei băt kơ dôm tơdrong mă đơ̆ng Kră Yang ăn kơ sư jơ̆ tih tin dêh hloh kơ dôm tơdrong mă sư đei tơchĕng pơwao. Yua kơ thoi noh sư đei jơhngơ̆m lui gơnang tih dêh kơ Kră Yang “dôm tơdrong ‘lơ̆ng” đơ̆ng Kră Yang ăn kơ sư đơ̆ng dôm tơdrong hlôi hloh păng Kră Yang kư̆m wă ăn mơ̆n kơ sư dôm tơdrong tơ hơnăp. Sư đei lui ngeh kơ dôm tơdrong ‘lơ̆ng mă Kră Yang đei ăn kơ sư dôm tơdrong hlôi bơih, gô pơtrơp truh dang ei păng gô pơtrơp truh tơ ning mônh.
Yua kơ sư đei mơn sơng iŏk đơ̆ng dôm tơdrong hiôk ‘lơ̆ng đơ̆ng Kră Yang đei song ăn na sư kơdih athei tơblŏk kơdih akâu sư wă kơ băt bơnê kơ dôm tơdrong ‘lơ̆ng đơ̆ng Kră Yang ‘Bok Kei-Dei đei song ăn. Nơ̆r “bơnê” lăm trong 12 wă khan pơm ‘mong dơ̆ng, pơyơ̆r dơ̆ng dah mă ăn lăi dơ̆ng, bơngai đei chih Hơriso âu sư pơma pran wă pơm ‘mong ăn kơ dôm tơdrong mă Kră Yang đei song ăn kơ sư jơ̆ lơ dêh ưh kơ kĕ jô̆. Mă lei sư đei pơma wă iŏk tơdrong kiơ wă ‘mong ăn kơ dôm tơdrong mă đơ̆ng Kră Yang đei song ăn? Bơngai mă đei chih Hơriso âu đei pơma pơkă pơkăm wă adrin kiơ̆ kơjăp, ling lang gơnang kơ Kră Yang păng wă krao khan kơ minh ‘nu Kră Yang đĕch (trong 13), yua kơ “nguaih kơ Kră Yang inh ưh kơ đei pŭn hiôk kiơ nai dơ̆ng” (Hơriso 16:2). Hơrĭ lăm trong 14, sư đei drơ̆ng kơdih akâu sư wă pơkă wă pơm pơkeh đơ̆ng dôm nơ̆r mă sư đei pơkă hăm Kră Yang “’bơ̆t anăp lu kon pơlei pơla”. Nơ̆r “’mong ăn” wă khan pơm pơkeh dôm tơdrong đei pơkă hăm Kră Yang. Tơdrong mă sư pơm pơkeh ‘bơ̆t anăp kon pơlei pơla ưh kơ sĭ khan sư pơang akâu kơdih ôh mă lei noh jơ̆ tơdrong pơm jang mă ‘bôh hơđăl hăm tơdrong iŏk đon ala, tơjur akâu jăn kơ dih yua kơ băt kơ tơdrong đơ̆ng Kră Yang đei song ăn. Tơdrong âu ba ăn kơ lơ bơngai wang hơdai bơnê kơ Kră Yang kơplah ‘bôh tơdrong arih kơjăp tơnăp ‘lơ̆ng đơ̆ng bơngai mă đei chih Hơriso âu.
Lăng đêl minh sơnăm hlôi bơih, bơ̆n athei jô̆ dôm tơdrong ‘lơ̆ng mă đơ̆ng Kră Yang ‘Bok Kei-Dei đei ăn kơ lu bơ̆n hăm hnam dơnŏ bơ̆n wă kơ đei ‘bôh dôm tơdrong Kră Yang ăn kơ lu bơ̆n jơ̆ rơkah rơkai dêh. Bơnê kơ Kră Yang yua kơ Sư ling lang ăn kơ lu bơ̆n tơdrong hiôk ‘lơ̆ng, tơdrong mă Kră Yang song ăn ưh kơ đei wă tôch hiong, lu bơ̆n kăl kơ đei pơma hăm Kră Yang thoi âu: “Inh gô iŏk kiơ wă ‘mong kơ Kră Yang. Gah dôm tơdrong ‘lơ̆ng mă Sư đei pơm kơ inh?” (trong 12). Apinh Kră Yang ăn kơ rim’nu lu bơ̆n mă sơnăm hlôi bơih, lu bơ̆n kăl kơ băt bơnê kơ dôm tơdrong ‘lơ̆ng mă Kră Yang đei ăn kơ lu bơ̆n, jê̆ Kră Yang hloh dơ̆ng păng tơ’bôh tơdrong tơnăp hăm Kră Yang rai hloh dơ̆ng. Bĕ hơdai jô̆ dôm tơdrong pŭn hiôk mă đơ̆ng Kră Yang đei song ăn, păng kăl kơ lăng hơlen lăng tơdrong kiơ mă bơ̆n đei pơkă hăm Kră Yang bơih mă lei bơ̆n pơm ưh tam mă keh đang, athei pơkă wă pơm pơkeh lăm sơnăm ‘nao plơ̆ng âu.
Ơ Kră Yang mă ‘mêm mơnat, inh wă iŏk tơdrong kiơ wă ‘mong ăn kơ dôm tơdrong hiôk ‘lơ̆ng mă Ih đei ăn bơih kơ inh lăm sơnăm hlôi bơih. Apinh Ih tơgŭm ăn kơ inh wă kơ jê̆ Ih rai hloh, chăl arih wă kơ Ih lăp đon rai hloh lăm sơnăm ‘nao âu. Yua anăn Kră Yang Yêsu Krist. Amen
Lu bơ̆n hăm đei băt kơ dôm tơdrong ‘lơ̆ng mă bơ̆n đei sơng iŏk đơ̆ng Kră Yang lăm minh sơnăm hlôi bơih ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 5
Kênh Youtube BHKTHN:
