II Hơ’mon 36:22-23
“Kră Yang khan: Yua kơ Inh băt tơdrong kiơ Inh pơkă wă pơm kơ lu iĕm. Inh đei pơkă ăn tơdrong hiôk-hian phĭ jơnap ưh kơ trŏ tơdrong kơnê̆ răm ôh, wă kơ lu iĕm đei tơdrong gơnang hơmĕng.” (Jêrêmi 29:11)
Nơ̆r jet tơchĕng pơwao:
– Pơtao Sirus asong kon pơlei Kră Yang pơm kiơ?
– Yua kơ kiơ pơtao Sirus pơm thoi noh?
– Mưh tơ’bơ̆p tơdrong truh anat nhen thoi pă đei hơmĕng kiơ bơih, bơ̆n ngăl pơm kiơ păng ngăl lăng tơ yơ?
Hla bơar Tơdrong Hơ’mon chih roi tôch‘bơ̆t tơdrong pơtao Sirus, dêh char Persia,chih hla bơar asong kon pơlei Kră Yang wih brŏk tơ dêh char sư kơdih đơ̆ng rŏng kơ 48 sơnăm jô̆ đơ̆ng năr đe pơrăm Hnam akŭm tơm Pơlei Jêrusalem. (II Hơ’mon 36:18-19).
Tơdrong truh ‘nâu minh sơnăm đơ̆ng rŏng kơ pơtao Sirus tơblơ̆ lê̆ tơdrong pơtao char Babilôn pơgơ̆r. Pơtao Sirus wă jang gah tơdrong mơnat kơ lu khul tơdrong lui mă pơtao đe pơgơ̆r pơkep lu sư noh, wă asong lu sư gơh kơkuh kơ yang lu sư kơdih. Mă tơpă sư, tơdrong pơtao Sirus jang pơm noh lăm tơdă Kră Yang proh dan ngăl wă hơmet tơiung ming kon pơlei Kră Yang. Sư wă pơkeh pơsĭt‘blep kơ nơ̆r Sư đei khan, lei na Sư hơtŭt jơhngơ̆m tơdrong tơchĕng pơtao Sirus,pơm kơ jơhngơ̆m pơtao Sirus “maih” chih hla bơar asong kon pơlei Kră Yang wih brŏk tơ dêh char sư kodih man pơdơ̆ng Hnam akŭm ăn kơ Kră Yang. Hơdrol ki,’Bok Kei-Dei yua ‘bơ̆r Jêrêmi bơngai khan lê̆ hơdrol nơ̆r Sư đei pơkă khan mưh kon pơlei Sư krao apinh Sư lei Sư gô tơl tơwih nơ̆r lu sư păng iŏk lu sư đơ̆ng pơm bơnă chông ba brŏk tơ dêh char lu sư (Jêrêmi 29:10-14). Jơ ‘nâu, kon pơlei Kră Yang gơh klaih rơngei yua kơ “Kră Yang wă pơsĭt nơ̆r Sư mă Jêrêmi đei khan lê̆ adrol bơih” (tr.22).
Kon pơlei Kră Yang pŭ iŏk tơdrong phak yua kơ đêl tơdrong yoch lu sư pơm. ‘Bok Kei-Dei ling-lang lăp đon wă mơnat ăn, hơmet tơiung ming păng wă kơ kon pơlei Sư noh đei Sư oei hơdai, Sư oei hơdai noh yua kơ kon pơlei Sư kơkuh kơ kơ Sư. (II Hơ’mon 13:10-12). Hnam akŭm tơm noh đe pơrăm kơplah chăl pơtao Nêbukatnesar sơ̆ na jơ ‘nâu Kră Yang wă kơ kon pơlei Sư hơmet tơiung ming dơ̆ng. Kơplah tơ’bơ̆p tơdrong anat nhen thoi pă đei hơmĕng kiơ bơih,sĭt kon pơlei Kră Yang hlĭch hlăch kơ đon kơplah lu sư ‘bôh tơdrong Kră Yang pơgơ̆r chăl arih lu sư ‘bĕnh hăm tơdrong ‘mêm mơnat jrŭ să. Jơ‘nâu lu sư gơh “năm tŏk tơ Pơlei Jêrusalem” wă man tơiung ăn kơ Kră Yang minh pôm hnam akŭm…lăm dêh Juđa (trong 23).
Lăm chăl arih bơ̆n kiơ̆ Kră Yang ‘nâu,sĭt mă bu bu kơ bơ̆n kư̆m đei năr gleh anat pơmat rŏ ưh pă đei hơmĕng kiơ bơih, Apinh bơ̆n lăng dơ̆ng đêl tơdrong hơ’mon chăl arih kon pơlei Kră Yang sơ̆ wă kơ‘bôh Kră Yang ling-lang oei hơdai kon pơlei Sư kơplah đei tơdrong hiôk chơt dah tơ’bơ̆p tơdrong gleh anat, kư̆m truh tơ lu sư tơbơ̆p anat đe rôp anhăk lu sư pơm bơnă tơ dêh nai ataih đơ̆ng dêh char lu sư kơdih noh hai, păng Kră Yang kư̆m pre jơhngơ̆m lăp đon ba ăn tơdrong hơmet tơiung ming lu sư. “Gah Yêsu Krist Sư oei hơnơ̆ng ling-lang, mă đơ̆ng sơ̆ khơ̆ dang ei truh tơ ning-mônh” (Hêbrơ 13:8). Dang ei bơ̆n kư̆m ling-lang đei Kră Yang oei hơdai mă khan đei tơ’bơ̆p tôm tơdrong lăm chăl arih bơ̆n.Bơ̆n‘nĕ kơ tôch đon pă đei hơmĕng,bơ̆n kư̆ kơ krao apinh Kră Yang hơnơ̆ng păng gơnang tơpă kơ nơ̆r Sư đei pơkă kơ bơ̆n bơih. Dôm nơ̆r Kră Yang pơkă, Sư ling-lang pơsĭt, pơkeh yua kơ Sư ling-lang đei tơdă wă mơnat ăn yoch glăi bơ̆n păng hơmet tơiung ming tơdrong lui bơ̆n.
Apinh Ih tơgŭm inh ling-lang lui gơnang kơ dôm nơ̆r Ih pơkă ‘bĕnh hăm tơdrong ‘mêm mơnat noh, mă khan đei tơ’bơ̆p tôm tơdrong,hiôk ‘lơ̆ng dah anat anot lăm chăl arih. Apinh Ih tơgŭm inh hơnơ̆ng kơ kơjăp tơnăp lăm tơdrong kơkuh kơ Ih păng pơm kiơ̆ dôm nơ̆r Ih bơtho khan.Inh krao khan yua anăn Kră Yang Yêsu Krist, Amen!
Bơ̆n hăm hơtai arih lăm tơdrong truh anat anot pă đei hơmĕng ưh?
Đŏk Sơ̆p hla bơar ‘Bok Kei-Dei lăm pêng sơnăm: I Kôrintô 3
Kênh Youtube BHKTHN:
