Hơriso 50:1-14
“Pơm tơdrong tơpăt, băt pơm tơdrong trŏ Noh Kră Yang lăp đon hloh kơ tơmam soi pơyơ̆r.” (Tơdrong Pơđơ̆k 21:3)
Nơ̆r jet tơchĕng pơwao:
– Kră Yang khan hơđăl Sư bơih Tơ’ngla mă ‘lơ̆ng tơpăt thoi yơ?
– Kon pơlei Kră Yang hlôh ưh kơ trŏ wă kơ hlôh lăp đon tơdrong tơpăt Kră Yang thoi yơ?
– Pơm thoi yơ wă kơ tơl tơwih mă trŏ kơ tơdrong ‘lơ̆ng tơpăt Kră Yang?
Hơriso 50 pơma khan hơđăl Kră Yang ‘Bok Kei-Dei jơ̆ Tơ’ngla sek tơlang tơpăt, păng krao kon pơlei mă pơgơ̆p bơih hăm Sư. “Lu bơngai iŏk bơih tơdrong pơgơ̆p hăm inh” (trong 5). Lăng hơlen ming jơhngơ̆m lăm tơdrong kơkuh. Lăm chăl Pah so sơ̆, Kră Yang khan hơđăl Sư bơih Kră Yang ‘Bok Kei-Dei ‘lơ̆ng tơpăt. Kră Yang pơkă ăn kơ kon pơlei Sư anih teh pơkă ‘lơ̆ng rŏ (trong 2), mălei wă kơ lu sư pơm tơwih, lu sư athei pơm tơ’bôh tơdrong hiơ̆k pŭ iŏk lăm tơdrong đei pơgơ̆p bơih hăm Kră Yang hăm tơdrong kơkuh kơ Sư đơ̆ng dôm tơproh ‘lơ̆ng pơyơ̆r tơmam soi păng dôm tơdrong juăt kon pơlei nai. Kră Yang gô khan hơđăl pơm kiơ̆ tơdrong pơgơ̆p ‘noh mă tơpăt tơpă, thoi lăm trong 3, Sư “ưh kơ đei ngăl đĕch ôh, ‘bơ̆t anăp Sư đei pla ŭnh soh chhông. Tăp dăr kơ Sư đei hơbŭt hơbang tih tơpă”. Kră Yang tơ’bôh tơdrong tơpăt Sư hăm trong Sư bơih ‘Bok sek tơlang kơ lu kon pơlei Sư (trong 6). Kră Yang kư̆m Tơ’ngla sek tơlang kơ ala teh đak “Sư truh wă sek tơlang kơ teh đak; Sư gô sek tơlang kơ teh đak hăm tơdrong tơpăt…” (Hơriso 96:13; 9:8).
Mălei ră kon pơlei Kră Yang hlôh tam mă trŏ wă pơlăp kơ tơdrong tơpăt Kră Yang. Lu sư pơyơ̆r tơmam soi thoi tơdrong juăt đĕch păng tơchĕng Kră Yang kăl kơ kon triu păng rơmo! Na Kră Yang khan: “Inh kư̆m ưh kơ kălb kơ Rơmo tơno đơ̆ng hnam ih. Dah bơbe bram đơ̆ng lăm khŭl bơbe ih” (trong 9). Đei ‘bar tơdrong Kră Yang ưh ko yua tơmam soi; Mă mônh, Kră Yang pơjing tôm tơmam, “Yua kơ đĭ-đăng sem bri tă kơ tơmam Inh ngăl. Lu khul kon sem tơ rơbâu bon kông groi kư̆m lei-lăi.”(trong 10). Mă bar Kră Yang ưh kơ trŏ kơ kon bơngai na kăl kơ “sa nhă” dôm lu tơmam soi pơyơ̆r ‘noh: “Tơdah inh pơngot, Inh ưh kơ roi kơ ih; Yua kơ teh đak păng tôm tơmam lăm noh tă kơ tơmam inh ngăl. Inh hăm sa ‘nhĕm rơmo tơno, Dah hăm huch pham bơbe bram?” (trong 12-13). Pơyơ̆r tơmam soi rim sơnăm noh wă tơ’blŏk kơ kon pơlei Sư gah tơdrong yoch păng jơhngơ̆m băt bơnê kơ Kră Yang: “Mă-lei lu sư oei soi ling lang rim sơnăm. Pơm thoi noh lu sư oei đei tơdrong yoch păng oei ‘blŏk kơ tơdrong yoch đêl pơm. Ưh kơ gơh klaih ôh thoi noh,” (Hêbrơ 10:3).
Trong wă tơwih hăm tơdrong tơpăt Kră Yang mă trŏ ‘noh “Pơyơ̆r nơ̆r bơnê ih kơ Kră Yang ‘Bok Kei-Dei, păng pơkeh nơ̆r pơkă ih hăm Kră Yang Tih Hloh.” (trong 14). Wă khan kơkuh kơ Kră Yang hăm jơhngơ̆m băt bơnê, păng pơm kiơ̆ Nơ̆r Kră Yang lăm tơdrong arih rim năr. Kră Yang ưh kơ đei apinh đơ̆ng kon pơlei Sư dôm tơmam soi pơyơ̆r gah ‘nguaih. (Hơriso 51:16-17). Kơplah băt kơ Kră Yang ‘Bok Kei-Dei bơih ‘lơ̆ng tơpăt, bơ̆n athei kơkuh kơ Kră Yang hăm jơhngơ̆m tơpăt tơpă, păng arih hăm jơhngơ̆m hli yom kơ Kră Yang, băt bơnê kơ Kră Yang.
Ơ ‘Bă mă ‘lơ̆ng tơpăt! Bơnê kơ Ih đei tơ’blŏk kơ inh. Ih bơih Tơ’ngla ‘lơ̆ng tơpăt. Apinh Ih ăn kơ inh băt hli yom kơ Kră Yang păng kơkuh kơ Ih hăm jơhngơ̆m chu yom păng băt bơnê kơ Ih. Krao khan yua anăn Kră Yang Yêsu Krist, Amen.
Bơ̆n gô pơm kiơ kơplah băt Kră Yang bơih ‘lơ̆ng tơpăt?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 3
Kênh Youtube BHKTHN:
